Psailm 46 - An tSaltair nó Sailm Ḋáiḃí 1965 (Ó Cuinn)

Salm 46. Deus noster refugium.

¹ Is é Dia ár ndóċas agus ár neart: is giorra dúinn a ċaḃair inár mbuaireaṁ.

² Ní ḃeiḋ eagla orainn mar sin, siúd is go gcraitear an talaṁ: agus go gcartar na cnoic amaċ i lár na farraige.

³ Siúd is go mbíonn a tonnta ar mire agat: agus go mbaintear criṫ as na sléiḃte leis an ndoineann.

⁴ Tá aḃainn ann, a mbíonn a sruṫanna ag cur aoiḃnis ar ċaṫair Ḋé: ionad naofa pailliúin an Té is Airde.

⁵ Bíonn Dia ina measc, agus ní ḃogfar í dá ḃrí sin: tiocfaiḋ Dia ċuici le caḃair, agus tiocfaiḋ sé gan ṁoill.

⁶ Tá mórġleo as na náisiúin, agus tá gluaiseaċt faoi na ríoċta: aċ cluineaḋ Glór Dé, agus coscróiḋ an ċruinne.

⁷ Tá Tiarna na slua linn: is é Dia Iácóib ár ndídean.

⁸ Tagaigí ċugainne, go ḃfeice siḃ oibreaċa an Tiarna: an scrios a ṫug sé ṫar an talaṁ.

⁹ Tá sé ag cur críċe le cogaí ar fuaid an doṁain: tá sé ag briseaḋ an ḃoġa, agus ag déanaṁ ḋá leaṫ den tsleá, agus ag dó na gcarbad sa tine.

¹⁰ Tostaigí mar sin, aċ aiṫnígí gur mé is Dia ann: beiḋ mé dom ardú i measc na náisiún, agus beiḋ mé dom ardú ar an talaṁ.

¹¹ Tá Tiarna na slua linn: is é Dia Iácóib ár ndídean.