Psailm 40 - An tSaltair nó Sailm Ḋáiḃí 1965 (Ó Cuinn)

Salm 40. Expectans expectavi.

¹ Dʼḟan mé go foiġneaċ leis an Tiarna: agus ċlaon sé ċugam, agus ċuala sé mo ġlaoċ.

² Agus ṫug sé aníos mé as poll an uafáis, as an lábán agus an dóib: agus ċuir sé mo ċosa ina seasaṁ ar an gcarraig, agus rialaiġ sé mo imeaċta.

³ Agus tá aṁrán úrnua curṫa i mo ḃéal aige: mar atá altú dár nDia.

⁴ Is iomaí duine a ḟeicfeas é, agus a ġlacfas eagla: agus a ċuirfeas a ṁuinín sa Tiarna.

⁵ Is beannaiṫe an fear a mbíonn a ḋóċas as Dia: agus nár ċloíġ le drong an díomais, agus le luċt leanúna na mbréag.

⁶ Mo Ṫiarna Dia, is mór na fearta a rinne tú, ní lú do smaointe orainne: agus ní ḃíonn aon duine á gcur i do ċeann.

⁷ Dá n‑insínn iad, agus dá ndéanainn tráċt orṫu: ṡáróidís mo ċumas laḃarṫa.

⁸ Níor ṫoiliġ tú íobairt ná toirḃirt: aċ dʼoscail tú mo ċluasa.

⁹ Níor iarr tú íobairt loiscṫe ná íobairt ṗeaca: ba ansin a dúirt mé, siúd ag teaċt mé.

¹⁰ Ar ṗár an leaḃair atá breacṫa i mo ṫaoḃ, go ḃfuil orm do ṫoil a ċoṁlíonaḋ, a Ḋia liom: táim sásta a ḋéanaṁ; tá do ḋlí i mo ċroí istiġ.

¹¹ Dʼḟoilsiġ mé dʼḟíréantaċt sa ṁórċruinniú: féaċ, ní ċoinneoiḋ mé mo ḃéal ina ṫost, agus tá a ḟios agat é, a Ṫiarna.

¹² Níor ċeil mé dʼḟíréantaċt i mo ċroí istiġ: aċ laḃair mé ar dʼḟírinne agus ar do ṡlánú.

¹³ Níor ċoinniġ mé siar do ṫrócaire ġráṁar ná dʼḟírinne: ón mórċruinniú.

¹⁴ Ná coinniġ do ṫrócaire uaim, a Ṫiarna: bíoḋ do ċarṫanaċt ġráṁar agus dʼḟírinne do mo ċuṁdaċ i gcónaí.

¹⁵ Óir ṫimpeallaiġ buarṫa gan áireaṁ mé; fuair mo ṗeacaí greim orm ionas naċ ḃféadaim mo ċeann a ṫógáil: ní lia ribí mo ċinn ná iad, agus cloíoḋ mo ċroí ionam.

¹⁶ A Ṫiarna, go mba ṫoil leat mʼḟuascailt: déan deifir, a Ṫiarna, do ċuidiú liom.

¹⁷ Bíoḋ náire agus aiféala le ċéile ar an dream atá le mʼanam a ṁilleaḋ: cuirtear ar gcúl iad, agus tugtar aiṫis don dream a mbíonn olc acu dom.

¹⁸ Bídís fágṫa, faoina ndíol de náire: an dream a deir liom, mo náire ṫú, mo náire ṫú.

¹⁹ Go raiḃ tú féin ag an dream a ḃíos dod iarraiḋ mar ċúis áṫais agus lúċáire: agus abraḋ an dream a ṫug grá do do ṡlánú de ṡíor, Molaḋ leis an Tiarna.

²⁰ Táimse boċt dearóil: aċ ní beag leis an Tiarna mo ċás.

²¹ Is tú mo ċúntóir agus mʼḟuascailteoir: ná déan mórán moille, a Ḋia liom.