Psailm 38 - An tSaltair nó Sailm Ḋáiḃí 1965 (Ó Cuinn)

Salm 38. Domine, ne in furore.

¹ Ná taḃair aċasán dom, a Ṫiarna id ḟearg: ná smaċtaiġ mé i dteas do ḋíḃeirge.

² Óir tá do ṡaiġeada sáite ionam: agus do láṁ anuas orm go trom.

³ Níl aon ḟónaṁ ar mo ċolainn, de ḃrí do ḋíḃeirge: ná ní ḟaiġeann mo ċnáṁa suaiṁneas de ḃarr mo ṗeaca.

⁴ Óir dʼéiriġ mo ṁíġníoṁarṫa os mo ċionn: agus táid mar ṫrom‑ualaċ, a sáraíonn sé orm a iompar.

⁵ Tá mo ċneáċa bréan, lofa: de ḃarr mo ḋíċéille.

⁶ Lena dtáinig orm de ḃrón agus de ḃuaireaṁ: bím ag imeaċt faoi ḋólás dá mbʼḟada an lá.

⁷ Óir tá mo leasraċa líonta de ḋroċaicíd: agus ní slán aon ḃall de ḃaill mo ċoirp.

⁸ Táim lag, agus is géar mo ġoin: lig mé béic asam le buaireaṁ mo ċroí.

⁹ A Ṫiarna, is feasaċ duit mian mo ċroí: agus ní ċeiltear ort na hosnaí a ṫarraingím.

¹⁰ Tá mo ċroí ag bualaḋ go tiuḃ, agus táim in easpa ḃrí: agus dallaḋ solas moṡúl.

¹¹ Ṡeas mo ċairde agus mo ċoṁarsana ag aṁarc ar mo ḃuaireaṁ: agus ṡeas mo luċt gaoil i ḃfad uaim.

¹² Ḃí fós an dream a raiḃ mʼanam uaṫu ag cur dola roṁam: agus an dream a ḃí le mo ḋoċar ag canaḋ urċóide agus ag beartú feille dá mbʼḟada an lá.

¹³ Agus ḃí mise mar ḃoḋrán, agus níor ċuala mé iad: agus mar ḃalḃán naċ ḃfosclann a ḃéal.

¹⁴ Ḃí mé mar ḟear naċ ḃfuil éisteaċt aige: ná aisḟreagra ina ḃéal.

¹⁵ Óir is ionat, a Ṫiarna, a ċuir mé mo ḋóċas: is tú a ḟreagrós ar mo ṡon, mo Ṫiarna Dia.

¹⁶ Ba é mʼiarratas naċ maífeaḋ an drong sin mo naiṁde a mbua orm: óir nuair a ṡleaṁnaiġ mo ċos, ċuir sin áṫas mór orṫu im aġaiḋ.

¹⁷ Agus, i ḃfírinne, is buan faoin bplá mé: agus bíonn mo ṫuirse de ṡíor faoi mo ṡúil.

¹⁸ Óir adṁóiḋ mé mʼurċóid: agus beiḋ brón orm faoi mo ṗeaca.

¹⁹ Aċ bíonn mo naiṁde beo bríoṁar: agus is mór méid an dreama a ṫug fuaṫ dom gan fáṫ.

²⁰ Agus an dream a ṫugann an t‑olc in aġaiḋ na maiṫeasa, táid im éadan: de ḃrí go leanaim dá ḃfuil maiṫ.

²¹ Ná tréig mé, mo Ṫiarna Dia: ná fan i ḃfad uaim.

²² Déan deifir agus cuidiġ liom: a Ṫiarna Dia mo ṡlánaiṫe.