Psailm 27 - An tSaltair nó Sailm Ḋáiḃí 1965 (Ó Cuinn)

Salm 27. Dominus illuminatio.

¹ Is é an Tiarna mo ṡolas, agus mo ṡlánú; cé sin a mbeiḋ eagla orm roiṁe: is é an Tiarna neart mo ḃeaṫa; cé siúd a ċuirfiḋ criṫ orm?

² Bʼṡiúd ċugam luċt an oilc, mar tá mo naiṁde agus mʼeascairde, go n‑íosfaidís an ḟeoil de mo ċnáṁa: aċ fuaireadar tuisleaḋ agus ṫiteadar.

³ Dá mbeaḋ slua fear in eagar caṫa im éadan, ní ḃeiḋ eagla ar mo ċroí: agus siúd is go gcuirtí cogaḋ orm, is ann a ċuirfiḋ mé mo ḋóċas.

⁴ Ċuir mé aċainí aṁáin ar an Tiarna, ní iarrfaiḋ mé air aċ an ṁéid sin: ḃeiṫ i mo ċónaí i dteaċ an Tiarna le mo ṡaol ʼsmo laeṫanta i rioċt go ḃféadfainn scéiṁ an Tiarna a ḟeiceáil, agus ḃeiṫ ag taiṫí a ṫeampaill.

⁵ Óir in am an ḃuarṫa cuṁdóiḋ sé mé ina ṗailliún: is aṁlaiḋ a ḟolóiḋ sé mé in ionad diaṁair a árais, agus ardóiḋ sé mé ar ċarraig ċloiċe.

⁶ Agus ardóiḋ sé mo ċeann gan ṁoill: os cionn mo naiṁde atá i mo ṫimpeall.

⁷ Ar an áḃar sin beiḋ ardlúċáir orm ag toirḃirt íobairte ina ṫeaċ: beiḋ molaḋ an Tiarna á ṡeinm agus á rá agam.

⁸ Éist le mo ġlór, a Ṫiarna, nuair a ġlaoim ort: bíoḋ trócaire agat dom agus taḃair cluas dom.

⁹ Ḃí mo ċroí ag laḃairt leat: Tagaigí ar ṫuairisc mo ġnúise; ar ṫuairisc do ġnúise, a Ṫiarna, ṫiocfas mé.

¹⁰ Ná ceil do ġnúis orm: ná bíoḋ olc agat do do ṡeirḃíseaċ agus ná díbir é.

¹¹ Ba tú mo ċaḃair: ná fág mé agus ná déan mo ṫréigean, a Ḋia mo ṡlánaiṫe.

¹² Nuair a ṫréigeas mʼaṫair agus mo ṁáṫair mé: glacann an Tiarna liom.

¹³ Múin do ṡlí dom, a Ṫiarna: agus déan eolas dom ar an mbealaċ ċeart, de ḃarr mo naiṁde.

¹⁴ Ná lig do mo naiṁde a roġa rud a ḋéanaṁ liom: óir dʼéiriġ fianaisí bréige agus luċt na mionn éitiġ im éadan.

¹⁵ Ḃain mé deireaḋ dúile de ḋóċas: murab é go gcreidim go ḃfeice mé maiṫeas an Tiarna i ḃfírinne agus mé ar ṫalaṁ na mbeo.

¹⁶ Fan ċoṁ fada agus is áil leis an Tiarna: glac ina ṁórṁisneaċ é, agus neartóiḋ sé le do ċroí; agus cuir do ḋóċas sa Tiarna.