Psailm 26 - An tSaltair nó Sailm Ḋáiḃí 1965 (Ó Cuinn)

Salm 26. Judica me, Domine.

¹ Go mba tú mo ḃreiṫeaṁ, a Ṫiarna, ó ṡiúil mé go neaṁċoirṫeaċ: bíoḋ mo ṁuinín as an Tiarna, agus ní ṫitfiḋ mé dá ḃrí sin.

² Proṁaiġ mé, a Ṫiarna, agus féaċ mé: breaṫnaiġ mʼáranna agus mo ċroí.

³ Óir bíonn do ċarṫanaċt os coṁair mo ṡúl de ṡíor: agus siúlfaiḋ mé de réir dʼḟírinne.

⁴ Níor ċónaiġ mé le daoine díoṁaoine: agus ní ċoinneoiḋ mé cuideaċta le luċt na bréige.

⁵ Ṫug mé fuaṫ do ċoṁṫionól luċt an oilc: agus ni ṡuífiḋ mé i measc na ndroċḋaoine.

⁶ Nífiḋ mé mo láṁa i neaṁċoirṫeaċt, a Ṫiarna: agus is aṁlaiḋ a ṫarraingeoiḋ mé ar dʼaltóir;

⁷ Go gcluintear mo ġlór ag altú duit: agus ag insint dʼoibreaċa iontaċa.

⁸ A Ṫiarna, ṫug mé grá do dʼáras tí: agus dʼáit cónaiṫe dʼonóra.

⁹ Ná cuir mʼanam faoi ġlas i measc na bpeacaċ: ná mo ḃeaṫa le luċt doirtiṫe na fola;

¹⁰ A mbíonn an ċoir ina láṁa: agus a láṁ ḋeas lán de ḃreabanna.

¹¹ Aċ is aṁlaiḋ a ṡiúlfaiḋ mise go neaṁċoirṫeaċ: go mbʼáil leat mʼḟuascailt agus ḃeiṫ trócaireaċ liom.

¹² Is daingean seasaṁ mo ċoise: molfaiḋ mé an Tiarna ar na coṁṫionóla.