Psailm 145 - An tSaltair nó Sailm Ḋáiḃí 1965 (Ó Cuinn)

Salm 145. Exaltabo te, Deus.

¹ Móróiḋ mé ṫú, a Ḋia, a Rí: agus seinnfiḋ mé molaḋ dʼAinm go saol na saol.

² Níl lá naċ dtaḃarfaiḋ mé buíoċas leat: agus seinnfiḋ mé molaḋ dʼAinm go saol na saol.

³ Is mór an Tiarna, agus is iontaċ mar is fiú molaḋ é: níl críoċ lena ṁórgaċt.

⁴ Beiḋ gaċ glúin ag molaḋ dʼoibreaċa dá ċéile: agus ag noċtaḋ do ċuṁaċta.

⁵ Agus beiḋ mise ag cur síos ar do ċlú: ar do ġlóir, agus ar do ṁolaḋ, agus ar dʼoibreaċa iontaċa.

⁶ Go raiḃ na daoine ag laḃairt ar ċuṁaċt do ġníoṁarṫa iontaċa: agus tráċtfaiḋ mise fós ar do ṁórgaċt.

⁷ Taispeánfar cuiṁneaċán do ċarṫanaċta líonṁaire: agus beiḋ na daoine fós ag canaḋ faoi dʼḟíréantaċt.

⁸ Is maiṫ agus is trócaireaċ an Tiarna: is fadḟoiġneaċ é agus is mór a ṁaiṫeas.

⁹ Bíonn an Tiarna gráṁar le gaċ duine: agus bíonn a ṫrócaire os cionn a oibreaċa uile.

¹⁰ Bíonn dʼoibreaċa uile do do ṁolaḋ, a Ṫiarna: agus bíonn do naoiṁ ag taḃairt buíoċais duit.

¹¹ Taispeánann siad glóir do ríoċta: agus cuireann siad síos ar do ċuṁaċt;

¹² Ionas go mbeiḋ a ḟios ag an saol: faoi do ċuṁaċt, agus faoi do ġlóir, agus faoi ṁórgaċt do ríoċta.

¹³ Is ríoċt ṡíoraí do ríoċtsa: agus maireann do ṫiarnas go saol na saol.

¹⁴ Tógann an Tiarna an dream a ṫiteas: agus ardaíonn sé an drong atá ina luí go híseal.

¹⁵ Níl súil naċ ḃfuil ag feiṫeaṁ ort, a Ṫiarna: agus is tráṫúil a ṫugann tú a mbia dóiḃ.

¹⁶ Osclaíonn tú do láṁ: agus níl ní dá maireann naċ líontar dedʼḟairsinge.

¹⁷ Is fíréanta é an Tiarna ina ṡlite uile: agus is naofa é ina oibreaċa go léir.

¹⁸ Is fogas an Tiarna don dream a ġlaos air: an ṁéid acu a ġlaos air go dlisteanaċ.

¹⁹ Sásóiḋ sé mian na droinge a mbíonn a eagla orṫu: taḃarfaiḋ sé cluas dá nglaoċ, agus taḃarfaiḋ sé cuidiú dóiḃ.

²⁰ Cuṁdaíonn an Tiarna an dream a ġráíos é: aċ scaipeann sé an drong loċtaċ uaiḋ.

²¹ Beiḋ mo ḃéal ag seinm molta an Tiarna: agus tugaḋ gaċ feoil buíoċas dá Ainm naofa go saol na saol.