Psailm 144 - An tSaltair nó Sailm Ḋáiḃí 1965 (Ó Cuinn)

Salm 144. Benedictus Dominus.

¹ Go mba ḃeannaiṫe an Tiarna mo ċuṁaċt: a ṁúineas an cogaḋ do mo láṁa, aʼs an caṫ do mo ṁéara;

² Mo ḋóċas agus mo ḋaingean, mo ċaisleán agus mʼḟuascailteoir, mo ċosantóir as a mbíonn mo ṁuinín: a smaċtaíos an ṁuintir atá faoi mo ċeannas.

³ A Ṫiarna, cad is duine ann, go mbeaḋ an meas sin agat air: nó mac an duine go dtaḃarfá oiread airde air?

⁴ Níl sa duine aċ neaṁní: scinneann a ṡeal ṫart mar scáil.

⁵ Claon do neaṁa, a Ṫiarna, agus tar anuas: cuimil leis na sléiḃte, agus beiḋ toit astu.

⁶ Caiṫ amaċ do splancaċa, agus réab iad: scaoil amaċ do ṡaiġeada, agus scrios iad.

⁷ Cuir anuas do láṁ ón airde: ḃí dom ḟuascailt, agus tóg mé amaċ as na huiscí móra, as láiṁ na gcoiṁṫíoċ;

⁸ Naċ laḃraíonn a mbéal aċ díoṁaointeas: agus ar láṁ ḋeas urċóide a láṁ ḋeassan.

⁹ Canfaiḋ mé aṁrán úrnua duit, a Ḋia: agus seinnfiḋ mé do ṁolaḋ ar liúit na ndeiċ téad.

¹⁰ Ṫug tú bua do na ríṫe: agus dʼḟuascail tú Dáiḃí do ṡeirḃíseaċ ó ḃaol an ċlaíṁ.

¹¹ Bí do mo ṡaoraḋ agus dom ḟuascailt as láiṁ na gcoiṁṫíoċ: naċ laḃraíonn a mbéal aċ díoṁaointeas, agus ar láṁ ḋeas urċóide a láṁ ḋeas‑san.

¹² Go ḃfása ár gclann ṁac aníos mar ġasa óga: agus go raiḃ ár gclann iníon mar ċúinní snasta an teampaill.

¹³ Go raiḃ ár n‑ioṫlanna ag cur ṫarstu le gaċ cineál stóir: agus go raiḃ ár gcaoiriġ ag breiṫ na mílte agus na ndeiċ mílte inár bpáirceanna.

¹⁴ Go raiḃ ár ndaiṁ go láidir ċun saoṫair, ionas naċ raiḃ meaṫ ann: ná imirce i mbraiġdeanas, ná ceasaċt faoinár sráideanna.

¹⁵ Is aoiḃinn don ṁuintir arḃ aṁlaiḋ a gcás: is aoiḃinn gan aṁras an ṁuintir a mbíonn an Tiarna acu mar Ḋia.