Psailm 137 - An tSaltair nó Sailm Ḋáiḃí 1965 (Ó Cuinn)

Salm 137. Super flumina.

¹ Ar ḃruaċ aiḃneaċa Ḃaibilóin ṡuíomar síos agus ċaoineamar: nuair a ċuiṁníomar ort, a Ṡíóin.

² Dála ár gcláirseaċ, ċroċamar iad: ar na crainn atá ansin.

³ Óir dʼiarr an drong a ṫug i mbroid sinn aṁráin agus seinm ceoil orainn, agus sinn go tromċroíoċ: Canaigí dúinn aṁrán de ċuid Ṡíóin.

⁴ Conas a ċanfaimid aṁrán an Tiarna: ar ṫalaṁ ċoiṁṫíoċ?

⁵ Má ḋéanaim dearmad ort, a Iarúsalem: déanaḋ mo ḋeasláṁ dearmad dá clisteaċt.

⁶ Mura gcuiṁním ort, ceanglaḋ mo ṫeanga de mo ċarball: gan aṁras, murab é Iarúsalem is ansa liom in am mo lúċáire.

⁷ Cuiṁniġ ar ċlann Édoim, a Ṫiarna, lá Iarúsalem: mar a dúradar, Leagaigí é, leagaigí é go lár agus go lántalaṁ.

⁸ A iníon Ḃaibilóin, beiḋ tú do do ṡnoí le hainnise: agus is aoiḃinn don té a ḋéanfas leat mar rinne tú linn.

⁹ Is beannaiṫe a ḟaiġeann greim ar do ċlann: agus a gcaiṫeaṁ in éadan na gcloċ.