Psailm 135 - An tSaltair nó Sailm Ḋáiḃí 1965 (Ó Cuinn)

Salm 135. Laudate nomen.

¹ Bígí ag molaḋ an Tiarna, agus ag idirṁóraḋ Ainm an Tiarna: seinnigí a ṁolaḋ, a ṡeirḃíseaċa an Tiarna.

² A ṡeasann i dteaċ an Tiarna: i gcúirteanna tí ár nDé.

³ Molaigí an Tiarna, óir is maiṫ an Tiarna: seinnigí molaḋ dá Ainm, óir is gnaíúil é.

⁴ Cad ċuige? De ḃrí gur ṫoġ an Tiarna Iácób dó féin: agus Iosrael mar ṡeilḃ ḋílis aige féin.

⁵ Óir is feasaċ dom gur mór an Tiarna: agus go mbíonn ár nDia os cionn na ndéiṫe uile.

⁶ Níl ní dar ṫaitin leis an Tiarna naċ ndearna sé ar neaṁ agus ar talaṁ: agus ar ṁuir agus i gcuasa doṁaine an doṁain.

⁷ Tugann sé amaċ na néalta ó imill an doṁain: agus cuireann sé uaiḋ na caoranna tine in éineaċt leis an ḃfearṫainn, agus tugann sé na gaoṫa as a ṫiṫe taisciṫe.

⁸ Ḃuail sé céadġin na hÉigipte: idir ḋuine agus ḃeiṫíoċ.

⁹ Ċuir sé coṁarṫaí agus iontais isteaċ i do ċeartlár, a ṫír na hÉigipte: ar Ṗáraó agus ar a ṡeirḃísiġ go huile.

¹⁰ Ḃuail sé an iomad náisiún: agus ṁaraiġ sé na ríṫe móra;

¹¹ Síhon rí na nAmoríteaċ, agus Og, rí Ḃásáin: agus ríoċta Ċanáin go huile;

¹² Agus ṫug sé a dtalaṁ mar oiḋreaċt; mar oiḋreaċt dá ṗobal Iosrael.

¹³ Maireann dʼAinm, a Ṫiarna, de ṡíor: agus is mar an gcéanna do do ċuiṁne, a Ṫiarna, ó ġlúin go ċéile.

¹⁴ Óir bainfiḋ an Tiarna amaċ díoltas ar son a ṗobail: agus beiḋ sé maiṫ dá ṡeirḃísiġ.

¹⁵ Dála íoṁánna na bpágánaċ, níl iontu aċ airgead is ór: saoṫar láṁ na ndaoine.

¹⁶ Bíonn béal orṫu, agus ní laḃraíonn siad: bíonn súile ina gcinn, aċ ní ḟeiceann siad.

¹⁷ Bíonn cluasa orṫu, agus ina ḋiaiḋ sin ní ċluineann siad: ní mó a ḃíos aon anáil ina mbéal.

¹⁸ Bíonn luċt a ndéanta mar iad: agus is ionann an cás dá gcuireann a muinín iontu.

¹⁹ Molaigí an Tiarna, a ṫeaġlaiġ Iosrael: molaigí an Tiarna, a ṫeaġlaiġ Áróin.

²⁰ Molaigí an Tiarna, a ṫeaġlaiġ Léḃí: a ḋream darb eagal an Tiarna, molaigí an Tiarna.

²¹ Moltar an Tiarna as Síón: a mbíonn cónaí air in Iarúsalem.