Psailm 132 - An tSaltair nó Sailm Ḋáiḃí 1965 (Ó Cuinn)

Salm 132. Memento, Domine.

¹ A Ṫiarna, cuiṁniġ ar Ḋáiḃí: agus ar a ḃfuair sé de ḃuaireaṁ;

² Mar ṫug sé a ṁionn don Tiarna: agus a ṁóid do Ḋia Uileċuṁaċtaċ Iácóib;

³ Ní ṫiocfaiḋ mé faoi ḋíon mo ṫí: ná ní raċaiḋ mé suas i mo leaba;

⁴ Ní ligfiḋ mé don suan teaċt ar mo ṡúile, ná don ċodlaḋ teaċt ar mʼḟaḃraí: ná do ċamóga mo ċinn a suaiṁneas a ḟáil;

⁵ Go ḃfaiġe mé ionad don Tiarna: cónaí le haġaiḋ Dé cuṁaċtaiġ Iacóib.

⁶ Féaċ, ċualamar tráċt air in Efráta: agus fuaireamar é sa ċoill.

⁷ Raċaimid isteaċ ina ṫabarnacal: agus feacfaimid glún go híseal roiṁ stól a ċos.

⁸ Éiriġ, a Ṫiarna, ag triall ar do ṡuí suaiṁnis: tusa, agus airc do ċuṁaċta.

⁹ Bíoḋ an ḟíréantaċt ar do ṡagairt mar éadaċ: agus do naoiṁ ag canaḋ ceoil le méid a lúċáire.

¹⁰ As uċt Ḋáibí, do ṡeirḃíseaċ: ná diúltaiġ do ġnúis do dʼungṫaiġ.

¹¹ Ṫug an Tiarna mionn dílis do Ḋáiḃí: agus cuirfiḋ sé gan teip lena ḟocal;

¹² Is é toraḋ do ċolainne: a ċuirfiḋ mé ina ṡuí ar do ċaṫaoir ríoga.

¹³ Má ċoinníonn do ċlann mo ċonraḋ, agus mʼḟianaisí a ṁúinfeas mé dóiḃ: beiḋ a gclann siúd fós ina suí ar do ríċaṫaoir go deo.

¹⁴ Óir ṫoġ an Tiarna Síón mar áitreaḃ dó féin: is í a ṡantaiġ sé.

¹⁵ Beiḋ seo agam mar ṡuí suaiṁnis: anseo a raċas mé a ċónaí, óir is ann a ḃíos mo ḋúil.

¹⁶ Beannóiḋ mé agus méadóiḋ mé a bia di: agus taḃarfaiḋ mé a sá dá boċta.

¹⁷ Cuirfiḋ mé an tsláinte mar ṁaise ar a sagairt: agus beiḋ a naoiṁ ag déanaṁ gairdis agus ag canaḋ ceoil.

¹⁸ Taḃarfaiḋ mé bláṫ ar ḃeann Ḋáiḃí san áit sin: tá lóċrann ullṁaiṫe agam le haġaiḋ mʼungṫaiġ.

¹⁹ Dála a naiṁde, ní ḃeiḋ orṫu uaim aċ an náire: aċ caiṫfiḋ sé féin a ċoróin faoi ḃláṫ.