Psailm 130 - An tSaltair nó Sailm Ḋáiḃí 1965 (Ó Cuinn)

Salm 130. De profundis.

¹ As íoċtar an aigéin ġlaoiġ mé ort, a Ṫiarna. A Ṫiarna, éist le mo ġlór.

² Éisteaḋ do ċluasa go maiṫ: le glór mo ċasaoide.

³ Más róḋian tú, a Ṫiarna, ag breaṫnú a ndearnaḋ go míċeart: a Ṫiarna, cé a ṡeasóḋ é?

⁴ Óir is agat atá an trócaire: is dá ḃrí sin bíonn dʼeagla ar ḋaoine.

⁵ Bíonn mo ṡúil leis an Tiarna; bíonn mʼanam ag feiṫeaṁ air: is as a ḃriaṫar a ḃíos mo ṁuinín.

⁶ Is mó a ḃíos mʼanam ag súil leis an Tiarna: ná bíonn na coimeádaiṫe ag súil leis an maidin; is ea, is mó é ná súil coimeádaí le maidin.

⁷ A Iosrael, cuir do ṁuinín sa Tiarna, óir is ag an Tiarna a ḃíos an trócaire: agus is aige a ḃíos an ḟuascailt ḟairsing.

⁸ Agus is é a ḟuasclaíos Iosrael: óna ṗeacaí go léir.