Psailm 122 - An tSaltair nó Sailm Ḋáiḃí 1965 (Ó Cuinn)

Salm 122. Laetatus sum.

¹ Ḃí lúċáir orm nuair a dúraḋ liom: Raċaimid go teaċ an Tiarna.

² Is i do ġeataí a ḃeiḋ ár gcosa ina seasaṁ: a Iarúsalem.

³ Is ar Iarúsalem atá déanaṁ na caṫraċ: ina mbítear ag cur le ċéile.

⁴ Óir is ċuici a ṫéann na treiḃeanna, mar tá, treiḃeanna an Tiarna: go dtuga siad fianaise dʼIosrael, go dtuga siad buíoċas dʼAinm an Tiarna.

⁵ Óir is inti a ḃíos caṫaoir an ḃreiṫiúnais: is é sin, ríċaṫaoir ṫeaġlaiġ Ḋáiḃí.

⁶ Déan guí ar son síoċána Iarúsalem: beiḋ an séan ar an dream a ṫug grá duit.

⁷ Go raiḃ an tsíoċáin faoi do ṁúrṫa: agus an ḟlúirse faoi do ḋúinte.

⁸ Ar son mo ḃráiṫre agus mo ċompánaċ: beiḋ mé ag guí an tséin duit.

⁹ As uċt tí an Tiarna ár nDia: beiḋ mé ag iarraiḋ do leasa.