Psailm 12 - An tSaltair nó Sailm Ḋáiḃí 1965 (Ó Cuinn)

Salm 12. Salvum me fac.

¹ Cuidiġ liom, a Ṫiarna, ó naċ ḃfuil fíréan fágṫa: ó ċuaiġ na fir ḟíora i laġad i measc Ṡíl Áḋaiṁ.

² Laḃraíonn gaċ duine díoṁaointeas lena ċoṁarsa: ní ḃíonn a mbéal aċ ag cur cluana, agus a gcroí cealgaċ ag cur i gcéill.

³ Scriosfaiḋ an Tiarna gaċ béal bréagaċ: agus an teanga a ḃíos ag maíoṁ an díomais;

⁴ Agus an dream a dúirt, Ġeoḃaiḋ ár dteanga an bua dúinn: tá cead cainte againn, cé atá ina Ṫiarna orainn?

⁵ Aċ anois ó naċ ḃfaiġeann an dearóil faoiseaṁ ó ḃuaireaṁ: agus ó bíonn na boċtáin ag osnaíl ó ċroí.

⁶ Éireoiḋ mé, a deir an Tiarna: agus fuasclóiḋ mé gaċ duine acu ón té éiríos ina aġaiḋ, agus taḃarfaiḋ mé suaiṁneas dó.

⁷ Is briaṫra glana iad briaṫra an Tiarna: mar an airgead a ġlantar den ċré, agus a aṫloisctear faoi ṡeaċt sa tine.

⁸ Coimeádann tú iad, a Ṫiarna: cuṁdóiḋ tú é ón aicme sin go bráċ.

⁹ Níl áit naċ ḃfuil faoi ċosa luċt an oilc: nuair a éiríos siad in airde, cuirtear masla ar ċlann na ndaoine.