Psailm 116 - An tSaltair nó Sailm Ḋáiḃí 1965 (Ó Cuinn)

Salm 116. Dilexi, quoniam.

¹ Tá mʼintinn lánsásta: gur éist an Tiarna le glór mo ġuí;

² Go dtug sé cluas dom: dá ḃrí sin beiḋ mé ag glaoċ air ḟad agus a ṁairim.

³ Ḃí dola an éaga do mo ṫimpeallú: ḃí pianta ifrinn ag fáil greama orm.

⁴ Ḃí mé faoi ṫuirse agus faoi ṫroime ċroí, agus ġlaoiġ mé ar Ainm an Tiarna: A Ṫiarna, impím ort go ḃfuascla tú mʼanam.

⁵ Is fial fíréanta an Tiarna: is ag ár nDia atá an trócaire.

⁶ Cuṁdaíonn an Tiarna na daoine simplí: is é a ċuidiġ liom, agus mé i mbuaireaṁ.

⁷ Bíoḋ suaiṁneas ort arís, a ṁʼanam: ó ṫug an Tiarna luaíoċt duit.

⁸ Agus cad ċuige? Dʼḟuascail tú mʼanam ó ḃás: mo ṡúile ó ḋeora, agus mo ċosa ó ṫitim.

⁹ Siúlfaiḋ mé i láṫair an Tiarna: ar ṫalaṁ na mbeo.

¹⁰ Ċreid mé, agus laḃróiḋ mé dá ḃrí sin; aċ ba ṁór é mo ḃuaireaṁ: ṫug mé deifir orm á rá, Is bréagaċ iad na daoine go léir.

¹¹ Conas a ċúiteoiḋ mé leis an Tiarna é: ar son a ndearna sé de ṁaiṫ orm?

¹² Glacfaiḋ mé corn an tslánaiṫe: agus glaofaiḋ mé ar Ainm an Tiarna.

¹³ Coṁlíonfaiḋ mé mo ṁóideanna anois i láṫair a ṗobail uile: is lánluaċṁar bás a naoṁ i súile an Tiarna.

¹⁴ Féaċ orm, a Ṫiarna, atá i mo ṡeirḃíseaċ agat: is mé do ṡeirḃíseaċ, mac do ċuṁaile; réab tú mo ċuiḃreaċa ó ċéile.

¹⁵ Tairgfiḋ mé duit íobairt an ḃuíoċais: agus glaofaiḋ mé ar Ainm an Tiarna.

¹⁶ Coṁlíonfaiḋ mé mo ṁóideanna don Tiarna, faoi ṡúile a ṗobail go léir: i gcúirteanna tí an Tiarna, agus i do ċeartlár, a ċaṫair Iarúsalem. Molaigí an Tiarna.