Psailm 115 - An tSaltair nó Sailm Ḋáiḃí 1965 (Ó Cuinn)

Salm 115. Non nobis, Domine.

¹ Ní dúinne, a Ṫiarna, ní dúinne, aċ is dod Ainmse is dual an molaḋ: as uċt do ṫrócaire ġráṁaire, agus as uċt dʼḟírinne.

² Cad ċuige a ndéarfaiḋ na págánaiġ: cá ḃfuil a nDia san anois?

³ Ós ag tráċt ar ár nDia é, is ar neaṁ atá sé: níl ní dár ṫaitin leis naċ ndearna sé.

⁴ Níl ina n‑íola aċ airgead agus ór: agus obair láiṁe daoine.

⁵ Bíonn béil orṫu, aċ ní laḃraíonn siad: bíonn súile ina gcinn, aċ ní ḟeiceann siad.

⁶ Bíonn cluasa orṫu, aċ ní ċluineann siad: bíonn sróna orṫu, aċ ní ṁoṫaíonn siad aon ḃolaḋ.

⁷ Bíonn láṁa acu, aċ ní láiṁsíonn siad; bíonn cosa acu, aċ ní ṡiúlann siad: ní mó a laḃraíonn siad as a sceadamán.

⁸ Bíonn luċt a ndéanta mar iad: agus is ionann cás dá dtéann ina muinín.

⁹ Aċ cuir tusa, a ṫeaġlaiġ Iosrael, do dóċas sa Tiarna: is é a gcúnaṁ agus a gcrann cosanta é.

¹⁰ A ṫeaġlaiġ Áróin, cuirigí ḃur ndóċas sa Tiarna: is é a gcúntóir agus a gcosantóir é.

¹¹ An dream darb eagal an Tiarna, cuir ḃur ndóċas sa Tiarna: is é a gcúntóir agus a gcosantóir é.

¹² Ċuiṁniġ an Tiarna orainn, agus beannóiḋ sé sinn: beannóiḋ sé féin teaġlaċ Iosrael, beannóiḋ sé teaġlaċ Áróin.

¹³ Beannóiḋ sé an dream darb eagal an Tiarna: idir ḃeag agus ṁór.

¹⁴ Beiḋ siḃ do ḃur síorṁéadú ag an Tiarna: siḃ féin agus ḃur gclann in ḃur ndiaiḋ.

¹⁵ Is siḃ an drong ar ḃeannaiġ an Tiarna siḃ: cruṫaiṫeoir neiṁe agus talaiṁ.

¹⁶ Is leis an Tiarna na neaṁa ar fad: ṫug sé an talaṁ don Áḋaṁċlann.

¹⁷ Ní ḃíonn na marḃáin do do ṁolaḋ, a Ṫiarna: ná an dream a ṫéann síos ċun tosta.

¹⁸ Aċ molfaimidne an Tiarna: feasta agus go bráċ. Molaigí an Tiarna.