Psailm 113 - An tSaltair nó Sailm Ḋáiḃí 1965 (Ó Cuinn)

Salm 113. Laudate, pueri.

¹ Molaigí an Tiarna, a ṡeirḃísiġ: bíoḋ Ainm an Tiarna á ṁolaḋ agaiḃ.

² Beannaítear Ainm an Tiarna: feasta agus go bráċ.

³ Bítear ag molaḋ Ainm an Tiarna: ó éirí go dul faoi na gréine.

⁴ Is ard an Tiarna os cionn na náisiún uile: is ard a ġlóir os cionn na neaṁ.

⁵ Cé is cosúil leis an Tiarna ár nDia, a ḃíos ina ċónaí in Airde: agus a ḃíos á ísliú féin le féaċaint ar a ḃfuil ar neaṁ agus ar talaṁ?

⁶ Tógann sé an duine simptí as deannaċ an ḃóṫair: agus ardaíonn sé an boċtán as an lábán;

⁷ Go gcuire sé i measc na bprionsaí é: ar ċoṁċéim le prionsaí a ṗobail.

⁸ Tugann sé lán tí de ṁuirín don ḃean aimrid: go ndéanfaiḋ sé máṫair áṫasaċ áil di.