Psailm 111 - An tSaltair nó Sailm Ḋáiḃí 1965 (Ó Cuinn)

Salm 111. Confitebor tibi.

¹ Taḃarfaiḋ mé buíoċas leis an Tiarna ó iomlán mo ċroí: i measc na gcreidṁeaċ os íseal, agus i gcruinniú an ṗobail.

² Is mór iad oibreaċa an Tiarna: bíonn iarraiḋ orṫu ag an drong a ċuireas dúil iontu.

³ Is inṁolta inonóraiṫe a ṡaoṫar: maireann a ḟíréantaċt de ṡíor.

⁴ Rinne Tiarna trócaireaċ na ngrást a oibreaċa iontaċa ar an gcuma: go mba ċeart cuiṁne a ċoinneáil orṫu.

⁵ Ṫug sé bia don dream darb eagal é: ba ċuiṁin leis a ċonraḋ go deo.

⁶ Ṫaispeán sé cuṁaċt a oibreaċa dá ṗobal: go dtuga sé oiḋreaċt na bpágánaċ dóiḃ.

⁷ Is iad an ḟírinne agus an ceart iad oibreaċa a láṁ: is fíor iad a aiṫeanta go léir.

⁸ Seasann siad go daingean ċoíċe agus go deo: is de réir fírinne agus cirt a ḋéantar iad.

⁹ Ċuir sé fuascailt ċuig a ṗobal: dʼordaiġ sé a ċonraḋ go deo; is naofa oirṁinneaċ a Ainm.

¹⁰ Tús eagna eagla an Tiarna: is dea‑ṫuisceanaċ a ndéanann dá réir; maireann a ṁolaḋ go deo.