Psailm 110 - An tSaltair nó Sailm Ḋáiḃí 1965 (Ó Cuinn)

Salm 110. Dixit Dominus.

¹ Is é dúirt an Tiarna le mo Ṫiarna: Suiġ ar mo láiṁ ḋeas, go gcuire mé do naiṁde mar stól faoi do ċosa.

² Sínfiḋ an Tiarna slat do ċuṁaċta as Síón: bíoḋ an réim agat, go fiú i gceartlár do naṁad.

³ I lá tionóla do ṡlua beiḋ do ṁuintir á dtairiscint féin go deontaċ naoṁ‑ó‑mósaċ: beiḋ dʼógḟir mar ḋrúċt na maidine ann.

⁴ Ṫug an Tiarna mionn, agus ní ḃeiḋ aiṫreaċas air: Is sagart tú go síoraí de réir oird Ṁelcisadec.

⁵ Beiḋ an Tiarna ar do ṫaoḃ ḋeas: ag gonaḋ na ríṫe féin i lá a ḟeirge.

⁶ Taḃarfaiḋ sé breiṫiúnas i measc na bpágánaċ; beiḋ na háiteanna lán aige de ċoirp ṁarḃa: déanfaiḋ sé ḋá leaṫ de luċt ceannais na seaċt dtíorṫa.

⁷ Ólfaiḋ sé as an sruṫán ar an slí: dá ḃrí sin ardóiḋ sé a ċeann.