Psailm 103 - An tSaltair nó Sailm Ḋáiḃí 1965 (Ó Cuinn)

Salm 103. Benedic, anima mea.

¹ Mol an Tiarna, a ṁʼanam: agus molaḋ a ḃfuil ionam a Ainm naofa.

² Mol an Tiarna, a ṁʼanam: agus ná déan dearmad dá ṫíolaicí uile;

³ An té a ṁaiṫeas do ṗeaca uile: agus a leiġeasas do ḃreoiteaċta uile;

⁴ An té a ṡlánaíos do ḃeaṫa ó scrios: agus a ċuireas barr trócaire agus carṫanaċta ort;

⁵ An té a ṡásaíos do ḃéal le hollṁaiṫeas: do do ḋéanaṁ bríoṁar óg mar an iolar.

⁶ Cuireann an Tiarna an ḟíréantaċt agus an breiṫiúnas i ḃfeiḋm: don uile ḋuine dá mbíonn á ḃrú ag an éigeart.

⁷ Ṫaispeáin sé a ṡlite do Ṁaois: a oibreaċa do ċlann Iosrael.

⁸ Is lán an Tiarna de ṫrua agus de ṫrócaire: is fadḟulangaċ é, agus is mór a ṁaiṫeas.

⁹ Ní ḃeiḋ sé ag ceasaċt i gcónaí: ná ní ċoṫaíonn sé a ḟearg de ṡíor.

¹⁰ Ní ḋearna sé linn mar ṫuill ár bpeacaí: ná ní ṫug sé luaíoċt ár míġníoṁarṫa dúinn.

¹¹ Óir féaċ a airde agus atá an neaṁ os cionn an talaiṁ: ní mó é ná a ṫrócaire don dream darb eagal é.

¹² Féaċ fós a ḟad agus atá an aird ṫoir ón aird ṫiar: a ċoṁḟad sin a ċuir sé idir sinn agus ár bpeacaí.

¹³ Go deiṁin, mar ḃíonn trua ag an aṫair dá ċlann féin: is aṁlaiḋ bíonn trócaire ag an Tiarna don dream darb eagal é.

¹⁴ Óir is feasaċ dó an t‑áḃar as a ndearnaḋ sinn: is cuiṁneaċ leis naċ ḃfuil ionainn aċ deannaċ.

¹⁵ Ní ḃíonn laeṫanta an duine aċ mar an ḃféar: bíonn a ḃláṫ mar ḃláṫ an ṁaċaire.

¹⁶ Óir ċoṁ luaṫ agus a ṡéideas an ġaoṫ air, imíonn sé: agus ní aiṫneoiḋ a áit é feasta.

¹⁷ Aċ maireann maiṫeas trócaireaċ an Tiarna go saol na saol don dream darb eagal é: agus a ḟíréantaċt le haġaiḋ clann na clainne.

¹⁸ Le haġaiḋ luċt coimeádta a ċonarṫa: luċt cuiṁniṁ agus cleaċtaiṫe a aiṫeanta.

¹⁹ Tá a ċaṫaoir faoi réir ag an Tiarna ar neaṁ: agus níl ní naċ ḃfuil faoi réir a ríoċta.

²⁰ Molaigí an Tiarna, a aingeala an Tiarna is tréine cuṁaċt: a ċoṁlíonas a aiṫeanta, agus a ṫugann cluas do ġlór a ḃriaṫar.

²¹ Molaigí an Tiarna, a ṡluaite an Tiarna: a ṡeirḃísiġ an Tiarna a ḋéanas a ṫoil.

²² Molaigí an Tiarna, a oibreaċa uile an Tiarna, i ngaċ áit dá ḃfuil faoina réim: Mol an Tiarna, a ṁʼanam.