Cidziwiso 7 - ciNyungwe Bibliya

AIjirayeri dzana na makumi manai na manai ya bzulu (144.000)

¹ Bzatapita bzimwebzo ndidawona anju anai adaima mumagonyo manai (4) ya dziko la pantsi, akhaimisa mphepo za magonyo manaiyo (4), kuti aletse mphepo iri-yentse kumenya dziko la pantsi, nyandza ayai muti uli-wentse.

² Pamwepo, ndidawona anju munango akhakwira kucokera kumabva-dzuwa, akhana cidindo ca Mulungu wamoyo. Iye adalewa mwakukuwa kuna anju anai (4) omwe akhadapasidwa mphambvu kuti apfudze dziko la pantsi na nyandza,

³ akhambati: “Lekani kudzonga dziko la pantsi ngakhale nyandza napo miti, mpaka tiikhe mdindo pamikuma ya anyagirinya wa Mulungu wathu”.

⁴ Ndipo ndidabva mbogo ya omwe adaikhidwa mdindo: Dzana na makumi manai na manai ya bzulu (144.000), wa madzindza yentse ya aIjirayeri.

⁵ Wa dzindza la Juda adaikhidwa mdindo madzana khumi na mawiri (12.000), wa dzindza la Rubeni, madzana khumi na mawiri (12.000), wa dzindza la Gade, madzana khumi na mawiri (12.000),

⁶ wa dzindza la Aseri, madzana khumi na mawiri (12.000), wa dzindza la Nafitali, madzana khumi na mawiri (12.000), wa dzindza la Manase, madzana khumi na mawiri (12.000),

⁷ wa dzindza la Simiyau, madzana khumi na mawiri (12.000), wa dzindza la Levi, madzana khumi na mawiri (12.000), wa dzindza la Isakali, madzana khumi na mawiri (12.000),

⁸ wa dzindza la Zebuloni, madzana khumi na mawiri (12.000), wa dzindza la Zuze, madzana khumi na mawiri (12.000), wa dzindza la Benjamini, madzana khumi na mawiri (12.000).

Maso-mphenya ya mthithi ukulu

⁹ Bzatapita bzimwebzo ndidanyang'ana, ndiciwona mthithi ukulu patsogolo pangu omwe palibe angadakwanisa kuulewenga. Ukhali wa madziko yentse, madzindza yentse, mbumba zentse na bzirewedwe bzentse, ukhadaimirira patsogolo pa mpando wa umambo na pa Bira, ukhana bzakubvala bzicena ndipo ukhadaphata mithawi ya kanjedza.

¹⁰ Ndipo ukhambalewa mwakukuwa kuti: “Cipulumuso ni ca Mulungu wathu, omwe adakhala pa mpando wa umambo, ndipombo ca Bira”.

¹¹ Anju wentse akhadaimirira mwakuzungulira mpando wa umambo, akulu-akulu na bzamoyo bzinai (4). Iwo adagodama acitsulima patsogolo pampando wa umambo ndipo adapemba Mulungu,

¹² aciti: “Ameni! Kutumbiza na mbiri, udziwi, kutenda, utumbi, utongi na mphambvu bzikhale na Mulungu wathu kwakusaya kumala. Ameni!”

¹³ Pamwepo m'bodzi wa akulu-akulu adandibvundza kuti: “Mbani amwewa omwe adabvala bzicena, ndipo adacokera kuponi?”

¹⁴ Ndidatawira kuti: “Mbuya, imwe mun'dziwa”. Ndipo Iye adati: “Amwewa ndiwo adacokera kumabvuto makulu ndipo adafula bzakubvala bzawo acibzicenesa na mulopa wa Bira.

¹⁵ Ndipopo, “iwo ali patsogolo pa mpando wa umambo wa Mulungu ndipo ambamutumikira masikati na usiku pambuto yace yakucena. Ndipo ule omwe adakhala pampando wa umambo an'dzawakhocerera na cikumbi ca mapembo cace.

¹⁶ An'dzabva lini pomwe njala cipo, an'dzabva lini pomwe nyota cipo. An'dzamenyedwa lini na dzuwa, napo kubva kupsa,

¹⁷ nakuti Bira omwe ali pakati pa mpando wa umambo an'dzakhala M'busa wawo, Iye an'dzawatsogolera kuntsantsa za madzi yamoyo. Ndipo Mulungu an'dzapukusa misozi yentse m'maso mwawo”.