Yohani 9 - Tesitamenti Umupwa 1965

UYesu akumupozyʼumuntu wʼapafilwe she wuntonko

¹ Ilelo lwʼakutuha, pʼahagʼumuntʼuwantonko wʼapafilwe nayo.

² Pe vahamuvuzilizyʼavasundikwa vakwe vahati: Labi, unanu atazilʼamalandu nawuyo navapafi vakwe, shʼapafilwe nintonko?

³ AhamulʼuYesu ahati: Wope nawuyo atatazilʼamalandu navapafi vakwe vwelele. Nkandi imbombo zya Mulungu zilolehaje mumwakwe.

⁴ Iswe pakuti tuvombʼimbombo yʼuno wʼantumilʼine, lwe musanya. She vukwinzʼuvusiku, pe numo atalivomba mumwo.

⁵ Shinishi shima she ndi munsʼumu, pe ne luhozyo lwa nsi.

⁶ Ilelo lwʼayanzile linili, pʼahaswilʼamati pansi, ahahandanyʼintope namati, havili intopʼino ahamupaha muminso,

⁷ ahamuvuzya ahati: Valaga, ugeze mwidimi lya Siloha (lye likuti mutumilwa). Pʼahavala, ahageza. Havili ahinza shʼakwenya.

⁸ Avene lelo ve vapalamiye nawo ukuzenga nava ve vamuwenyi shima akulava iṿwa kulava vahati: Amwe ate wuyo wʼatendime, wʼalavagʼiṿwa kulava?

⁹ Vamo vahati: Wuyo. Avamwavo vahati: Ndali, wunji, vaholine vuholana. Uwene ahati: Nkwe nene.

¹⁰ Vahamuvuzya vahati: Aminso gaho gigusile vuli?

¹¹ Uwenʼahamula ahati: Umuntu we vakuti wʼuYesu ahahandanyʼintope, ahampaha muminso, ahambuzya ahati: Valaga kwidimi Siloha, ugeze. Ilelo lwe mbazile, lwe ngezile, pe nkenya.

¹² Avene vahati: Ali kwi uwene? Uwene ahati: Ntamanyile.

¹³ Pe vahamutwala AvaFalisayi umuntʼuno wʼali nintonko lulwo.

¹⁴ Apene nyene pali pe pisabati, lwʼuYesu ahandinyʼintope, lwʼamwiguyʼaminso.

¹⁵ Pe havili vope navaFalisayi vahamuvuzilizya vahati: Ganzite vuli ukwiguha aminso gaho? Uwene ahavavuzya ahati: Ambisilʼintope muminso, nkageza, ilelo pe nkwenya.

¹⁶ Pe vamo avaFalisayi vahati: Umuntʼuno atafumile kwa Mulungu, shʼatakusajilʼisabati. Avamwavo vahati: Inga mutalʼamalandu pʼangapelʼiṿimanyilo ṿiniṿi? Ilelo pe vahatapunkana mwe vavaliye.

¹⁷ Vahamuvuzya nohavili uwantonko vahati: Iwe shinishi shʼayiguyʼaminso gaho, pʼukuti wʼunanu? Uwene ahati: We mukuvwi.

¹⁸ Avenʼava-Yuda lelo vahasita nukwitiha ukuti ali wantonko, havili shinishi akwenya. Zihasila lwe visitʼavapafi vʼuno wʼayigusilʼaminso.

¹⁹ Ve vahavavuzilizya vahati: We mwana winyu we mukuti apafilwe nintonko? Akwenya vuli havili shinishi?

²⁰ Pe vahamula avenʼavapafi vakwe vahati: Tumumanyile ukuva we mwana witu, nukuti apafilwe nintonko.

²¹ Izyo nyene shʼakwenya shinishi, zye tutazimanyile. Nawuyo wʼamwiguyʼaminso wope tutamumanyile iswe. Mumuvuzilizyaje wuyo, shʼakuzile, avavuzyʼuwene izyakwe.

²² Izyene zinizi nyene zye vahayangʼavapafi vakwe, she vahogopagʼavaYuda. ShʼavaYuda vitinkine vatili: Inga wokʼumuntu akumwitiha akuti we wʼuChilisiti, we tumufumwe musinagogi.

²³ Zye zizyo avapafi vakwe vahati akuzile mumuvuzilizye wuyo.

²⁴ Pe vahamwitʼulwa vuvili umuntu wʼali wantonko vahamuvuzya vahati: UmushindishʼuMulungu. Shʼiswe tumanyile umuntʼuno ukuva mutalamalandu.

²⁵ Uwenʼahamula ahati: Manyi, inga mutalamalandu. Imanyile hoka hanaha ine, ukuti nali ne wantonko, nkandi shinishi pe nkwenya.

²⁶ Pe vahamuvuzya vahati: Atili vuli nawe? Akwiguye vuli aminso?

²⁷ Ahavamula ahati: She mbavuzizye lwe lutanzi, nkandi mutahiṿwa. Mukwanzʼukwiṿwa zinizi havili? Ingavanga namwe mukwanza ukuyipelʼukuva mwe vasundikwa vakwe?

²⁸ Vahamuligʼavene vahati: We musundikwa wʼula wenewe, iswe swe vasundikwa va Mose.

²⁹ Iswe tumumanyile ukuti uMulungu ayanzile nawʼuMose, nkandʼuno tutamanyile kwʼafumile.

³⁰ Uwenʼumuntu ahamula ahavavuzya ahati: Zye zya kusukumila nkani, she mutamanyile kwʼafumile nashenga aniguliyʼaminso.

³¹ Iswe tumumanyilʼuMulungu ukuti avatalamalandu atakuvatejelezya ndali, nkandʼuno wengʼamumanyilʼuMulungu ukuti wengʼakuvomba zyʼakasime wuyo, we wuyo wʼakumutejelezya.

³² Ukufuma pala pʼipezilwʼinsi numo atiṿuye ukuti alipʼumuntu wʼayiguyʼaminso ga wantonko wʼapafilwe nayo.

³³ Wope numuntʼuno apele atafumile kwa Mulungu, nkandi atakupela naṿimo.

³⁴ Vahamula vahamuvuzya vahati: We wapafilwe nuvutalamalandu nzila, we ukutusambilizya wenewe? Pe vahamufumwa kunzi.

³⁵ UwenʼuYesu ahiṿwa ukuti vamufumizye kunzi, lwʼahomana nawo pʼahati: Iwe umwitisilʼuMwanamuntu?

³⁶ Uwenʼahamula ahati: Wunanu lelo, Mwene, ukuti imwitihaje?

³⁷ UYesu ahamuvuzya ahati: Umuwenyi, uno wʼakuyanga nawe we wuyo.

³⁸ Uwene ahati: Nkwitiha Mwene. Pʼahamusugamilila.

³⁹ PʼuYesu ahayanga ahati: Munsʼumu mwe ninzile ukuti ndonje, ve vatakwenya ukuti venyaje, ve vakwenya ukuti vavanje vantonko.

⁴⁰ Zye vahiṿwa vamo avaFalisayi ve vali nawo, vahamuvuzya vahati: Amwe naswe swe vantonko?

⁴¹ UwenʼuYesu ahavavuzya ahati: Inga mupele mwe vantonko, pe nkandʼamalandu mute nago. Shinishi nyene she mukuti tukwenya, pʼamalandu ginyu gakusyala namwe.