Yohani 7 - Tesitamenti Umupwa 1965

UYesu navanine avanayuli

¹ Pisinda pazinizi pʼuYesu ahazyungula mu-Galilayi. Shʼatakasimʼukuzyungula mu-Yudayi, shʼawenyi avaYuda vakuti vamugoje.

² Ilelʼuchaka wa vaYuda uwa mutusansa apalamiye.

³ Pʼavamwavo vahayanga nawo vahati: Yepaga panapa, uvale mu-Yudayi, vope navasundikwa vaho ukuti venyelezyajʼimbombo zyaho zyʼukuvomba.

⁴ She numʼumuntu atakuvomba nahamo kukwilu lwʼakuti nkumushe mwonti. Ilelʼinga zyʼukuvomba zinizi pʼuyilolesye nazyo kunsi yonti.

⁵ She nave vanine vope vatahamwitihaga.

⁶ UwenʼuYesu ahavavuzya ahati: Ahavalilizyo hane hashili. Ahavalilizyo hinyu nyene amanda gonti halipo.

⁷ Imwe insi yitamanyilʼukuvapata, nkandʼine yimpasite, she nkuyihomeshezya ukuti imbombo zyakwe zye mbivi.

⁸ Imwe simuzuve muvale kuchaka. Ine ntakuzuva, mukuvala kuchakʼuno, shʼisiku lyanʼine lishilʼukufiha.

⁹ Lwʼavavuzya linili pʼuwene ahasyala mu-Galilayi suti.

¹⁰ Afinzile lelo avamwavo lwe vasogoye, pe wope ahazuva ukuvala kuchaka. Atahajendʼapazelu, nkandi fwe ngati kukwilu.

¹¹ Avene lelo avaYuda vahamwanza pachaka vahati: Ali kwi we wʼula?

¹² Zihava zye nyinji nkani izya kunongʼonelana avantʼimpuga yonti lwe vakumuyanjila wuyo. Vamo vahati: She mwinza. Avamwavo vahahana vahati: Ha, nkwʼakupuṿwʼavantu.

¹³ Atalipo numo uwa kuziyanjilʼapazelu zinizi, she vahogopagʼavaYuda.

UYesu akusambilizya mu-Yelusalemu ukuti afumile kwa Mulungu

¹⁴ Afinzile lelo pahati pachaka, pʼuYesu ahazuva ukuvala mwa tempeli, mwʼahasambilizya.

¹⁵ PʼavaYuda vahasukumila, vahati: Umuntʼuno azimanyile vuli inongwa zya mwa kalata, she numo atamusambilizizye nalumo?

¹⁶ PʼuYesu ahamula ahavavuzya ahati: Inongwa zye nkuvavuzyʼine zite zyane nene ndali, zya wuyo wʼantumilʼine.

¹⁷ Uno wengʼakuti mbombe zizyo zyʼakasime Wuyo, wʼakuzimanyʼinongwa zye nkuvavuzyʼine kwe zifumile, ukuti inga zifumile kwa Mulungu, inga nashe zyane nene.

¹⁸ Uno wengʼakuyanga zye zyakwe zyʼayasite, wʼakuyanzilʼulushindiho lwakwe wuyo akuti vanchindishe. Nkandʼuno wengʼakuti imushindishe wuyo wʼantumile, we wa nalyoli uwene, nuvugombanu vute navumo mumwakwe.

¹⁹ Amwʼatavapiyʼinkomelezyo uMose? Ilelo shinishi namwe numʼatakusajilʼinkomelezyo zinizi. Shonu mukwanzʼukungoga?

²⁰ Pe vahamulʼavantu vahati: Jezile uli nishipena. Unanu wʼakwanzʼukukugogʼiwe?

²¹ AhamulʼuYesu ahati: Mbomvilʼimbombo yoka vwelele, mwenti mukusukumila.

²² Yenyi, uMose avapiyʼamiho aga kuvolwa uvuvolwa, —agene gatafumile kwa Mose ndali, gafumile kuvatata va lulwo—, lelo umuntu mukumuvola napisabati.

²³ Apene lelo umuntu ingʼakuposhelʼuvuvolwa napisabati, she mukuti inkomelezyo zya Mose tutavindule, pe mwatinji mundonje lelʼine shʼimuzuzuvushizizyʼumuntu wonti pisabati?

²⁴ Mutalonje mwe zivaliye kuminso ginyu ndali, nkandi simulonje mwe zili.

²⁵ Pe vamo ava mu-Yelusalemu umu vahayanga vahati: Amwe ate uno we vatili tumugoje wununo?

²⁶ Lelo, yenyi akuyangʼapazelu, nkandʼavene vatakuyanga nalimo kukwakwe. Vamumanyile ingavanga shinishi avapiti ukuti we wʼuChilisiti wununo?

²⁷ Havili uwene wununo nyene she tumumanyile kwʼafumile. NkandʼuwenʼuChilisiti inga lumo ingʼakwinza pe numo atalimanya kwʼafumile.

²⁸ PʼuYesu ahavilishila mwa tempeli lwʼakuvasambilizya ahati: Mumanyile nkanʼine, mumanyile nakwe mfumile. Havili ntinzile nene neka ndali, alipo nyene wʼantumilʼine we wa nalyoli, wuyo imwe mutamumanyile.

²⁹ Nkandʼine imumanyile, she mfumile kukwakwe, nukuntuma antumile wuyo.

³⁰ Pe vahati tumuleme. Havili ahasova numo uwa kuti agolosyajʼamahono ukumulema, shʼashili wuyo pahavalilizyo hakwe.

³¹ Nkandʼavinji ava mumpugʼumu vahitiha. Ve vakuti: Apene lelo, ingʼuwenʼuChilisiti akwinza, pe amwe alilusyʼumuntʼuno ukupelʼiṿimanyilo iṿwinji?

³² PʼavaFalisayi vahiṿwa zye vakumuyeva avantʼimpuga yonti. Pe navashiputʼavapiti navaFalisayi vahatumʼavanyamata vavo ukuti vamuleme.

³³ PʼuYesu ahati: Shinishi sutʼine pe tukuva swenti hansi namwe, inga pe nkuvala kuli wuyo wʼantumilʼine.

³⁴ Mulinanzagʼine, nkandi mutalinaga nakumo. She kwe nkuvalʼine, kwe mutalifiha imwe.

³⁵ PʼavaYuda vahavuzilizanya vahati: Akuvala kwi wununo, shʼakuti mutalinaga? Ingavangʼakuti mbale kuvamwitu ve vasavaliye muva-Giliki nukuvasambilizyʼavaGiliki?

³⁶ Akutaha shonu shʼakuti: Mulinanzaga, nkandi mutalinaga, nashʼakuti: Kwe nkuvalʼine, kwe mutalifiha imwe?

Aminzi amapelavulanzi

³⁷ Apene pisiku lya kuvumalilizyo vwa chaka ipiti, pʼuYesu ahimilila pupo, ahavilishila ahati: Uno wengʼayumilwʼaminzi, wʼayinze kukwane, angʼwele.

³⁸ Uno wengʼanitisilʼine, wʼamajenje ga minzʼamalanzi galiduvuha muhati mumwakwe, inza she lilyo ayanzile nukalata.

³⁹ LyʼahatahagʼuMupepo we vinze vamuposhelaje ve vamwitisile, shʼuMupepo ashili, shʼuYesu ashili ukwinjila muvupiti uvumwamu.

⁴⁰ Pʼavantu ava mumpuga mumwo, ve viṿuyʼamazwi gʼahayangʼuYesu, vamo vahati: Nalyoli jezile we mukuvwi wununo.

⁴¹ Vamo vahati: We wʼuChilisiti. Nkandi vamo vahati: Ilelo mwʼakufuma mu-Galilayi lelʼuChilisiti?

⁴² Amwʼuwenʼukalata atakuti: uChilisiti akufuma mumavanda ga Davidi, akuti: Akufuma munkaya ya mu-Betelehemu mwʼahavangʼuDavidi?

⁴³ Mwe munumu avantu mwe vavaliye impuga vahatapunkana kuli wuyo.

⁴⁴ Vamo vahati: Tumuleme, havili ahasova numo uwa kugolosyʼamahono ukuti amuleme.

⁴⁵ Pe vahavalʼavanyamata kuvashiputʼavapiti nakuvaFalisayi. Pʼavene vahati: Mutamulesite shonu?

⁴⁶ Vahamulʼavanyamata vahati: Numʼumuntu atayanzile nalumo inza shʼumuntu wununo akuyanga.

⁴⁷ PʼavaFalisayi vahavamula vahati: O, namwe ingavanga mupuṿile?

⁴⁸ Amwe alipo lelo wokʼumupiti, amwe alipo wokʼumuFalisayi wʼamwitisile?

⁴⁹ Ge mantu ganaga gene, ge gatamanyilʼinkomelezyo ge gatifilwe.

⁵⁰ UwenʼuNikodemo wʼavazile kwa Yesu pavusiku, wuyo wope ali wamwavo muvusongo wʼahavavuzya ahati:

⁵¹ Amwe inkomelezyo zyitu zikulonga nzilʼumuntu lwe mushili ukutejelezya izyakwe zyʼakuyangʼuwene, lwe mushili ukumanya zyʼavomṿile?

⁵² Avene vahamula vahamuvuzya vahati: Ingavanga nawe ufumile mu-Galilayi? Yenyelezyaga nawʼuyenye, shʼumukuvwi atakufuma nalumo mu-Galilayi.

⁵³ Pe vahasavalila, vahavala Uno munkaya yakwe, uno munkaya yakwe.