Yohani 5 - Tesitamenti Umupwa 1965

Uwampungo pidimi lya mu-Betesida

¹ Pisinda pazinizi pʼahavʼuchaka woka wa vaYuda. Wope nuYesu ahazuva, ahavala mu-Yelusalemu.

² Ilelo mwe mu-Yelusalemu pashikwilo sha ngʼonzi, pe lilipʼidimi, izina lyakwe munjango ya shiHebuli vakuti Betesida. Lili lyali namavanza gasano.

³ Mwe valambalayʼavantʼavinji nkani, avavinu navantonko navalemazu nave vakunyanyʼumuvili [vahagulililagʼaminzi ukuyinga.

⁴ Shʼuhavizya ahihaga mumanda mumanda, ahinjila mwidimi, ahaṿwalanganyʼaminzi. Ilelʼuno wengʼatalisilʼukwinjila muminzi lwe ganzitʼukuṿwalangana, wʼahazuzuvuha impungo yonti yengʼali nayo].

⁵ Ilelo pupo pʼalʼumuntu wʼalinzite nimpungo yakwe amaha amashumi gatatu namahʼumunana pupo.

⁶ UwenʼuYesu ahamwenya shʼalambalaye pupo, ahamanya ukuti adiliye nkani pupo, pʼahamuvuzilizya ahati: Ukasimʼukuzuzuvuha iwe?

⁷ Pʼumuvinu ahamula ahati: Mwene, she nte nawo numʼumuntu uwa kuti ambishe mwidimi lwʼaminzi ganzitʼukuṿwalangana. Apene nyene lwe nkuvala neka, pe nkwagʼuwunji atalisile anchizile.

⁸ PʼuYesu ahati: Vuhaga, sendagʼishilili shaho, ujendaje.

⁹ Pʼumuntʼuno ahazuzuvuha pupo, ahasendʼishilili shakwe, ahajenda. Apene nyene pali pe pisabati umusanya wuyo.

¹⁰ PʼavaYuda vahamuvuzyʼumuntʼuno wʼazuzuvusile vahati: She pe pisabati shinishi, mwiho ukunyatulʼishilili shaho.

¹¹ Uwenʼahavavuzya ahati: Umuntʼula wʼanzuzuvushizizye, wʼambuzizye atili: Sendagʼishilili shaho, ujendaje.

¹² Avene vahamuvuzilizya vahati: Wʼunanʼumuntu wuyo wʼakuvuzizye atili: Sendaga, ujendaje?

¹³ Uwenʼumuntʼuno wʼazuzuvusile atamumanyile ukuti wʼunanu, shʼuYesu ayefile pe pala, she valʼavantʼimpuga pupo.

¹⁴ Ulwa pisinda uYesu ahamwaga mwa tempeli, ahamuvuzya ahati: Yenya, uzuzuvusile shinishi, uyandaje lelo, utahavuyizyaje ukutalʼamalandu, zitahakwinzilʼimpiti nakulʼizi.

¹⁵ Pʼahavalʼumuntʼuno, ahavavuzyʼavaYuda ukuti wʼuYesu wʼamuzuzuvushizizye.

¹⁶ Mwe mumwo avaYuda vahamuṿwimʼuYesu, shʼavomṿile zinizi pisabati.

¹⁷ UwenʼuYesu ahavamula ahati: UTata ine avomṿile afisile kushinishi uku. Nane she nkonzizye, nane nkuvomba.

¹⁸ Lye lilyo vahonjezyʼavaYuda ukuti tumugoje, she vatili: Atatazile uno weka uwa kuvindulʼisabati ndali, ayonjezizye nilya kuti uMulungu we wʼuYise, ilelo mwe munumu kwe kuvʼakuti nkoline nuMulungu ine.

UYesu akulondovola ṿwʼakumusuvilʼuYise

¹⁹ PʼuYesu ahamula ahavavuzya ahati: Nalyoli lyoli, nkuvavuzyʼine nkuti: UMwana atamanyilʼukuvomba nimʼiyakwe wuyo, yiyo nyene yengʼamuwenyi akuvombʼuYise, ye yiyo akuvomba wope. She yonti yengʼakuvomba wuyo, ye yiyo wope nawe Mwana akuvomba.

²⁰ ShʼuYise amukunzitʼuMwana, mwe mumwo akumulanganizya yonti yengʼakuvomba. Havili alimulanganizya nizinjʼimbombo impiti nakulʼizi zye muwenyi, izya kwinzʼukuvasukumizyʼimwe.

²¹ Shʼinza shʼuYise akuzyusyʼavafwe, akuvapʼuvulanzi, shʼahonzizye wope nawe Mwana, akuvapʼuvulanzi vonti vengʼakasimʼukuvapa.

²² ShʼuYise atakulonga numʼumuntu ndali, vwontʼuvulonzi amulesheye we Mwana,

²³ vontʼukuti vamunyilajʼuMwana inza she vakumunyila nawe Yise. Shʼuno wengʼatakunyilʼuMwana, wʼalesile ukumunyila nawe Yise wʼamutumile.

²⁴ Nalyoli lyoli nkuvavuzyʼine nkuti: Uno wengʼakwiṿwʼizwi lyanʼine nukumwitiha wuyo wʼantumilʼine, wʼali navwo uvulanzi vwa shimashima, wʼatakufiha pilonjelwi, nkandi apoye muvufwe, ayinjiye muvulanzi.

²⁵ Nalyoli lyoli nkuvavuzyʼine nkuti: Hakwinzʼahavalilizyo, hafisile nashinishi, pʼavafwe valiyiṿwʼizwi lya Mwana wa Mulungu, ilelo vonti venga viṿuye valandite.

²⁶ Shʼinza shʼuYise muhatavulanzi wuyo, shʼamupiye vovulo wope nuMwana ukuti avanje muhatavulanzi wope.

²⁷ Gope namaha ga kulonga amupiye, she Mwanamuntu uwene.

²⁸ Zye mutaganduhaje zinizi, she hakwinzʼahenʼahavalilizyo, pe vontʼava ve vali mumbipa valiyiṿwʼizwi lyakwe,

²⁹ pe valifuma, avene ve vahavombaga zye nyinza ve valizyushila kuvulanzi, avene nyene ve vahavombaga zye mbivi ve valizyushila kwe kulongwa.

Uvwahome vwa kumuhomeshezyʼu Yesu

³⁰ Ine ntamanyilʼukuvomba nahamʼahane nene neka. Lwe nkulongʼamalandu ine, pe nkulonga mumwo mwe niṿuye nane. Mwe munumu nazye nkulonga ngolosu vwelele, she ntakwanza zye nkasime nene ndali, nkwanza zizyo zyʼakasime wuyo wʼantumilʼine.

³¹ Inga nayihomeshezyaga nene neka, pe nkandi uluhomeshezyo lwane lute lwa nalyoli.

³² Alipʼuwunji nyene wʼakunkomeshezyʼine, nane manyile ukuti uluhomeshezyo lwakwe lwʼakunkomeshezyʼine lwe lwa nalyoli.

³³ Imwe mwatumile kwa Yohani, pʼuwene ahahomeshezyʼizya nalyoli.

³⁴ Nkandʼine ntakuposhelʼuluhomeshezyo lwa muntu ndali, nkandi nkuvavuzya zinizi ukuti mupone namwe.

³⁵ Uwene ali nyale yʼikwaha ikuhozya. Nkandʼimwe mwasungwʼukwizya hamo mululangalilo lwakwe.

³⁶ Nkandʼine ndi nalwʼuluhomeshezyʼulupiti nakulwa Yohani: Imbombo zyʼampiyʼuTata zyʼatili uzimalilizyaje. Zye mbombʼizi zye nkuvombʼine, zye zikunkomeshezyʼine, zikunjanga ukuti antumilʼuTata ine.

³⁷ Wope nawe Tata wʼantumilʼine, wʼankomeshezizye. Imwe nyene izwi lyakwe mutiṿuye nalumo, nishati shakwe mutawenyi.

³⁸ Lyope nizwi lyakwe lye likusyelemetela muhati mumwinyu mute nalyo, shʼuno wʼamutumilʼuwene, we mutakumwitiha.

³⁹ Mukwanza muvakalata, she mukuti mwe tukuvwagʼuvulanzi vwa shimashima, she vuvo vakunkomeshezyʼine.

⁴⁰ Havilʼimwe mukusitʼukwinza kukwane ukusendʼuvulanzi.

⁴¹ Ine ulushindiho ntakuposhela kuvantu.

⁴² Imwe nyene mbamanyilʼine ukuti ishikunzi sha Mulungu mute nasho muhati zyinyu.

⁴³ Ine ninzile mwizina lya Tata, nkandi mutakuntangana. Uwunji ingʼakwinza mwizina lyakwe wuyo we mulimutangana.

⁴⁴ Mwe mwitihaje vuli mwe mukushindinkana ulushindiho mwe vuvo vatupu, nkandi ulwenʼulushindiho lwa kwa Mulungu, wuyo wʼali woka mwene, lwe mutakulwanza?

⁴⁵ Mutatinji ingavanga nkuvalonjelela nene kwa Tata ndali; alipʼuwene wʼalivalonjelela, we wʼuMose we mukumusuvila imwe.

⁴⁶ Inga mwamwitihagʼuMose, pe nkandi mukunitiha nane, shʼuwene azisimṿile zye zikunjanga ine.

⁴⁷ Apene nyene inga mutakwitiha nave vakalata vakwe, pe mwati mwitishe vuli amazwi ge nkuyangʼine?