Yohani 4 - Tesitamenti Umupwa 1965

UYesu numwantandʼuMusamaliya

¹ IlelʼuMwene lwʼavawenyi avaFalisayi ukuti viṿuye ilya kuti: UYesu alusizye nawe Yohani ukuṿuzyʼavasundikwa nukuvozyʼavantu,

² —uwenʼuYesu atahavozyaga ndali, nkandi vahavozyaga ve vasundikwa vakwe—,

³ pʼahepa mu-Yudayi, ahavala mu-Galilayi nohavili.

⁴ Uwene we pakuti atushe mu-Samaliya.

⁵ Ilelo ahafiha munkaya yoka mu-Samaliya ye vatili Sihali izina, yʼipalamiye kunsi yʼuYakobu amupiyʼumwana wakwe uYosefu.

⁶ Ilelo pe shali pupo ishifula sha Yakobu. Ayazile lelʼuYesu alisite mwidala, pʼahatendama pashifula pupo, pali pe pahavalilizyo ha mutanda.

⁷ Pe wokʼumwantanda uwa mu-Samaliya ahinzʼukutapʼaminzi. PʼuYesu ahayanga nawo ahati: Nampa gamo, ngʼwele.

⁸ Shʼavasundikwa vakwe vavazile munkaya ukukalʼiṿwa kulya.

⁹ Pʼuwenʼumwantanda umuSamaliya wuyo ahamuvuzya ahati: We muYuda ukulava vulʼaminzi aga kungʼwela kulʼine ne mwantanda umuSamaliya? (ShʼavaYuda vatakwizya navaSamaliya.)

¹⁰ UwenʼuYesu ahamula ahamuvuzya ahati: Upele washimanyile ishikunjilwa sha Mulungu, upele wamumanyile nuno wʼakuyanga kukwaho shinishi akuti: Nampa gamo, ngʼwele, pe nkandi ulaṿile wenewe kukwakwe, uwene pe nkandi akupiyʼaminzi amalanzi wuyo.

¹¹ Pʼahamulʼumwantanda ahati: Mwene, nishitapilo ute nasho iwe, nishifula ishi shiviye. Gakufuma kwi lelo aminzi amalanzi gʼukutaha?

¹² Ulusizye utata Yakobu uvupiti iwe, wʼatupiyʼishifulʼishi, we wope ahangʼwelaga shinishi, vope navana vakwe, ṿwope niṿwuma vwakwe?

¹³ PʼahamulʼuYesu ahati: Vonti ve vakungʼwelʼaminzi ganaga, vakuvuyizyʼukwumilwa nohavili.

¹⁴ Nkandʼuno wengʼakungʼwelʼaminzi genga nkumupʼine, wʼataliyumilwa nalumo ndali, aminzi gugo ge nkumupʼine, ge gakuyipelʼukuvʼishiduda sha minzi mumwakwe, ge gakuduvuha gakuvalʼukufiha nakuvulanzi vwa shimashima.

¹⁵ Pʼumwantanda ahamuvuzya ahati: Mwene, gʼumpanje nane aminzi ganaga, ntavanje nishinyoto havili, nane ukuti ntinzaje panapa ukutapa.

¹⁶ UwenʼuYesu ahamula ahati: Valaga, umwitʼumulume waho, uyinze panapa.

¹⁷ Uwenʼumwantanda ahamulʼahati: She nte numwanaṿuli numo. UYesu ahamuvuzya ahati: Ulovosizye, shʼutili nte numwanaṿuli numo.

¹⁸ She wali navo avalume vaho vasano, wʼuli nawo shinishi wʼate mulume waho. Mwe munumu ulovosizye, uyanzile izya nalyoli.

¹⁹ Pʼumwantanda ahati: Mwene, shinishi nkumanyile we mukuvwi.

²⁰ Avatata iswe vahaputaga pigambʼili, imwe mwe vaYuda mukuti mwe mu-Yelusalemu mwe mwa kuputa mumwo.

²¹ PʼuYesu ahamuvuzya ahati: We mwantanda, unitihaje, hakwinzʼahavalilizyo huho, pe kwa Tata mutaliputa napigamba linili namu-Yelusalemu.

²² Imwe muluputo mukushindiha she mutashimanyile, nkandʼiswe muluputo tukushindiha she tushimanyile. Shʼuvwenʼuvuposhi vukufuma muvaYuda.

²³ Ahenʼahavalilizyo nyene he hakwinza, nashinishi halipo, pe vonti ve vakuputa imputo zya nalyoli ve valiputa kwa Tata namwa Mupepo wa muhati namuzya nalyoli. She wope nuTata akwanza ukuti vavanje vovulo venga vakuputa kukwakwe.

²⁴ UwenʼuMulungu Mupepo, vonti lelo ve vakuputa kukwakwe ve pakuti vaputaje namwa Mupepo wa muhati namuzya nalyoli.

²⁵ Umwantanda ahamuvuzya ahati: Nane manyile ukutʼakwinzʼuMesiya, we vakuti wʼuChilisiti. Inga lumo ingʼayinzile wuyo, pʼuwene alituvuzya zyonti.

²⁶ PʼuYesu ahamuvuzya ahati: Nkwe nene, ne nkuyanga nawe.

²⁷ Ilelo vahafishila lilyo avasundikwa vakwe. Vahasukumila lwe vazile akuyanga numwantanda. Nkandi numo atahamuvuzilizya ukuti: Ukwanzʼishonu? amwe: Wayanganaga shonu nawo?

²⁸ Pʼumwantanda ahayileha pupʼinsonta yakwe, ahavala munkaya. Ahavavuzyʼavantu ahati:

²⁹ Nzagaji, mwenyʼumuntu wʼambuzizye gonti ge ntazile. Amwe ate wʼuChilisiti wuyo?

³⁰ Pe vahafuma munkaya, vahavala kwʼali.

³¹ Pahavalilizyo huho avasundikwa vakwe vahamulambilizya vahati: Labi, lyanga.

³² Uwene ahamula ahati: Ine ndi niṿintu ṿwa kulya ṿwe mutaṿimanyilʼimwe.

³³ Avenʼavasundikwa vakwe vahavuzilizanya vahati: Amwʼumuntu ayinzile ukumupʼiṿwa kulya?

³⁴ UwenʼuYesu ahavavuzya ahati: Vwe ṿintʼine ṿwa kulya, inga nkuvomba zizyo zyʼakasime wuyo wʼantumilʼine, inga nkumalilizyʼimbombo yakwe.

³⁵ Amwe mutakuyanga namwe ukuti gasyayʼamezi gane imṿunʼukwinza? Yenyi lelo ine nkuvavuzya nkuti: Simwinulʼaminso ginyu, mwenyʼamagunda, she gazelufile, gafisile kumṿuno shinishi.

³⁶ Uno wʼakuṿuna akuposhelʼamalipilo, ukuvunganiha insanga, akuziviha kuvulanzi vwa shimashima. Ve vavili ukuti vaseshelaje poka, nawe mupesi nawe muṿuni.

³⁷ She munumu mwe likuloleha ukuva lya nalyoli izwi lye likuti: Wamwavo wʼakupesa, havili wamwavo wʼakuṿuna.

³⁸ Imwe mbatumile ukuti muṿunaje huho he mutavomṿile. Ukuvomba kwe vavomṿilʼavanji, imwe mwinjiye mumbombo yavo.

³⁹ AvaSamaliya va munkaya mumwo vahitiha ve vinji ve vamwitishiye lye lizwi lya mwantanda lyʼatili: Ambuzizye zyonti zye mbomṿile.

⁴⁰ Ilelo avaSamaliya vanava ve vavazile kwʼali vahamulambilizya ukudila kumwavo. Pʼahadila kukwo amanda gavili.

⁴¹ Pe vahaṿula, vahalusya uvwinji ve vitisile pizwi lyakwe wuyo.

⁴² Pe vahamuvuzyʼumwantanda vahati: Shinishi tutakwitiha shʼutuvuzizye iwe ndali, shinishi pe twiṿuye, pe tuwenyi sweneswe ukuti nalyoli Muposhi wa nsi wununo.

UYesu akumupozya umwanʼumwanaṿuli wa muhombe wa mwene mu-Galilayi

⁴³ Lwe gashilinkinʼamanda gavili ganaga, pʼahavuha ukuvala mu-Galilayi.

⁴⁴ She wopʼuYesu ahahomeshezya ukuti umukuvwi numʼumuntu atakumutima kumwavo kwʼakuliye.

⁴⁵ Ilelo lwʼafiha mu-Galilayi, pʼavaGalilayi vahamutanganʼahinza, she vaziwenyi zyonti zyʼapezile mu-Yelusalemu pachaka. She vope vavazile kukwo pachaka.

⁴⁶ Pʼahavuyizyʼukuvala mu-Kana munsi ya mu-Galilayi, mwʼagaluyʼaminzi lihavʼipele lya mampensya. Mwʼalʼumuhombe wa mwene, wʼumwana wakwe umwanaṿuli avinile, mu-Kapelinahumu.

⁴⁷ Wʼahiṿwʼukuti uYesu afumile mu-Yudayi, ayinzile mu-Galilayi umu, pʼahavala kwʼali, ahamulambilizya ukwiha nukumuzuzuvushizya umwana wakwe. Shʼasyaye pansi ukufwa.

⁴⁸ UwenʼuYesu ahamuvuzya ahati: Imwe inga mutakwenya iṿimanyilo namayele pe mutakwitiha.

⁴⁹ Uwenʼumuhombe ahati: Mwene, uyishe lwʼashilʼukufwa umwana wane.

⁵⁰ PʼuYesu ahati: Valaga, umwana waho mupuma. Pʼumuntʼuno ahava nulwitiho mwizwʼili lyʼuYesu ayanzile kukwakwe, ahavala.

⁵¹ Ilelo lwʼakwiha, pʼavanyamata vakwe vahahomana nawo, vahati: Umwana waho mupuma.

⁵² Uwenʼahavavuzilizya ahati: Ayanzitʼukuzuzuvuha pahavalilizyo vuli? Avene vahamuvuzya vahati: Inzegema yamulesile mavwila pahavalilizyo ha vusano na vuvili.

⁵³ Pʼuyise wa mwana ahamanya ukuti pe pahavalilizyo huho hʼuYesu ayanzile kukwakwe atili: Umwana waho mupuma. Pʼahitiha ninyumba yakwe yonti.

⁵⁴ She shimanyilo sha vuvili shʼuYesu apezile lwafumile mu-Yudayi, lwʼavazile mu-Galilayi.