Yohani 3 - Tesitamenti Umupwa 1965

Akupangʼipangwi nuNikodemo

¹ Ilelo alipo wokʼumuntu wa vaFalisayi, izina lyakwe ali wʼuNikodemo, umupiti muvaYuda.

² Wʼahavala kwa Yesu pavusiku ahati: Labi, tukumanyile ukuti we Musambilizi wʼafumile kwa Mulungu, she numo atakupelʼiṿimanyilo ṿiniṿi ṿwʼukupelʼiwe ingʼuMulungu ate nawo.

³ PʼuYesu ahamula ahati: Nalyoli lyoli nkuvavuzya ine nkuti: Umuntu ingʼatakupapwa havili pʼakupotwa Ukwenya ishinamwene sha Mulungu.

⁴ UwenʼuNikodemo ahamuvuzya ahati: Apapwaje vuli umuntu, lwʼagosifile? Ingavanga avuyile havili ukwinjila muhati mwa nyina pʼajende nukupapwa?

⁵ AhamulʼuYesu ahati: Nalyoli lyoli nkukuvuzyʼine nkuti: Umuntu ingʼatakupapwa nakuminzi nakwa Mupepo, pʼakupotwa ukwinjila mushinamwene sha Mulungu.

⁶ Uno wengʼamupafile we muvili, wope we muvili vwelele, Uno wengʼamupafile we Mupepo, wope we Mupepo vwelele.

⁷ Zyʼutagandushe zye nkuvuzizye ntili pakuti mupapwaje havili.

⁸ Yenya, inkungu ikuṿugula mwonti mwʼikasimʼiyene. Izwi lyakwe lyʼukwiṿwa we muntu, nkandi nakwʼifumile nakwʼikuvala utamanyile ndali. Yenya lelo she vali vovulo vonti vʼavapafilʼuMupepo.

⁹ PʼuNikodemo ahamula ahamuvuzya ahati: Zye zipelwaje vulivuli zinizi?

¹⁰ UwenʼuYesu ahamula ahamuvuzya ahati: We musambilizi wenewe muvana-Yisilayili, nkandi Zyope nazinizi utazimanyinsinye?

¹¹ Nalyoli lyoli nkukuvuzyʼine nkuti: Iswe tukuyanga zizyo zye tumanyile, tukuhomeshezya zye tuwenyi. Havilʼimwe uluhomeshezyo lwitu mutakuluposhela.

¹² Izyene lelo inga nazye zya munsʼumu zitakuvaholʼimwe, pe zyinze zivahole vuli lelo izya kumwanya inga zye nkuti imbavuzye?

¹³ Numo atalisile nalumo kumwanya, nkandi wuyo wʼayisile wʼafumile kumwanya, uMwanamuntu, wʼali kumwanya.

¹⁴ Inza shʼuMose ahimiha injoha mulwugwa, she pakuti wope nawe Mwanamuntu ayimishilwaje vovulo,

¹⁵ vonti ve vakumwitiha ukuti vatatupulwaje ndali, nkandi vavwajʼuvulanzi vwa shimashima.

¹⁶ Uwene shʼahonzizye vovulʼuMulungu ukukundʼinsi, kwe kuyipʼuMwana wakwe woka mwene imozi, vonti ve vakumwitiha ukuti vatatupulwaje ndali, nkandi vavwajʼuvulanzi vwa shimashima.

¹⁷ ShʼuMulungu atamutumilʼuMwana wakwe munsʼumu ukuti alonjʼinsi, nkandi ukuti aposhʼinsi.

¹⁸ Uno wengʼakumwitiha wʼatakulongwa, nkandʼuno wengʼatakumwitiha wʼalonzilwe, shʼasisitʼukwitiha izina lya Mwana wa Mulungu wʼali woka mwene imozi.

¹⁹ Uvu vwe vulonzi, shʼuluhozyo lwinzile munsʼumu, shʼavenʼavantu vahasyoshelʼuluhozyo, vahamanyana nishisi, shʼimbombo zyavo zyalʼimbivi.

²⁰ She vonti ve vakunanga zimo, avene vakupatʼuluhozyo, vatakuvala kuluhozyo, she vakuti: Ingavanga twaje lukuzimenelezya zye tuvomṿile.

²¹ Avene nyene ve vakuvomba izya nalyoli, avene vakuvala nakuluhozyo, she vakuti zilolehaje zye vavomṿile ukuti vazivomṿile mwe mwa Mulungu.

Umwozyi akupitilizyʼukumuhomeshezyʼu Yesu

²² Pisinda pazinizi pʼuYesu ahavala munsi ya mu-Yudayi navasundikwa vakwe. Mwe vahadila, ahozya.

²³ UwenʼuYohani wope ahozyaga mu-Enoni kupipi namu-Salimu, shʼaminzi galʼaminji mumwo. Avantu vahamusogolela, vahozelwa.

²⁴ ShʼashilʼuYohani ukwigalilwa mujela.

²⁵ Pʼamadali gahanda navasundikwa va Yohani navaYuda pazya kuzelufwa.

²⁶ Vahajenda kwa Yohani vahamuvuzya vahati: Labi, umuntʼula we wali nawo isyila lila lya Yolidani, ula wʼuhamuhomeshezya, yenya, wope akuvozyʼavantu, vonti vakumwinzila.

²⁷ AhamulʼuYohani ahati: Numʼumuntu atakuyisendela naṿimo weka ṿwʼatapelilwe ukufuma kumwanya.

²⁸ She mukunkomeshezya namwe ukuti njanzile: Nte ne Chilisiti nene, nkandi ntumilwe kwilongolela kukwakwe wuyo.

²⁹ Uno wengʼali numuzinjilwa we muhatamushi. Uwene nyene umwimazi wa musendamwantanda ingʼakwimilila, ingʼakwiṿwa lwʼakuyangʼumusendamwantanda, wʼakuseshela nkani lwʼakwi-ṿwʼizwi lya musendamwantanda. Uluseshelo lunulu lwe nsesheye nane, nikusi lelo.

³⁰ Uwene we pakuti aṿulaje, ine nyene pakuti imṿilaje.

³¹ Wuyo wʼafumile kumwanya, wʼali pamwanya pali vonti. Wuyo nyene wʼafumile munsʼumu we wa munsi, Zyope nazyʼakuyanga zya munsi vwelele. Uwene wuyo wʼafumile kumwanya, wʼali pamwanya pali vonti.

³² Uwene nazizyo zyʼawenyi nazizyo zyʼayiṿuye zyʼakuzihomeshezya. Havili numʼumuntu atakuluposhela uluhomeshezyo lwakwe.

³³ Uno wengʼakuziposhela zyʼakuhomeshezyʼuwene, wʼayipezilʼukuva shimanyilo sha kumanyila mumwo ukuti uMulungu we wa nalyoli.

³⁴ Shʼuno wengʼuMulungu amutumile, wʼakuyanga ge mazwi ga Mulungu. She lwʼakumupʼumuntʼuMupepo atakumupa pashilinjilo.

³⁵ UYise akunzitʼuMwana, ṿwonti amupiye mumuhono wakwe.

³⁶ Uno wengʼamwitisilʼuMwana, wʼali navwʼuvulanzi vwa shimashima. Nkandʼuno wengʼakusufwʼuMwana, wʼataliyenya uvulanzi ndali, vwe vuhalazu vwa Mulungu vwe vukulinda papakwe.