Yohani 2 - Tesitamenti Umupwa 1965

Uvusendelo mu-Kana

¹ Pisiku lya vutatu vuhavʼuvusendelo mu-Kana ya muGalilayi. Wopʼunyina wa Yesu ahava pupo.

² Wope nuYesu navasundikwa vakwe vavisite kuvusendelo.

³ Ilelo lwe vasovilʼipele lya mampensya pʼunyina wa Yesu ahamuvuzya ahati: Vatali nipele.

⁴ UwenʼuYesu ahamula ahati: Tuli vuli nane nawe, we mwantanda? Shʼahavalilizyo hane hashili.

⁵ Uwenʼunyina ahavalʼukuvavuzyʼavaletaṿintu ahati: Zyenga mwazile akuvavuzya, zye muvombaje.

⁶ Ilelo zyali pupʼinsonta umutanda izya minzi, vavisile pupo izya kutapilʼaminzi aga kwozya, she mwe galʼamiho ga vaYuda. Zimo zyali paṿilinjilo ṿivili, zimo paṿitatu.

⁷ PʼuYesu ahavavuzya ahati: Mwizuzye aminzi munsontʼizi. Pe vahazyizuzya nkani.

⁸ Pʼahavavuzya ahati: Mutape lelo, mumutwalilʼumugavanyaṿintu. Pe vahamutwalila.

⁹ Uwenʼumugavanyaṿintu ahatomʼaminzi ge gayipezilʼukuvʼipele lya mampensya. Uwene nyene atamanyile kwe lifumile (valimanyile ve valetaṿintu ve vatafilʼaminzi). Ahamwitʼumusendamwantanda,

¹⁰ ahamuvuzya ahati: She vontʼavantu vakutaliha ukuvavishilʼavamwavo ipele lya mampensya lye lyinza, apene lelo penga vahozilwe pe vakuleta ilyolo. Iwe nyene wazyisilʼilyinza, uyinzilʼukuliṿumbula shinishi vovulo.

¹¹ She shimanyilo sha kutaliha muṿimanyilo ṿwa Yesu, ahashipela mu-Kana munsi ya mu-Galilayi. Mwʼahalolesyʼuvupiti vwakwe, navasundikwa vakwe vahamwitiha.

¹² Ulwa pisinda pe vahiha ukuvala mu-Kapelinahumu nawuyo nunyina navanino navasundikwa vakwe, vahadila mumwo amanda mansi vwelele.

Ukuzelufwʼutempeli

¹³ Ilelo wope nuPasa wa vaYuda ali papipi, pʼuYesu ahazuva ukuvala mu-Yelusalemu.

¹⁴ Mwe mutempeli ahaga nava ve vahakazyaga ninkambaku ningʼonzi ninkunda nava ve vahatananyagʼimpiya.

¹⁵ Pʼahasendʼamajila, agenʼahapintanya, ihava mfwimbo. Pʼahavashimbizya vonti mwa tempeli, nazye ngʼonzi, nazye nkambaku, navatananyampiya, nimeza zyavo ahazibenula.

¹⁶ Avene ve vahakazyagʼinkunda, vʼahavavuzya ahati: Simuzisende, mufume nazyo kunzi. Inyumba ya Tata ye ndali ukuyigalula ukuvʼinyumba ya kukalila mumwo.

¹⁷ Mwe munumu avasundikwa vakwe vahakumbuha izwi lye lisimṿilwe mwa kalata, lye likuti: Uvwahayikungule vwa kunyumba yaho vulindya nzila.

¹⁸ Ilelo pʼavaYuda vahamwamula vahati: Ukutupelelʼishimanyilo vuli she shikuti uli we wa kuvomba hanaha?

¹⁹ UwenʼuYesu ahamula ahati: Mumongolʼitempeli ino, pe muliyaga mbomṿilʼamanda gatatu vwelele ukuyizenga nohavili.

²⁰ PʼavaYuda lelo vahamuvuzya vahati: Ve vahazengagʼitempeli ino, vazenzilʼamaha amashumi gane namaha umutanda, havili iwe ulivombʼamanda gatatu vwelele ukuyizenga?

²¹ Uwene nyene ahatahagʼitempeli ya muvili wakwe.

²² Ulwa pisinda lelo lwʼazyusile kuvafwe, pʼavasundikwa vakwe vahakumbuha ukuti lye lila lyʼahayangaga napala, pʼavene vahitiha nizya mwa kalata, nazyʼayanzilʼuYesu.

²³ Ilelo lwʼali mu-Yelusalemu pachaka wa Pasa, pe vahalyitiha ve vinji izina lyakwe, lwe vawenyi iṿimanyilo ṿwʼahaṿipela.

²⁴ UwenʼuYesu nyene ahasita nukuvitiha avene, shʼuwenʼavamanyile vonti,

²⁵ havili atahenyaga kumuntu numo ukuti ahomeshezyaje izya vantu, shʼahavangʼazimanyile wuyo zyenga zili muhati mumuntu.