Yohani 16 - Tesitamenti Umupwa 1965

¹ Zye mbavuzizye zinizi, she nkati zitavanje nazimo izya kuvapunuzyʼimwe.

² Valivafumwa namumasinagogi gavo. Havili hakwinzʼahavalilizyo, pe vontʼava ve vakuvagogʼimwe valisiva ukuti: TukumuvombelʼuMulungu imbombo.

³ Zye valivombaga zinizi, she nuTata vatamumanyile, nane vatamanyile.

⁴ Zinizi mbavuzizye ukuti lwe hinzilʼahavalilizyo aha kwinzila zinizi, pe muzikumbuhaje ukuti zye zizyo mbavuzizye. Ntavavuzizye zinizi ukufuma pavwando, she pe twali swenti nane.

⁵ Shinishi pe nkuvala kulʼuno wʼantumilʼine, havilʼimwe numo atakumbuzilizya ukuti: Ukuvala kwi?

⁶ Nkandi she mbavuzizye zinizi, pʼamoyo ginyu gizuye nulusungamo.

⁷ Nkandi nkuvavuzya izya nalyoli nkuti: Pe mukuva mwe vinza inga nkuvala. Shʼinga natinji nsitʼukuvala, pe nawe Mwimizi ate ayinze kumwinyu, nkandʼinga nkuvala, pe nkumutumʼuwene kumwinyu.

⁸ Ilelo lwʼayinzilʼuwene pʼinsi aliyimenelezya nuvutalamalandu nuvugolosu nukulongwa.

⁹ Kuvutalamalandu she vatakunitihʼine.

¹⁰ Kuvugolosu she nkuvala kwa Tata ine, she mutalinenya havili,

¹¹ Kukulongwa shʼumuhatansi yinino alonzilwe.

¹² Ndi nazyo zisyayʼinyinji izya kuvavuzyʼimwe, nkandi suti shinishi pe zivapositʼukuzyaganya.

¹³ Nkandi lumo, ingʼayinzile wuyo, we Mupepo wa nalyoli, pʼalivalongolela kwilongolela wuyo, alivinjizya muvwanalyoli vwonti. Shʼuwene ataliyituma weka ukuyanga ndali, nkandi zizyo zyʼakwiṿwa aliziyanga, uwenʼalivavuzyaga zizyo zye zikwinza.

¹⁴ Uwenʼalimpangʼuvupiti ine, shʼalisenda muzyanʼine, zyʼalivavuzyʼimwe.

¹⁵ Zyonti zyʼali nazyʼuTata zyane nene. Mwe mumwo nkuti: Uwenʼakusenda muzyanʼine zyʼalivavuzya imwe.

Amazwi ga kuvalaga

¹⁶ Pasyaye pansi pe mutakundola, havili pasyaye pansi pe mukundola.

¹⁷ Pe vamʼavasundikwa vakwe vahavuzilizanya vahati: She shonu shʼakutuvuzya ukuti: Pasyaye pansi pe mutakundola, havili pasyaye pansi pe mukundola? Nalyʼukuti: She mbusilʼukuvala kwa Tata?

¹⁸ Vahati: She shonu shikuti: Pasyaye pansi? Tutazimanyilʼiswe zyʼakuyanga.

¹⁹ UwenʼuYesu ahamanya ukuti vakasimʼukumuvuzilizya, pʼahavavuzya ahati: Zye mukuvuzilizanya zye ntili: Pasyaye pansi pe mutakundola, havili pasyaye pansi pe mukundola?

²⁰ Nalyoli lyoli nkuvavuzyʼine nkuti: Imwe mulikuta, mulilosya, iyenʼinsi nyene yʼiliseshela. Imwe mulisungama, nkandʼulusungamo lwinyu luligalunkana, luliyipelʼukuva luseshelo.

²¹ Uwenʼumwantanda lwʼamakupapʼumwana, pʼakusungama, shʼayazile hinzilʼahavalilizyo hakwe, nkandʼingʼapafilʼumwana, pʼatakukumbuha amayimba, shʼakuseshela kumuntʼuno wʼapafilwe munsʼumu.

²² Namwe shinishi she muhonzizye vovulo mukusungama, nkandi mulindola nohavili, pʼamoyo ginyu galiseshela, ilelʼulwenʼuluseshelo lwinyu lunulu lwe numo atalisompola kumwinyu.

²³ Umusanya wuyo pe mutalimbuzilizya nalimo. Nalyoli lyoli nkuvavuzyʼine nkuti: Zyonti zyenga kwa Tata mukulava zyʼalivapanga mwizina lyanʼine.

²⁴ Ukwinzʼukufiha kushinishʼuku pe mutalaṿile nazimo izya kulavila mwizina lyanʼine. Shinishi mulavaje pe mukuposhela, pe lwope nuluseshelo lwinyu lukuvalʼukuyipelʼukuva lwa vwila.

²⁵ Zinizi nkayanjila mumivi ukuvavuzyʼimwe. Hakwinzʼahenʼahavalilizyo, pe valiyanga mumivi zyenga nkuvavuzyʼimwe, pe ndivavuzyʼapazelu izya Tata.

²⁶ Umusanya wuyo pe mulilava mwizina lyane, nkandʼine ntakuti: Pe ndivalavila kwa Tata.

²⁷ She wuyo we Tata wope avakunzitʼimwe, she munkunzitʼine, kavili mwitisile ukuti mfumile kwa Mulungu ine.

²⁸ Mfumile kwa Tata ine, ninzile munsʼumu, havili nkuleha insi, nkuvala kwa Tata.

²⁹ Pʼavasundikwa vakwe vahayanga vahati: Yenya, nkadi shinishi pʼukuyangʼapazelu, utakuyanga nazimo izya kuyanga mumivi.

³⁰ Twamanya lelo ukuti umanyile zyonti, pakuti numo atakuvuzilizyaje suti. Mwe tukwitishila mumwo lelo ukuti ufumile kwa Mulungu.

³¹ PʼahavamulʼuYesu ahati: Amwe mukwitiha shinishi?

³² Yenyi, hakwinzʼahavalilizyo, nukwinza kwe kuva hinzile, pe vakuvanyampanyʼimwe, woka woka mnnkaya yakwe, ine mukundeha neka. Nkandi ntakuva neka ndali, shʼuTata ali nane.

³³ Zinizi zye mbavuzizye nzila, she nkuti muve muvwaje mumwanʼuvwihalo. Munsʼumu mwe mukuva namayimba, nkandi mujimbaje, she njipositʼine insi.