Yohani 11 - Tesitamenti Umupwa 1965

UYesu akumuzyusyʼuLazali kuvafwe

¹ Wokʼumuntu avinile, uLazali wa mu-Betaniya, ye nkaya mwe vasamiye avaMaliya numukulu wakwe uMalita.

² UwenʼuMaliya uno, we wuyo wʼahamupahaga namafuta uMwene, wʼahamusyumula muṿinama ṿwakwe ninsisi zyakwe. Ali we munine wa Lazali wʼavinile.

³ Pʼavanine va muvinu vahatuma kukwakwe vahati: Mwene, yenya, wʼumukunzite avinile.

⁴ UwenʼuYesu lwʼayiṿuye pʼahati: Impungo yakwe ino ite ya kumugoga ndali, nkandi ya kukumusya mumwʼuvupiti vwa Mulungu, wope nawe Mwana wa Mulungu mwʼavonehaje uvupiti.

⁵ UwenʼuYesu nyene wʼakunzite ava-Malita numuzuna wakwe nuLazali.

⁶ Ilelo lwʼayiṿuyʼukuti avinile, pe suti ahadila amanda gavili pʼali.

⁷ Inga pʼahavavuzyʼavasundikwa vakwe ahati: Shushi, tuvale mu-Yelusalemu nohavili.

⁸ Pʼavasundikwa vakwe vahati: Labi, shʼavaYuda vatili tumutinzʼamavwe shinishi, havili kwʼukuvala?

⁹ AhamulʼuYesu ahati: Amwe utuvalilizyo twa musanya woka tute ishumi natuvili? Umuntu ingʼakujenda shamusanya, pʼatakupunula, shʼakwenyʼuluhozyo lwa nsi yinino.

¹⁰ Nkandʼumuntu wengʼakujenda pavusiku, pʼakupunula, she luhozyo lute mumwakwe.

¹¹ Ahayanga vovulo, napisinda pʼahavavuzya ahati: ULazali uwamwitu akasitʼutulo, kwe nkuvala she nkuti imudamusyaje.

¹² Pʼavasundikwa vakwe vahati: Mwene, ingʼakasitʼutulo, pʼakwʼapole.

¹³ UwenʼuYesu atasile kwe kufwa, nkandʼavene vahati ingavanga akutaha ukukatʼutulo.

¹⁴ PʼuYesu ahavavuzyʼapazelu ahati: ULazali afuye.

¹⁵ Nkuseshelʼine kumwinyu she ntalipo kwa Lazali, mwe nkuti pe muliyitiha lelo. Shinishi nyene pe shushi tuvale kukwakwe.

¹⁶ PʼuToma we vatili we lipasa, ahayanga kuvasundikwa avamwavo ahati: Shushi, tuvale nawo, tuhafwile poka nawo.

¹⁷ Lwʼafiha uYesu pʼahaga akasitʼamanda gane mumbipa.

¹⁸ Iyenʼinkaya ya mu-Betaniya yali papipi nuYelusalemu fwe ngati mayili zivili.

¹⁹ Pe vahavalʼavinji avaYuda pavaMalita nuMaliya, vahati tulosye navʼilosyo lya pamunine wavo.

²⁰ UMalita lwʼayiṿuye ukuti uYesu ayinzile, pʼahavalʼukumutangana. UwenʼuMaliya ahasyala munyumba.

²¹ PʼuMalita ahayanga nuYesu ahati: Mwene, upele walipʼiwe, pe nkandi atafuyʼumunine witu.

²² Havili nashinishi pe manyilʼine ukuti zyonti zyengʼukulava kwa Mulungu, uMulungu akukupa.

²³ UwenʼuYesu ahamuvuzya ahati: Umunine winyu alizyuha.

²⁴ UwenʼuMalita ahamula ahati: Kwe nane manyile ukuti alizyuha lwe valizyuha vontʼavantu pisiku lya pampelela.

²⁵ PʼuYesu ahati: Ne kuzyuha ne vulanzi nenene. Uno wengʼanitisilʼine, wʼakulandila nashengʼakufwa.

²⁶ Havili vonti venga vakunitiha ve vakulandila, vatalifwa nalumo. Amwe ukwitiha zinizi?

²⁷ Pʼahamuvuzya ahati: Ena Mwene. Nkwitiha ukuti we Chilisiti iwe, we Mwana wa Mulungu wʼakwinza munsʼumu.

²⁸ Ilelo lwʼayanzile linili, pʼahavala ukumwitʼuMaliya umuzuna wakwe kukwilu ahati: Umusambilizi alipo, akukwita.

²⁹ Uwene lwʼayiṿuye pʼahavuha luvilo luvilo, ahavala kukwo kwʼali.

³⁰ UwenʼuYesu wʼashili ukufiha muhaya, sutʼalipo pupo pʼahomine nuMalita.

³¹ AvenʼavaYuda ve vali nawo munyumba ukumupumilizya, lwe vazilʼuMaliya akuvuha luvilo luvilo akufuma kunzi, pe vahamulandata vahati: Ingavangʼakuvala kumbipa akuti ndosye kukwo.

³² UwenʼuMaliya lelo lwʼafisile pʼalʼuYesu, lwʼamuwenyi, pʼahamugwila kuṿinama, ahamuvuzya ahati: Upele walipʼiwe, pe nkandi atafuyʼumunine witu.

³³ UwenʼuYesu lwʼamuwenyi akulosya vope navaYuda ve vamusindishiye ukuti vakulosya, pʼahaṿitwa muhati ahayinga.

³⁴ Pʼahati: Mumuvisile mwoshi? Avene vahamuvuzya vahati: Mwene, nzagaga, uyenye.

³⁵ PʼuYesu ahakutʼamansozi.

³⁶ PʼavaYuda vahati: Musukumile, ṿwʼamukunzite.

³⁷ Vamo nyene vahati: Uno wʼayiguyʼaminso ga wantonko ula, ali nishonu ukupelʼukuti atahafwe wununo?

³⁸ PʼuYesu havili ahaṿitwa muhati, pʼahafiha kumbipa. Iyene yalʼininga, vavisilʼivwe kushilyango.

³⁹ PʼuYesu ahati: Musegusyʼivwe. PʼuMalita umunine wakwʼuno wʼafuye ahati: Mwene, shinishi pʼakununka, shʼakasitʼamanda gane.

⁴⁰ UwenʼuYesu ahamuvuzya ahati: Ine ntakuvuzizye ukuti ingʼukwitiha pʼungenyʼuvupiti vwa Mulungu?

⁴¹ Pe vahasegusyʼivwe. UwenʼuYesu ahenyelezyʼaminso kumwanya ahati: Wasalipa we Tata, shʼuntejelezizye.

⁴² Ine manyile ukuti ukuntejelezya shima, nkandi nkuyanga pe pavantu vanava ve vimiliye iva, she nkuti vope vitishe ukuti untumilʼiwe.

⁴³ Ilelo lwʼayanzile linili, pʼahavilishila izwʼipiti ahati: Lazali fuma.

⁴⁴ Pʼahafuma uno wʼafuye, ali namenda ge vamupinyile muṿinama namunyove aga kumusyilila. Kwope nakusheni vamupinyilʼumwenda wa matwinsi. PʼuYesu ahavavuzya ahati: Mumusatule avalaje.

Avashiputʼavapiti vakwanza Izya kumugogʼuYesu

⁴⁵ Vamʼavinji avaYuda ve vinzile kwa Maliya, lwe vamuwenyi avomṿile zinizi, pe vahamwitiha.

⁴⁶ Vamo nyene vahavala AvaFalisayi vahavavuzya zyʼahavomba.

⁴⁷ Pe navashiputʼavapiti navaFalisayi valivunganiha uluhomano lwa vahombe, vahayangana vahati: Tutuvuli nawo lelo, shʼumuntʼuno akupelʼiṿimanyilo iṿwinji.

⁴⁸ Inga tukumuleha vovulo, pe valimwitiha vontʼavantu, ilelo pʼavaLoma valitwinzila ukufwula ninsi navantu.

⁴⁹ Pe woka uwamwavo uKayifa, wʼali washiputʼumupiti umwaha wuyo, ahavavuzya ahati: Imwe mutazimanyile nazimo.

⁵⁰ Kwope nukukumbuha mutakukumbuha ukuti pe tukuva swe vinza iswe, ingʼumuntu woka akuvafwilʼavantu, ukuti lutalovaje uluho lwonti.

⁵¹ Izyene zinizi zyʼatiluye weka ndali, nkandi shʼali washiputo umwaha wuyo, pʼahakuvwa ukuti uYesu akuvʼakuvafwilʼavantu uluho lwonti,

⁵² havili te luho lunulu vwelele, nkandi ukuti avavunganishe poka avana va Mulungu ve vasavaliye mwonti mwonti.

⁵³ Pe valitaliha umusanya wuyo lelo ukuyangana izya kuti tumugojʼuwene.

⁵⁴ UwenʼuYesu atahajendʼapazelu munsi ya vaYuda ndali, uwene ahavala munsi yʼipalamine nulwugwa, ahavala munkaya ye vakuti Efulemu izina, pʼahadila navasundikwa vakwe.

⁵⁵ Ilelʼuwenʼuchaka wa Pasa wa vaYuda apalamiye. Ilelo pʼavantu avinji va munsi vahazuva ku-Yelusalemu ukuyizelufwa lwʼashilʼuchaka wa Pasa.

⁵⁶ Ve vahanzʼuYesu. Vahavuzilizanya lwe vimiliye mwa tempeli vahati: Vulʼimwe, jezile nalyoli atakwinza pachaka wununo?

⁵⁷ Avene nyenʼavashiputʼavapiti navaFalisayi vahomelezizye vatili inga woka awenyi kwʼali wʼatuṿumbulile, tumuleme.