Yohani 10 - Tesitamenti Umupwa 1965

Umudimʼumwinza

¹ Nalyoli lyoli nkuvavuzyʼine nkuti: Uno wengʼatakutuha mushilyango ukwinjila mwiviji lya ngʼonzi, uno wengʼakupongola paluvazu, we mwiva, we mfumfu.

² Nkandʼuno wengʼakutuha mushilyango ukwinjila, we mudimangʼonzi wuyo.

³ Wʼakumwigulila numusungashilyango, Zyope ningʼonzi zikwiṿwʼizwi lyakwe. Izyenʼizyakwe ingʼonzi zyʼakuzyita namazina, akuzifumwa.

⁴ Ilelo lwʼazifumizye ingʼonzi zyakwe zyonti, pʼakuzilongolela kwilongolela. Ilelo pʼingʼonzi zikumulandata, she zimanyilʼizwi lyakwe.

⁵ Uwa vwelele we zitakumulandata ndali, zikumushimbila, she zitamanyilʼizwi lya va vwelele.

⁶ Zyʼahayanga mwe mumivi uYesu zinizi lwʼakuvavuzya, avene nyene vahapotwa ukuzyaganya zyʼahavapanjilaga.

⁷ PʼuYesu ahayanga ahati: Nalyoli lyoli nkuvavuzyʼine nkuti: Ne shilyango sha kungʼonzi nenene.

⁸ Vonti ve vatalisile kwilongolela kukwane ukwinza vali viva, vali mfumfu, izyene ingʼonzi nyene zihasitʼukuviṿwa.

⁹ Ne shilyango nenene. Uno wengʼalituha mumwane ukwinjila, wʼalipona. Uwene aliyinjila, alifuma, nilisyo alilyaga.

¹⁰ Uwenʼumwiva lwʼakwinza pʼakuti nivaje, mbolaje, nangaje mpela vovulo. Nkandʼine ninzile ukuti zivanje nuvulanzi, ukuti zitangalilwe ṿwonti.

¹¹ Ne mudimi umwinza nenene. Uwenʼumudimʼumwinza akuzifwilʼuvulanzi vwakwe ingʼonzi zyakwe.

¹² Uwenʼuwamwone nyene, wʼate mudimʼuwene, wʼingʼonzi zite zyakwe wuyo, wʼakwagʼimpumpi yinzile, pʼakutagʼizyene ingʼonzi, akushimbila. Ilelo pʼimpumpi yikwinza ukulema ingʼonzi, nukuzinyampanya.

¹³ Uwene akushimbila she wamwone vwelele, shʼatakuziviha mumwoyo ingʼonzi akuti zyashi.

¹⁴ Ne mudimi umwinza nenene. Nane nzimanyile izyane, havili Zyope zyane zimanyilʼine,

¹⁵ inza she wope nuTata amanyile, havili nane imumanyilʼuTata. Nuvulanzi vwane nkuziswila ingʼonzi.

¹⁶ Zyope nizinji ingʼonzi ndi nazyo, zye zite zya mwiviji linili. Zyope pakuti nzilete. Zyope zilimanyʼizwi lyane, pe likuva lidimilo lyoka lyene numudimi woka mwene.

¹⁷ Zye zizyo ankunzitʼine uTata, shʼuvulanzi vwane nkuvutaga ukuti ninze mbusende nohavili.

¹⁸ Numo atakuvufwula kukwane ndali, nkuvutaga nene neka. Ndi namaha ga kuvutaga, ndi namaha ga kuvusenda nohavili. Zye zizyo andajizizyʼuTata zinizi.

¹⁹ PʼavaYuda vahatapunkana nohavili pamazwi ganaga.

²⁰ Vamʼavinji mwe vavaliye vahati: Ali nimpepʼimbivi, umwoyo akumupota. Mukumwiṿwa shonu?

²¹ Avamwavo vahati: Amazwi gʼakuyanga gate ga mpepʼimbivi ndali. Yope nimpepʼimbivi amwʼimanyilʼukwigulʼaminso ga wantonko? UYesu pachaka wa kukumbushilʼukufinjila utempeli mu-Yelusalemu

²² Ilelo pʼahinzʼuchaka wa kukumbushilʼukufinjilʼutempeli mu-Yelusalemu, mwali mwe mulupepo.

²³ UwenʼuYesu ahajendanga mwa tempeli mumanda ya Solomoni.

²⁴ Pe vahamuzinganila avaYuda vahamuvuzya vahati: Ukuleha shali zinizi zyʼukwembelezya amoyo gitu? Inga we Chilisiti nalyoli iwe pʼutuvuzye apazelu.

²⁵ PʼuYesu ahavavuzya ahati: Mbavuzizye, nkandi mutitisile. Imbombo zye nkuvomba mwizina lya Tata, zye zinizi zye zikunkomeshezya.

²⁶ Nkandʼimwe mutakwitiha, she mute mwe va mungʼonzi zyane.

²⁷ Izyene ingʼonzi zyane zimanyilʼizwi lyane, nane nzimanyile izyene. Izyene zikundandatʼine.

²⁸ Ine nkuzipʼuvulanzi vwa shimashima, shimashima zitalitega nalumo, numo atalizifwula munyove zyane.

²⁹ UwenʼuTata wʼampiyʼine, we mupiti kuli vonti; numo atalizifwula munyove zya Tata.

³⁰ Nane nuTata tuli woka mwene.

Ahapaka ha vaYuda

³¹ PʼavaYuda vahasevʼamavwe vahati tumutinze.

³² PʼuYesu ahavamula ahati: Mbapeleye imbombo inyinza zye nyinji lwe mukwenya, zye nkapela mumaha ga Tata. Shinishi mukuntinzila mbombo vuli namavwʼiga?

³³ AvenʼavaYuda vahamula vahati: Tutakukutinzila mbombʼinyinza zyʼupezilʼiwe ndali, nkandi shʼukuyanga izya musamu, shʼukuyipelʼukuva we Mulungu nashenga we muntu vwelele.

³⁴ UwenʼuYesu ahavamula ahati: Munkomelezyo zyinyu amwe litasimṿilwe lye likuti: Njanzile ntili namwe mwe valungu?

³⁵ Apene lelo inga vope navala ve livinziyʼizwi lya Mulungu inga vope avayanjiye ukuva ve valungu, she zye zisimṿilwe zye zitakuvindulwa nalumo,

³⁶ pʼine, ne uTata ampiyʼuvufinjile, nʼantumile munsʼumu, —pʼine mukunjanjila vuli lelo mukuti: Ukuyangʼizya musamu, she ntili ne Mwana wa Mulungu?

³⁷ Inga munazilʼukuti ntakuvombʼimbombo zya Tata ine pe ndali ukunitiha.

³⁸ Nkandʼinga nkuzivomba nalyolʼine, inga mutakunitiha ine, pe muzyitihaje zizyo zye nkuvomba, pe muliyaga mulimanyinsanya ukuti uTata ali mumwanʼine, havili nane ukuti ndi mwa Tata.

³⁹ Havili avene vahavuyizya vahati tumuleme, uwene ahaleguha inyove zyavo.

⁴⁰ Pʼahalambʼijenje lya Yolidani, ahavalʼisyila lila kwʼalʼu-Yohani ahavozyagʼavantu ulutanzi lula. Pʼahadila.

⁴¹ Pe vahavalʼavinji avantu pupo pʼali vahati: UwenʼuYohani atapezile nashimʼishimanyilo, nkandi zyʼuYohani ayanzile pali wununo zye zya nalyoli.

⁴² Pe vahamwitiha avinji ava mumwo.