Yakobu 4 - Tesitamenti Umupwa 1965

Ukupinga izya madali ga muvwanamuntu vwa vantu

¹ Vufumile kwoshʼuvulugu, gafumile kwoshi namadali ṿwe muli naṿwo? Amwe ṿitafumile mumpapilo zyinyu zye zikuvusyʼuvulugu mutuntu twinyu twa mumuvili?

² Mukupapila, nkandi mutali naṿwo. Mukugoga nukugulumwa, nkandi mukupotwʼukuṿwaga. Mukulwa nukuvusyʼuvulugu. Nkandi mute naṿwo naṿimo she mutakulava.

³ Mukulava shisitakuposhela, she mukulava havivi ukuti muṿipoposyaje mumpapilo zyinyu.

⁴ Mwe vavembʼimwe, amwe mutamanyile ukuti uvumanyani ninsʼino vwe vulugu kwa Mulungu? Wengʼakwanzʼuvumanyani ninsʼino, wʼakuyipelʼukuva mulugu wa Mulungu.

⁵ Pamo mukusiva ukuti Ukalata akuyanga shaha lwʼakuti: Akusamba nkani nuvwahayikungule uMupepo wʼahamutendamiha muhati zyitu?

⁶ Uvwenʼuvwila nyene vwʼakutupa vwe vulusizye uvupiti, mwe mumwo akuti: UMulungu avahayivale akuvenyezya pe pala, nkandʼavahayiṿizye vʼakuvakunjilʼuvwila.

⁷ Simuyikonzyaje kwa Mulungu lelo, mumupotʼuSetano, pʼakushimbila.

⁸ Mupalamile kwa Mulungu, pe wope akupalamila kulʼimwe. Musukusule munyove, mwe vatalamalandu, muzelufwʼamoyo ginyu mwe va moyo amagulugulu.

⁹ Muvanje mwe vanamangusu, muswimililwaje, mukutaje. Inseho zyinyu zigalunkane ukuva vuswimililwa, nuluseshelo lwinyu ukuva vusungamu.

¹⁰ Muyiṿizyaje kuminso ga Mulungu, pʼalivimiha havili uwene.

¹¹ Mutakwakwasanyaje mwe vamwitu. Shʼuno wengʼakumukwakwasyʼuwamwavo pamo ukumulonga, wʼakukwakwasyʼinkomelezyo nukuzilongʼinkomelezyo. Apene nyene ingʼukuzilongʼinkomelezyo pʼute we muvombelankomelezyo nkandi umulonzi.

¹² Ali woka mwene umuhomelezyankomelezyo numulonzi. We wuyo wʼamanyile ukupoha nukutupula. Iwe nyene wʼukumulongʼuwamwinyu we we nanu?

Ukupinga ukuyibada kwa vadumbwe

¹³ Ukwo lelo mwe mukuti: Umusanyʼuno nga ndavi tulivala munkayʼindive, kwe tulidila umwaha woka nukuyitantanyʼuvukazi ukuti tulonkaje ishuma.

¹⁴ Imwe mwe mutazimanyile zye likuletʼilya ndavi. Uvwenʼuvulanzi vwinyu she shintu vuli? Lyosi vwelele lye likuloleha ahavalilizyo ahafupi, havili likwepa panapo.

¹⁵ She zihondeye kulʼimwe ukuyanga ukuti: IngʼuMwene ayitisile pe tulilandila, pe tulivombʼimbombʼindive ino pamo indive yila.

¹⁶ Ishi nyene pe mukuyitima zizyo Zye mukuyibada mweka. Ulutimo lwonti lwenga luli vovulo pe luvivi.

¹⁷ Ilelʼuwene wʼamanyilʼukuvomba hamʼahinza, lwʼa-kusitʼukuhavomba pʼatazilʼamalandu.