Yakobu 3 - Tesitamenti Umupwa 1965

Ukukonzyʼulumili

¹ Mutayipelaje ukuva mwe vasambilizi avinji, she mumanyile ukuti tulilongwa ilusyʼuvuhali.

² She swe vantu swenti tukupuva apinji. Uno wengʼatakupuva kwizwi nalimo, we muntu umwila, wʼamanyilʼukufunga umuvili wonti fwe ngati nalihova.

³ Uyenyʼifalasi lwe tukuzivihʼiṿijela mwilomu iṿwa kuzitilinga ukuti zitwitihaje sweneswe, pe numuvili wakwe wonti tukuwuzyunguzya.

⁴ Yenyi zyope nimeli Zye mpi ti nkani, zyʼinkungu ya maha yikuzijenzya. Vakuzisyetula nahasyetulilo ahansi vwelele, vakuzyenyezya kukwo kwʼakasime wuyo wʼakuzisyetula.

⁵ Lwope nulumili lwe hantu hansi vwelele, nkandi lukuyitima zye mpiti. Yenya inza ṿwe nahapantuho ha mwoto hakupembʼamasitu amapiti.

⁶ Lwope nulumili mwoto, insi ya vugombanu. Mutuntu twa mumuvili witu ulumili lukuyilolesya ukuti lukuhandamanyʼumuvili wonti, havili mulujendo lwonti lwa pamwanyʼipa lukuholelezyʼumwoto, lwope lukuyoholelʼumwoto kumwoto wa mugehena.

⁷ Shʼinkolo zyonti izya nkanu nizya nyunyi nizya ṿwaṿuzi nizya ṿwa mwa sumbi zikwitihʼukukonza, avantu mumaha gavo vazikonzizye.

⁸ Ulwenʼulumili nyene lwe numʼumuntu atangalukonzya. Lwe hantʼahavivi ahasitakutonta, he hizuye uvwanga uvugogavantu.

⁹ UMwene, havili uTata, tukumushindishila lulwo, navantu ve vapezilwe kushati sha Mulungu tukuvatipila lulwo.

¹⁰ Izya lutimo nizya ntipo zikufuma mwilomu lyoka lilyo. Zitahondeye, mwe vamwitu, ukuva vovulo.

¹¹ Amwe ishenʼishiduda shikufumwʼaminzi amanonu namahali mwilyinso lyoka lyene?

¹² Ilyenʼituvu amwe lingahomʼamavono, pamo impensya lingahomʼamakunyu? She shope nishiduda sha minzi gʼilambo shitangafumwa aminzʼamanonu.

Injele zyʼilenga nizya nalyoli

¹³ Wʼunanu kulʼimwe uwanjele, wʼasheṿile? Wʼalolesyʼimbombo zyakwe izya lujendʼulwinza, muvutelefu vwa njele.

¹⁴ Apene nyene inga muli nahafwishi nukulundunkana mumoyo ginyu, pe mutayitimaje, pe mutalumajʼilenga Zye zikulasana nuvwanalyoli.

¹⁵ Shʼinjelʼizyo zitafumile kumwanya ndali, zye zya pansi, zya muntu, zya mpepʼimbivi.

¹⁶ Shʼinga mwe halʼahafwishi nukulundunkana, mwe vuli vwope nuvuṿwalanganu nimbombo zyontʼimbivi.

¹⁷ Izyene nyenʼinjele zya kumwanya zitalisile ukuva nzelu, havili nkundavwihalo, intelefu, zikuteshela ingʼumuntu akukuvuzya zimo, zyizuye ulupepelezyo ninsanga zyontʼinyinza, zite namaganigani, zite namafuji.

¹⁸ Izyenʼinsanga zya vugolosu zikuvwalwa kuvapelavwihalo.