Yakobu 2 - Tesitamenti Umupwa 1965

Izya kumuvombela umuntʼudumbzve numupina

¹ Mwe vamwitʼimwe, lwe muli nulwitiho lwa Mwene witu uYesu Chilisiti umuhatavumwamu, pe mutalupatinkanyaje nukumusevelʼumuntu muvwinza vwa kuminso.

² Ingʼumurttu wumo akwinjila mumwo mwe muvunginʼukuputa wʼazwayʼinsalamu zya sahabu munyove nishizwalo she shikunyengʼenyela, havili ingʼakwinjila mumwo numupina wʼazwaye ishizwalo ishipamizu,

³ ilelo inga mukumwenya wuyo wʼazwaye ishizwalo ishinyengʼenyezu, wʼinga mukuyanga kuli wuyo mukuti: Iwe nzagaga utendame pavwinzʼipa, —nkandʼuwenʼumupina wʼinga mukuyanga kuli wuyo mukuti: lwe uyimilile panapa,— pamo mukuti: Utendame kuṿinama kushitengo shane sha kuviha pupʼiṿinama ṿwane,

⁴ amwe pe mutayisavulinye mwemwe mweka, muli zizyo muyipezilʼukuva mwe valonzi va nsivʼimbivi?

⁵ Tejelezyaji mwe vamwitu vankundwa. AmwʼuMulungu atavaseṿilʼavapina va munsʼumu ukuti vavanje ve vadumbwe mulwitiho navapwanavupwano vwa vumwene vwʼafinzile kuli vuvo venga vamukunzite?

⁶ Nkandʼimwe mumululuvisilʼumupina. Amwe vate vadumbwe ve vakuvamenelezyʼimwe, te vuvo ve vakuvakweselʼimwe kwilonjelwi?

⁷ Amwe vate vuvo ve vakusamula izinʼilyinza lye litasilwe palʼimwe?

⁸ Nkandʼinga musajiye muvulunjisu uluhomelezyo lwa shimwene ukulandata mwa kalata, lwe lukuti: Umukundʼuwamwinyu inza shʼuyikunzitʼiwe, pe muvomṿilʼahinza.

⁹ Nkandʼinga mukusevʼumuntu muvwinza vwa kuminso pe mukutalʼamalandu, pʼuluhomelezyo lukuvamenʼimwe ukuti mulululisile.

¹⁰ Shʼuno wengʼasunzilʼinkomelezyo zyonti, lwʼashizile ululajizyo lwoka vwelele, pʼali fwe ngati ashizile zyonti.

¹¹ She wuyo wʼatinzite: Utahavembuhaje, we havili ayanzile nilya kuli: Utahagoje. Ilelʼiwe nashengʼutakuvembuhʼuluvembu, nkandʼukugoga, pʼuyipezilʼukuva we mushilanyankomelezyo.

¹² Muyangaje havili muvombaje fwe ngati vantu ve vakujendʼukulongwa munkomelezyo zya vutavushe.

¹³ Shʼuvulonzi vutali nulupepelezyo kuli vuvo ve vatakuvombʼizya lupepelezyo. Ulupepelezyo lukuyitima uvupiti kulusya uvulonzi.

Palwitiho nimbombo

¹⁴ Mwe vamwitu, amwe pe zikuvosya shonu ingʼumuntu akuti ali nulwitiho, nkandi lutakuloleha mumbombo zyakwe? Amwe ulwitiho lunulu lungamupoha?

¹⁵ Ingʼuwamwitu umwanaṿuli pamo umwantanda azwalusile nukusovelwa iṿwa kulya ṿwa kuyanana naṿwo,

¹⁶ ilelʼimwe pe wumo ingʼakuvavuzya vuvo, akuti: Mujende lumi muvwihalo, mwote numwoto, mwikute niṿintu, ilelo pe musite nukuvapa iṿwa mumuvili ṿwe vasovelilwe, pe zingavavosya shonu?

¹⁷ She luhonzizye lelo lwope nulwitiho. Inga lute nimbombo zya kuloleha mumwo, pe lufuye nzilʼulwene.

¹⁸ Manyi wumo angati: Iwe uli nulwitiho, ine nyene ndi nimbombo. Undanjʼulwitiho lwaho shisitambombo, nine kwe nkulanje ulwitiho lwane lwe lukuloleha mumbombo zyane.

¹⁹ Iwe zikuhozile ukuti alipʼuMulungu wʼali woka. Ukuhonzyʼahinza. Zyope nimpepʼimbivi zikuzyitiha zinizi, havili zikutetema.

²⁰ We muntu umusitakuva nahamo, amwʼusungwilwʼukuzimanya Zye zikuti ulwitiho ulusitambombo lwe lwa shaha?

²¹ Amwʼuwenʼutata witu uAbulahamu atatasilwʼuvugolosu mwe mumbombo yakwe iya kutwalʼumwana wakwʼuYisikaka pashifinjilo?

²² Ukwenya ulwitiho inza she luhavombelana nimbombo zyakwe, havili ukuti ulwitiho luhalunjiha mumbombo,

²³ Zye zizyo gahalunjihʼamazwi ga mwa kalata ge gakuti: UwenʼuAbulahamu ahamwitihʼuMulungu, mwe mumwo ahayanjilwʼuvugolosu, havili ahatashilwʼukuva wʼunkundwa kwa Mulungu.

²⁴ Yenyi lelo ukuti umuntu akutashilwʼuvugolosu mwe mumbombo, te mwe mulwitiho lweka.

²⁵ Wope nuLahabu vovulo, amwʼatatasilwʼuvugolosu mwe mumbombo? Shʼavaposheleyʼavaṿulizi nukuvalangʼidala ilinji ilya kusogola.

²⁶ Inza shʼahonzizye nawe muvili, shʼingʼate numwuyu pe mufwe, lwope nulwitiho vovulo inga lutakuloleha mumbombo, pe lufwe.