VaLoma 7 - Tesitamenti Umupwa 1965

Ishiholanyo kufuma muzya vusendelo

¹ Mutamanyinsinye mwe vamwitu, —she nkuyanga kulʼimwe mwe mumanyilʼinkomelezyo—, ukuti shima lwʼumuntʼakulandila, pʼinkomelezyo zikumukonzya?

² Shʼumwantanda wengʼali numulume wʼuluhomelezyo lumukunzile shima lwʼumulume akulandila. Lwʼumulume afwa pʼakusatulwa kuluhomelezyo lwa mulume.

³ Pe lelo ingʼakusema nuwunji lwʼumulume akulandila, pe vakuti umwantanda muvembu. Nkandi lwʼumulume afwa, pe fwane asatulilwe kuluhomelezyo lula, pʼatakuva muvembu nashengʼakuva numulume uwunji.

⁴ Namwe vovulo, mumuvili wa Chilisiti mufuye kunkomelezyo, ukuti muvanje mwe va wunji, va wuyo wʼahazyuha kuvafwe ukuti tumuhomelajʼuMulungu insanga.

⁵ She lwe tuhalandataga mumuvili uno uwa mbivi, pʼuvupwe vwa vutalamalandu vwe zikuvuhalambiha zye nkomelezyo, vuhavomba mwonti mutuntu twa mumavili gitu ukuti vuhomajʼinsanga impelavufwe.

⁶ Ishi nyene pe tusatulilwe kunkomelezyo, she tufuye kuli zizyo zye zyatukunzile, ukuti tuvombaje muvupwa vwa mupepo, te mwe mutusimṿilwa utukali.

Inkomelezyo nuvutalamalandu

⁷ Amwe pe tuti vuli lelo? Amwʼinkomelezyo vutalamalandu? Zye ndali ukushela zinizi! Zipele te nkomelezyo zye zimbuzizye, nkandi pe ntavumanyile uvutalamalandu. She kwope nukukumbwa nkandi ntakumanyile ingʼinkomelezyo zitahambuzya ukuti utahakumbwaje.

⁸ Ilelo uvutalamalandu vuhavushila mululajizyo, vuhahalambihʼukukumbwa muhati yane. She pʼinkomelezyo zitalipo pe nuvutalamalandu vuli fwe ngati vufuye suti.

⁹ Ine lulwo nkalandilaga shisitakwenyele-zyʼinkomelezyo. Ilelo lwʼuluhomelezyo lwinza pavutalamalandu vuhandʼukulandila, ine pe nkafwa.

¹⁰ Pe nkaga ululajizyo lwe lwali lwa kumpʼuvulanzi, kukwane luhaletʼuvufwe.

¹¹ Shʼuvutalamalandu vuhavushila mwe munkomelezyo mwe vuhankopelʼine, vuhangoga nalwe lulajizyo.

¹² Mwe mumwo inkomelezyo zye mfinjile, lwope nululajizyo lufinjile, lugolosu, havili lwinza.

¹³ Amwe lelo kwe kuti ahantʼahinzʼaha he hampiyʼukufwa? Zye ndali ukushela zinizi! Nkandi uvutalamalandu vuhambombelʼine izya vufwe muhantʼahinza ukuti vulolehaje ukuva vwe vutalamalandu, ukuti mululajizyo uvutalamalandu vulusyaje ukuloleha ukuva vwe vutalamalandu nkani.

Umuntu namata pavili

¹⁴ She tuzimanyilʼizyenʼinkomelezyo ukuva zye zya mupepo, nkandʼine ne wa muvili wa mbivi, wʼankazizye nukumpela ukuva ne muzya wa vutalamalandu.

¹⁵ Ine ntakuyenyʼahinza zye nkuvomba she ntakuvomba zizyo zye nkasime, nkandi nkuvomba zizyo zye nzisufizye.

¹⁶ Apene lelo inga nkuvomba zye ntakasime, pe havili nitisile nzila inkomelezyo ukuti zye nyinza.

¹⁷ Kwe kuva lelo nte nene ne nkuvomba zinizi ndali, vukuvomba vwe vutalamalandu vwe vuzenzile muhati yane.

¹⁸ Shʼimanyilʼinʼukuti muhati yanʼumu, nkuti mumuvili wane uwa mbivi mwe naṿimo ṿitazenzile mumwʼiṿwinza. Shʼukwenʼukukasama kwe kulipo muhati yane, nkandʼukwenʼukuvuvombʼuvwinza kwe nakumo.

¹⁹ She ntakuvombʼuvwinza vwe nkasimʼine, nkandʼuvuvivi vwe mbusufizye vwe nkuvuvomba.

²⁰ Apene lelo inga nkuvomba zizyo zye ntakasime, pe fwane nte nene ne nkuzivomba ndali, pe vukuvomba vwe vutalamalandu vwe vuzenzile muhati yane.

²¹ Mwe mumwo lelo inga nkwanzʼukuvomba uvwinza pe nkwenya lukuva fwe ngati luhomelezyo muhati yane ulwa kuvukalakasya uvutalamalandu.

²² Shʼuwenʼumuntu wa muhati yane wʼakuzishelʼinkomelezyo zya Mulungu.

²³ Nkandi mutuntu twa mumuvili wane mwe nkwaga mwe lulʼulunji uluhomelezyo, lwe lukulwʼuvulugu nuluhomelezyo lwa munsivo zyane, lwe lukunkunga ukuva ne mukungwa wa luhomelezyo lwa vutalamalandu lwe luli mutuntu twa mumuvili wane.

²⁴ Ne muntu ne munamangusu! Wʼunanu amposile kumuvili wununo uwa vufwe?

²⁵ UMulungu we nkumugwilʼulupi mwa Yesu Chilisiti uMwene witu. Mwe mumwo lelo munsivo zyane nkuluvombelʼuluhomelezyo lwa Mulungu, mumuvili wane wa mbivi nyene nkuluvombelʼuluhomelezyo lwa vutalamalandu.