VaLoma 5 - Tesitamenti Umupwa 1965

Zyʼulwitiho lukuleta

¹ Ilelo she tutasilwe uvugolosu mulwitiho tuli nuvwihalo kwa Mulungu mwa Mwene witu uYesu Chilisiti.

² Muli wuyo twigulilwe mulwitiho ishilyango sha kwinjila muvwila vunuvu mwe twimiliye. Mwe mumwo tukuyitima nulusuvilo lwa vumwamu vwa Mulungu.

³ Te kwe kuheka hanaha, ndali, vwope navwe vuhamantanilwa tukuyitima —she tumanyilʼuvuhamantanilwa ukuti vukupelʼuvuṿindilamalema.

⁴ Uvwenʼuvuṿindilamalema vukupelʼukuhondela, ukwenʼukuhondela kukupelʼulusuvilo,

⁵ ulwenʼulusuvilo nyene lutakumupasyʼumuntʼinsoni, shʼuMulungu aponyizyʼishikunzi shakwe mumoyo gitu mwa MupepʼuMufinjile we tumuposheleye.

Ishikunzi sha Mulungu shalolesile muvufwe vwa Yesu

⁶ ShʼuChilisiti ahatufwila pamwaha wakwe swe vilanyi lwe suti twali swe vayeyevazu.

⁷ Patazu ukuti umuntu angamufwilʼuwamwavo we mugolosu. Nkandi ingavanga umuntʼangalinga ukumufwilʼumuntu umwinza.

⁸ UwenʼuMulungu nyene Ishikunzi shakwe shʼatukunzitʼiswe ashikumusizye nzila pala pʼuChilisiti atufwiliyʼiswe lwe suti swe vatalamalandu.

⁹ Ishi she tugolosheye mumavanda gakwʼuvugolosu, akupitilizya ukutupoha kuvuhalazu.

¹⁰ Shʼinga vwatukundinye nuMulungu vwe vufwe vwa Mwana wakwe lwe twali swe valugu suti, pe lelo uvulanzi vwakwe vukulusya nkani ukutupoha swe tukundine nawo.

¹¹ Te zye zinizi zyeka ndali, havili tukuyitimila mwa Mulungu, mwa Mwene witu uYesu Chilisiti, wʼatuloncheye nulukundano.

Uvufwe vuhinzila mwa Adamu – Uvulanzi mwa Chilisiti

¹² Mwe mumwo inza shʼumuntu woka avulesite uvutalamalandu munsʼumu, vwope uvutalamalandu vuhaletʼuvufwe, pʼuvufwe vuhasavalila muvantu vonti vovulo, she vonti vatazilʼamalandu.

¹³ Pope lwe zishilʼinkomelezyo uvutalamalandu vwalipo munsi. Nkandʼumuntu atakulongwʼuvutalamalandu lwʼinkomelezyo zitalipo.

¹⁴ Ilelo ukufuma pa-Adamu ukwinzʼukufiha pa-Mose uvufwe vwali wʼumwene, vwavakonzizyʼavantu nave vatatazilʼumulandu wʼaholine nulushilanyo lwa Adamu, we shiholanyo shʼuno wʼali ayinzaje.

¹⁵ Nkandi ishenʼishikunjilwa shitaholine nulushilanyo. Shʼulwenʼulushilanyo lwa muntu woka mwene lugozilʼavantʼavinji, pʼuvwila vwa Mulungu nishikunjilwa sha muvwila vwa muntu woka mwene uYesu Chilisiti ṿivalafushiye ve vinji.

¹⁶ Vute vutalamalandu vwa muntu woka vwelele vwe vulesitʼishikunjilwa shinishi. Shʼukwenʼukulongwa kwe kufumile kumuntu woka mwene kuhaletʼuvutupulwa, ishene nyenʼishikunjilwa sha vwila she sha panchilanyo zye nyinji isha kutashilʼavantu uvugolosu.

¹⁷ Shʼinga muvutalamalandu vwa muntu woka uvufwe vuhakonzya muli woka mwenʼula, —pe vuvo ve vaposheleye uvwinji vwa vwila nishikunjilwa sha vugolosu, valilusyʼukukonzya muvulanzi fwe ngati ve vamwene muli wuyo woka uYesu Chilisiti.

¹⁸ Mwe mumwo inza shʼulushilanyo lwoka luhavaletelʼukulongwa ilya kuvatupula avantu vonti, she vuhonzizye vovulo nuvugolosu vwa muntu woka vwe vuhavaletelʼavantu vonti uvugolosu vwe vuli nuvulanzi.

¹⁹ Inza shʼavinji vahinjila muvutalamalandu pamaluli ga muntu woka, —vovulo mulusajilo lwa muntu woka vahinjila muvugolosu.

²⁰ Izyenʼinkomelezyo zye zilandite mwisindʼukwinza ukuti ulushilanyo luvanjʼulupiti. Apene nyene shʼuvutalamalandu vuṿuzile, pe vwope nuvwila vulusizyʼukulafuha,

²¹ ukuti —inza shʼuvutalamalandu vuhayipelʼukuva wʼumwene— vwope nuvwila vukonzyaje muvugolosu vwe vukupelʼuvulanzi vwa shima shima mwa Yesu Chilisiti uMwene witu.