VaLoma 4 - Tesitamenti Umupwa 1965

Ishiholanyo sha Abulahamu

¹ IlelʼuwenʼuAbulahamu usekulu witu we tukuti muvuntu vwakwe ahalonka shonu?

² ShʼuAbulahamu inga zyamuloncheye uvugolosu zye mbombo zyakwe pe fwane ali nazyo izya kuyitima weka. Nkandi te kwe kwa Mulungu.

³ Amwe Ukalata akuti vuli? UAbulahamu ayitisile kwa Mulungu, mwe mumwo uMulungu ahamutahʼuvugolosu.

⁴ Uwenʼumuntu wʼakuvombʼimbombo wʼamalipilo gakwe vatakumulipila pe pavwila ndali, nkandi lwʼakulonka ṿwa pamaha gakwe.

⁵ Nkandʼuno wengʼatakusuvila pambombo yakwe, nkandʼakumwitiha Wuyo wʼakuvapʼuvugolosu navilanyaMulungu, wʼakuvazilwʼuvugolosu mulwitiho lwakwe.

⁶ She wopʼuDavidi akumuyangʼuvusangalusu umuntu wengʼuMulungu amutasilʼuvugolosu shisitakwenyelezyʼimbombo zyakwe, akuti:

⁷ Vasangalusu ve vaswililwe zye vashilinkinyʼinkomelezyo, vʼamalandu gavo gakupishilwe.

⁸ Musangalusʼumuntu wʼuMwene atakumuvazizya amalandu gakwe.

⁹ Uvwene lelo uvusangalusu vunuvu vwa vavolwa, ingavanga navasitakuvolwa vwelele? She tukuti: UAbulahamu ahatashilwa uvugolosu mwe mulwitiho lwakwe.

¹⁰ Amwʼuwenʼaha-tashilwa vulivuli? Amwe lwʼali muvuvolwa, ingavanga muvusitakuvolwa? Te mwe muvuvolwa, nkandi lwʼali muvusitakuvolwa.

¹¹ Pʼahaposhela ishimanyilo sha vuvolwa, ukuti she shivanje shilemezanyo sha vugolosu vwʼagolosheye mulwitiho lwʼashili ukuvolwa, ukuti avanje we wʼuyise wavo vonti ve vakwitiha nashenga te vavolwa, vope ukuti vatashilwajʼuvugolosu.

¹² Havili ukuti avanje we wʼuyise wa vavolwa venga vatavolilwe vwelele nkandi nukulandata munyayo zya lwitiho lwa yise Abulahamu lwʼayitisile lwʼashili ukuvolwa.

¹³ Shʼulumfingwi lula ulwa kuti ulipwanʼinsi, apelilwe we Abulahamu nava mbeyu yakwe te mwe munkomelezyo, nkandi muvugolosu vwʼahatashilwa mulwitiho.

¹⁴ Shʼingʼava munkomelezyo vali vapwanavupwano, pe nkandʼulwitiho luyipezilʼukuva lwa shaha, pe nkandi nulumfingwi lwefile.

¹⁵ Shʼizyenʼinkomelezyo zye zikupelʼuvuhalazu. She zipele nazimʼinkomelezyo, pe nkandi lwope nulushilinkanyo nalumo.

¹⁶ Mwe mumwo lwafumile mulwitiho, luvanje lwa pavwila, ukuti ulumfingwi lusimpaje kumbeyu yakwe yonti, te kwe kuvalandatankomelezyo veka nkandi nakuvalwitiho lwa Abulahamu, we wʼutata witu swenti,

¹⁷ inza she lisimṿilwe lye likuti: Nkupezilʼukuva we yise wa nkolʼinyinji. Shʼali vovulo kuminso ga Mulungu wʼahamwitihagʼuwene, wʼakuzyusya navafwe, wʼakuvilishila ṿwe ṿitalipo fwe ngati ṿilipo.

¹⁸ Uwene ahitiha mulusuvilo lwe lutangasuvilwa ukuti ave wʼuyise wa nkolʼinyinji, inza she ziyanzilwe zitili: Shʼimbeyu yaho yiliva vovulo.

¹⁹ Ahasitʼukutozoha mulwitiho lwʼakwenyelezya umuvili wakwe uwa mampinta shʼasyaye hansi ukumalilizyʼamaha 100, lwʼakwenyʼuSala akwumʼikwata.

²⁰ Uwene ahasitʼukuva namaganigani nagamo aga kuzilʼulumfingwi lwa Mulungu, nkandi ahayisimfwa mulwitiho, ahamumwamihʼuMulungu.

²¹ Uwenʼahamumanya nalyoli ukuti zyengʼafingine numuntu, zyʼali namaha aga kuzipela.

²² Mwe mumwo muli zinizi ahatashilwa ukuva mugolosu.

²³ Zitamusimbililwe wuyo weka zye zikuti: Muli zinizi ahatashilwa ukuva mugolosu,

²⁴ nkandi nakulʼiswe vwelele, swe tulitashilwa inga tumwitisile wuyo wʼamuzyusizye kuvafwe uMwene witu uYesu,

²⁵ uno wʼuMulungu amufumizye panchilanyo zyitu, havili ahamuzyusya ukuti tutashilwajʼuvugolosu.