VaLoma 14 - Tesitamenti Umupwa 1965

Ukuvatula avayeyevazu mulwitiho

¹ Uno wenga muyeyevazu mulwitiho, we mumuposhelajʼahinza, kwe ndali kuzya kumulonga insivo zyakwe.

² Wengʼali nulwitiho wʼakulya ṿwonti, nkandi wenga muyeyevazu akulya ṿwe ṿiyavo ṿweka.

³ Uno wengʼakulya wʼatamusufwaje wʼakusala, wope nawengʼakusala atamulongaje wʼakulya, shʼuMulungu amuposheleye wenewo.

⁴ We nanʼiwe wʼukumulongʼumuvomṿi wa wunji? Nashengʼakwimilila nashengʼakugwa, shima wa we mwene wakwe wuyo. Ukwenʼukwimilila kwʼangimilila, shʼumwene amanyilʼukumugomwa ukuti ayimilile.

⁵ Wumo akusavula limʼisiku akuti lite fwe lyamwavo. Uwamwavo akuti amanda gonti gaholine. Vonti pe pakuti zivaholaje zyenga vakumbusile, unʼizyakwe unʼizyakwe.

⁶ Uno wengʼalimwamisilʼisiku limo, wʼamumwamishe we Mwene. Wope nuno wʼakulya ṿwonti, wʼakumulila we Mwene, shʼakumusalifwʼuMulungu. Wope nuno wʼakusala ṿimʼiṿintu akumusalila we Mwene, wope akumusalifwʼuMulungu.

⁷ Mulʼiswe swenti atalipo numo wʼakuyilandilila weka, havili atalipo numo wʼakuyifwila weka.

⁸ Shʼinga tukulandila pe tukulandila mwe mwa Mwene, havili inga tukufwa pe tukufwila mwe mwa Mwene. Mwe mumwo nashenga tukulandila nashenga tukufwa, swe nsavo ya Mwene.

⁹ ShʼuChilisiti afuye havili ahazyuha nukulandila ukuti avanje wʼuMwene wa vafwe navalanzi.

¹⁰ Havili iwe ukumulonga shonu uwamwinyu? Havili nawe ukumupupusya shonu uwamwinyu? She swenti mwe tuvaliye tuliloleha pilonjelwi lya Mulungu,

¹¹ She lisimṿilwe lye likuti: Nimfwa inza she ndipo, lyʼakuyangʼuMwene, iṿizwi ṿwonti ṿiliyipintila kwe kukwane nimili zyonti zilimutimʼuMulungu.

¹² Mwe mumwo swenti mwe tuvaliye tulilanduzilwa kwa Mulungu, unʼizyakwe unʼizyakwe.

¹³ Ukwo lelo situleshʼukulongana nkandi mwitinkane, ukuti numo atamupelelaje nazimo izya kupunula nizya kumupuṿwa uwamwavo.

¹⁴ Imanyile, mṿisinkamizizye mwa Mwene uYesu ukuti ṿitalipo naṿimo ṿwe ṿilʼumwiho ṿiṿwo ṿweka. Nkandi ṿwengʼumuntu akuṿimwamiha ukuva mwiho, ṿwe ṿikuva mwiho kuli wuyo.

¹⁵ Apene nyene ingʼuwamwinyu ali muvuswimililwa pazya ṿwa kulya ṿwaho, pʼulujendo lwaho te lwra mushikunzi. Utamunangaje niṿintu ṿwʼukulyʼiwe uwamwinyu, wʼuChilisiti amufwiliye.

¹⁶ Mwe mumwo litasamulwaje ahantʼaninza he muli naho.

¹⁷ Shʼuvumwene vwa Mulungu te ṿwa kulya havili te ṿwa kungʼwela, nkandi Uvwene vwe vugolosu nuvwihalo nuluseshelo muMupepʼuMufinjile,

¹⁸ shʼuno wengʼakumuvombelʼuChilisiti muzinizi zyonti, wʼuMulungu akumushela, wʼakuhondela nakuvantu.

¹⁹ Shʼinga zili vovulo pe tuzilandate zye mpelavwihalo nazye zya kuzengana swe vuvo vatupu.

²⁰ Utamongolajʼimbombo ya Mulungu pazya ṿwa kulya ṿwaho. Uvwenʼuvwinza vwe ṿwonti ṿwinza, nkandi ṿikuvipa kumuntu wʼakulya nashenga apunuye mumwoyo wakwe.

²¹ She hinza we muntu ingʼukulehʼinyama nipele naṿwonti ṿwengʼuwamwinyu akupunula pupo.

²² Ulwitiho lwʼuli nalwo uvanje nalwo kuminso ga Mulungu. Musangalusʼuno wengʼatakuyilonga ṿwengʼakuṿisajila.

²³ Nkandʼuno wengʼakulya namaganigani wʼalonzilwe nzila, she zite zya mulwitiho, zyonti zyenga zitali mulwitiho vwe vutalamalandu.