VaLoma 13 - Tesitamenti Umupwa 1965

Umushinzi kwa vamwene

¹ Mwenti muyikonzyaje kuvumwene vwa maha. She vutalipo navumʼuvumwene vwʼatavwimisile we Mulungu. Vwonti vwe vulipo vwʼavwimisile we Mulungu.

² Mwe mumwo nkuti uno wengʼakuvwilʼuvumwene pʼahiliye hamʼahantu hʼahimisilʼuMulungu. Avene nyene ve vakwila vakuyisendela ukulongwa.

³ Shʼavapiti vatakuvogofwa ve vakuvombʼinyinza nkandi ve vakuvombʼimbivi. Amwe ukwanza ukuti utavogopaje avamwene? Vombaga zye nyinza pʼuliyaga vakukutima.

⁴ She lwʼuMulungu avimisile pʼatili vakukuvombela vwe vwinza iwe. Nkandʼingʼukuvombʼimbivi yogopaga, she vatashilemilʼishipanga shaha. She vanyamata va Mulungu avene, avalanduzyi va vuhalazu kuli vuvo ve vakuvombʼimbivi.

⁵ Mwe mumwo pakuti muyikonzyaje, te kwe kuvuhalazu vwelele nkandi kwe kunyenyezyo zyinyu.

⁶ Zye zizyo namwe mukusonkʼumusonko. Shʼavamwene ve vanyamata va Mulungu ve vakuyikungula kumbombʼino.

⁷ Vonti muvapanje huho henga vakuti muvapanje. Uwa musonko mumupanjʼumusonko; izya pampaho muvapanjʼava pampaho; uwa kumunyila we mumunyilaje; uwa kumushindiha we mumushindihaje.

Ishikunzi sha vwanamuntu

⁸ Mutavanje numulandu numo kumuntu uwa kuvalanduzya, nkandi mukwanzilwa ukukundana. Shʼuno wengʼamukunzitʼuwamwavo wʼamalilizizye zyontʼinkomelezyo.

⁹ Shʼuzimanyile zye zikuti Utahavembuhaje, Utahagoje, utahivaje, utakumbwaje, nizinji zyonti zyenga zilipo, zyonti zikunjilinkine mwizwi linili lye likuti: Umukundajʼuwamwinyu inza shʼuyikunzite wewe weka.

¹⁰ Ishenʼishikunzi shitakuvomba nazimʼimbivi izya kumunangʼuwamwavo. Mwe mumwo ishikunzi she vulunjisu vwa nkomelezyo.

Uvwinzilo vwʼisiku lya Chilisiti

¹¹ Zyonti zinizi zye muvombaje she mumanyilʼumwaha mwʼavaliye. Shʼahavalilizyo aha kufuma mutulo imwe hinzile. Shʼuvupokwa vwitu vupalamiye shinishi ukulusya pala pe twanzitʼukwitiha.

¹² Uvusiku vwakusila, umusanya apalamiye. Situzule lelo imbombo zya mushisi, tuyijelenkanyʼiṿilwilo ṿwa luhozyo.

¹³ Tujende nukuyuta inza she tuhondeye swe va pamusanya. Lutavanje swe valuṿu navashingʼwezi, lutavanje swe valwizyo navalugusi kuluvembu, lutavanje swe vivo nava kuvishilanʼahafwishi ndali.

¹⁴ Nkandi muzwalaje we Mwene uYesu Chilisiti. Apene nyene inga mukuyananyʼumuvili pe mwandaje mutawusontelezyaje kuṿipapilo.