VaLoma 11 - Tesitamenti Umupwa 1965

Avana-Yisilayili vatalesile nzila

¹ Mwe mumwo nkuti: AmwʼuMulungu avatazilʼavantu vakwe? Zye ndali ukushela zinizi! Nkwe nane ne muYisilayili, mfumile mumbeyu ya Abulahamu, muluho lwa Benyamini.

² UMulungu atavatazilʼavantu vakwe ndali, vʼavalulumiye hali. Ingavangʼimwe mutazimanyile zyʼukalata akuyanga pazya Eliya pala, inza shʼamulonjeleyʼuYisilayili kwa Mulungu, ahati:

³ Mwene, avakuvwi vaho vavagozile, iṿifinjilo ṿwaho iṿwa kufinjila pupo vamongoye, ilelo nsyaye nene neka, havili vakuṿwimʼuvulanzi vwane.

⁴ Ilyenʼilomu lya Mulungu pe lihamuvuzya lyonu? Shʼine njilesheyʼavantu

⁷⁰⁰⁰ ve vatasugamiyʼiṿizwi kwa Bahali.

⁵ She zihonzizye vovulo nashinishi, vasyaye ve vuvasavuyʼuvwila vwakwe.

⁶ Apene lelo inga vuvasavuye vwe vwila, pe fwane zitavasavuye zye mbombo. She zipele zivasavuye zye mbombo, pe nkandʼuvwila vute vwila Uvwene.

⁷ Vuli lelo? Nkuti ṿwʼuYisilayili wonti ahanzaga, ṿwʼataṿwazile vaṿwazile veka ve vasavulwa. Avamwavo vonti vahasyohʼamoyo,

⁸ inza she lisimṿilwe lye likuti: ShʼuMulungu ahavapʼumupepo umuzilisyanjele, naminso amasitakwenya, namakutwi amasitakwiṿwa, ukufiha nilelʼili.

⁹ Wope nuDavidi akuti: Apene pavulilaṿintu vwavo payipelajʼukuva lwagulo lwa kuṿulula, payipelajʼukuva liliva, payipelajʼukuva lipunulo, payipelajʼukuva lugalushizyo lwa kuvagalushizya mumwo.

¹⁰ Vapulumbʼaminso Vatenyaje. Uvagogovehaje pansingo shima.

¹¹ Ilelʼine nkuti: Ukwenʼukupunula kwa ṿinama ṿwavo amwe kwah kwa kuvagwisya nzila? Zye ndali ukushela zinizi! Shʼulutelemuho lwavo lwinzilʼukuvapelelʼuvupokwa avakunzi, ukuti vuvo veka vavanje nuvuzuva.

¹² Apene lelo ingʼulutelemuho lwavo lwe vudumbwe vwa nsi yonti, nukusovelwa kwavo inga kwe vudumbwe vwa vakunzi, pʼulusimpo lwavo lupelaje kwoshi ukuletʼuvudumbwe!

Uvupokwa vwa vakunzi: ishiholanyo sha nsamba zye vakupanyula nukuzivwala pikwʼilinji

¹³ Zye nkuvavuzyʼimwe mwe mufumile muvakunzi. She mwe mbeleyʼukuva ne mwapositili wa vakunzi ine, mwe nkuyitinihʼimbombo yanʼine,

¹⁴ she nkuti ingavanga ngavapelela uvuzuva avamwitu ve tulʼumuvanda woka, ukuti imbaposhe vamo mumwo.

¹⁵ Ilelo shʼingʼukutagwa kwavo kwe lukundanyo lwa nsi, pʼukwenʼukuposhelwa kwavo kusitʼukuva vwe vulanzi uvufuma muvufwe?

¹⁶ Ilelo shʼinga hafinjile aha kutoma mwilomu, pe mfinjile yope naye nzujila yonti iya ṿintu. Pope shʼinga lifinjile izi, pe mfinjile Zyope nazye nsamba.

¹⁷ Apene lelo inga zimʼinsamba zipanyusile, pʼiwe we wali we livula lya mwilala uhapwanila pupo pe zyali, ingʼukulilana nizi mwe gakufumʼaminzi gʼivula,

¹⁸ pʼutayitimaje kunsamba izyamwavʼizi. Ingʼukuyitima, pʼukumbuhaje ukuti izi lye litamezile mumwahʼiwe ndali, nkandʼiwe wʼumezile mwizi wenewe.

¹⁹ Iwe lelo ingavangʼukuti: Insamba zihapanyuha ukuti impwanile mumwʼine.

²⁰ Zye zyashi zinizi! Shʼizyene zyapanyusile shisitakuva nulwitiho, nkandʼiwe uyimiliye mwe mulwitiho. Uyolovele lelo, utayitimaje wewe weka ndali, nyilaga.

²¹ Shʼapene shʼingʼuMulungu atahazipepelezyʼinsamba zya pashisinko, pʼatalikupepelezyʼiwe.

²² Uyenyelezye lelo uvutonsu nuvuhali vwa Mulungu. Kuli vuvo ve vaguye kwe muhali; nkandi kukwahʼiwe kwe mutonsu, ingʼukusyelemetela muvutonsu vunuvu. Uyolovelʼiwe ukuti utapanyuhaje nawe.

²³ Vope navala inga vatakusyala muvusitakwitiha, pe valimezelwa alivamezya, shʼuMulungu kutamuposite ukuvamezya mumwo havili.

²⁴ Shʼapene ingʼiwe wapanyulilwe pivula lye lya mwilala kushifumo, uhamezelwa pivula lya muhaya mwʼutapezilwe, pe vapele poshi lelʼavene ukuvuyila ukumezelwa havili pivula lyavo.

Ulukasamo lwa Mulungu kwe kuvapepelezyʼavantu vonti

²⁵ Mwe mumwo lelo, mwe vamwitu ntakwanzʼukuti mutazimanye inongwa zya kukwilu zinizi, ukuti mutatinji injele zyinyu zifumile muli mwenemwe, shʼavana-Yisilayili vamo vasyosile ukufiha pala pʼuvwinji vwonti vwa vakunzi vuliyinjila.

²⁶ Ilelo pe pala uYisilayili wonti alipona wope, inza she lisimṿilwe lye likuti: Akwinzʼukufuma mwa Zyoni uwa kuvapoha, wʼaliyefwa nulwilo mwa Yakobu.

²⁷ Ili lye lilagano lyane navo lwe ndizyolʼuvutalamalandu vwavo.

²⁸ PazyʼIvangeli ve valugʼavene, ukuti imwe mupone, nkandi pazya vusavulwa ve vankundwa she vafumile muvayise.

²⁹ ShʼuMulungu atakugalunkana nalumo niyikunjilwa ṿwakwe nulwito lwakwe.

³⁰ Inza she namwe lulwo muhamwilagʼuMulungu, nkandʼishi muhagʼulupepelezyo mwe mulwilo lwavo,

³¹ she shinishi avene vakumwila vovulo, ukuti valwajʼulupepelezyo shʼimwe mulwazilʼulupepelezyo.

³² ShʼuMulungu avigaliye vonti mulwilo ukuti avapepelezyaje vonti.

³³ Ye, vwe vwivizu vuli vwa vudumbwe nuvwa vumanyinsanyi nuvwa lusinkamizyo vwa Mulungu! Unanʼatinji azimanyinsanye zyʼakulongʼuwene, havili agasinkamizye namadala gakwe!

³⁴ Shʼunanu wʼangasimishizyʼinsivo zya Mwene? Amwʼunanu wʼangamuvuzya zyʼangahondelʼukuvomba?

³⁵ Amwʼunanu wʼatalisilʼukumupa yimo ukuti agalushilwaje havili?

³⁶ She ṿwonti ṿifumile mumwakwe wuyo ṿibazusile muli wuyo, havili ṿwenyizye kukwakwe. We tumutundumihaje ulutundumiho lwa shimashima. Amen.