VaLoma 10 - Tesitamenti Umupwa 1965

¹ Mwe vamwitu imwe, lwe luseshelo lwa mwoyo wane inga vaponaga, zye nkuvalavila nakwa Mulungu.

² Nkuvahomeshezya ukuti vali nuvwahayikungule kuzya Mulungu, nkandi vute muvumanyinsanyi.

³ Shʼavene vatavumanyilʼuvugolosu vwa Mulungu, mwe mumwo vahanzʼukwimihʼuvugolosu vwavo vuvo. Pe vahasitʼukuyikonzya kuvugolosu vwa Mulungu.

⁴ ShʼuChilisiti we lumalilizyo lwa nkomelezyo ukuti umuntu wonti wʼakwitiha avwagajʼuvugolosu.

Idalʼipwa ilya vwanalyoli lya vonti

⁵ ShʼuwenʼuMose asimṿile pazya vugolosu vwe vukufuma munkomelezyo ukuti wengʼakuzivomba, we zikumupʼuvulanzi.

⁶ Uvwenʼuvugolosu vwe vukufuma mulwitiho vwe vukuti: Zye ndali ukuyanga mumwoyo waho ukuti wʼunanu wʼalizuva ukuvala kumwanya? (She kwe kumwisyʼuChilisiti pansi.)

⁷ Pamo ukuti wʼunanu wʼaliyiha ukuvala pansi pangolongo? (She kwe kumuzuṿwʼuChilisiti ukufuma kuvafwe.)

⁸ Ilelo zitili vuli? Izwi lipalamiye kukwaho, lili mwilomu lyaho, lili mumwoyo waho. Lye lizwi lya lwitiho lye tukukumusya.

⁹ Shengʼukumutahʼapazelu nilomu lyaho uChilisiti ukuti we wʼuMwene, ingʼuli nulwitiho ukuti uMulungu amuzyusizye kuvafwe, pʼulipona.

¹⁰ Shʼumuntu ingʼali nulwitiho mumwoyo kwe kwinjila muvugolosu, havili ingʼakuziyangʼapazelu nilomu kwe kwinjila muvupokwa.

¹¹ Shʼukalata akuti: Umuntu wonti wengʼamwitisilʼuwene, wʼatalipasilwʼinsoni.

¹² ShʼavaYuda navaGiliki vatalehine, shʼuwene wʼuMwene wa vonti. Vonti venga vakuputa kukwakwe, uwene ali naṿwo ṿwonti iṿwa kuvapa, naṿimo ṿitakusova,

¹³ she vonti venga vakutahʼizina lya Mwene muluputo valipona.

¹⁴ Pe vamutashe vuli lelo muluputo we vatamwitisile? Havili vamwitishe vuli she vatamwiṿuye? Havili viṿwe vuli shisitamukumusyi?

¹⁵ Havili vakumusyaje vuli she numʼatakuvatuma? Inza she lisimṿilwe lye likuti: Vwe vwinza vuli iṿinama ṿwʼava ve vakukumusya intumʼinyinza!

¹⁶ Ukwene nyenʼukusajilʼIvangeli kwe vatalisajiye vonti ndali. ShʼuYesaya akuti: Mwene, wʼunanu we zimuhozile zye tukuvavuzya?

¹⁷ Mwe mumwo ulwitiho lukufuma munongwa zyengʼumu-ntʼakwiṿwa, zyʼakwiṿwa zikufuma mwizwi lya Chilisiti.

¹⁸ Ilelo pe nkuti: Amwe vatiṿuye lelo? Nalyoli vahiṿwa she Ipangwi lyavo lisavaliye munsi yonti, namazwi gavo gafisile kwʼipeleleyʼinsi mwe vasamiyeʼavantu.

¹⁹ Ilelʼine nkuti: Amwe ngavanga uYisilayili atazimanyinsinye? ShʼuMose atalisilʼukuyanga atili: Ndivapelelʼulugulumwo imwe ulwa kuvagulumwa avantu ve vate va luho, ndivapelelʼukuṿitwa ukwa kuluṿitililwa uluho ulusitanjele.

²⁰ UwenʼuYesaya akuyanga shisitakutetema akuti: Vanazilʼine vuvo ve vatananzaga, nkaloleha kuli ve vatahandondolaga.

²¹ Nkandi kwa Yisilayili akuti: Musanya wonti nkagololagʼinyove zyane kuluho ulusingani lwe lukungʼwingʼwinza.