VaHebuli 9 - Tesitamenti Umupwa 1965

Pavufinjile apakali paholine na papwa

¹ Lwope nulwitinkano ulutanzi lwali nindajizyo zyakwe izya vuvombezi, pope napavufinjile lwali napo apa munsʼino.

² She valizenzilʼihema, lye lyali lya kutaliha. Mwe shali mumwo ishilemanyale nishitala namakati ga lulolesyo. Mwe mumwo vatili: Pe paVufinjile.

³ Kuziho nyene kuvwizigo vwa mwenda uvwa vuvili, kwe lyali ihema lye vatili pe pa Vufumile vwa Vufumile,

⁴ mwe shalʼishifinjilo sha sahabu isha kusushizya pupʼilyosi, ninsandiko ya lwitinkano ye munzi mwonti vahomeleye nisahabu, mwe shali ishililo sha sahabu she shali numana muhati, nindisa ya Aloni ye yafufuye, namatafili ga lwitinkano,

⁵ pamwanya pali yiyo valipo avakelubi vavumwamu ve vakupishiye pavukundanilo. Nkandi twe tutakutuyanga hoka hoka shinishi utwene tunutu ndali.

⁶ Lwe vaziyaninye zyonti vovulo, pʼuwashiputo ahinjila shima mwihema kuluvazu lwa kutaliha ukuvombʼuvuvombezi.

⁷ Mwihema lya kuziho nyene, mwe pamwaha ahinjilaga lwoka lwene we washiputʼumupiti weka, atahinjilaga shisitakuva namavanda gʼahafinjilaga paṿipuva ṿwakwe wuyo niṿwa vantu vonti.

⁸ Mwʼahayanjila mumwo uMupepʼuMufinjile ukuti idala lya kuvala muvufinjile lishili suti ukwiguha lwe suti ihema lya kutaliha lishili lyimiliye.

⁹ She shali shiholanyo sha kuholanya mumwo izya shinishi, shali sha kuti iṿwa kutajila niṿwa kufinjila ṿwe vakutwalʼavantu, ṿwe ṿitamanyilʼukuvalunjisya muvwinza vwa nyenyezyo vuvo ve vakuvombʼuvuvombezi,

¹⁰ ṿwe ṿwali ṿwa kulya niṿwa kungʼwela niṿwa kusukusulasukusula vwelele, Zye ndajizyo zya munsʼumu Zye zilipo ukufiha pupo pe ṿililoleha iṿwa kuziyananya zyonti.

Amaha ga kwozyʼimbivi aga mputile ya Chilisiti

¹¹ NkandʼuwenʼuChilisiti wʼavonesile ukuva washiputʼumupiti uwa nyinza Zye zishili ukwinza izya mwihema ilusyi uvupiti nuvulunjisu, lye litazenzilwe ninyove, lye litali lya muvupelelwa vwa nsi yinino,

¹² uwene muvufinjile mwʼayinjiye lwoka lwene te kwe kumavanda ga vasavwe naga ngwada ndali, nkandi ge mavanda gakwe wuyo, mwʼayazilʼuvupokwa vwa shimashima.

¹³ Apene lelo ingʼamavanda ga vasavwe naga nkambaku nilota lya ntigano imbuha ge vahavasansilaga vuvo ve vahandamine, inga gakuvazelufwa nukuvapʼuvuzelu vwa muvili wa kunzi,

¹⁴ pe gapele poshi lelo agenʼamavanda ga Chilisiti, wʼayitwaye weka umusitamazota nagamo fwe ngati mputile kwa Mulungu mwa Mupepo wa shima, ukuzizelufwʼinyenyezyo zyitu nukwefwʼimbombʼimfwe zyitu ukuti tumuvombele uMulungu umulanzi.

¹⁵ Zye zizyo ayipezilʼukuva mulamulanyi wa lwitinkanʼulupwa ukuti lwʼazifwiliye muvufwe vwe vukuletʼuvupokwa inchilanyo zya mulwitinkano ulutanzi, ukuti vonti ve visitwe vapwanʼuvupwano vwe vwafinzilwe kuli vuvo.

¹⁶ Shʼinga halipo ahalaji pe pakuti uvufwe vulipo kuli wʼalajizizye.

¹⁷ Shʼahalaji hakugoma lwengʼavantu vakufwa, she lwe ululanzi suti uwene wʼalajizizye pe hatali namaha nagamo.

¹⁸ Mwe mumwo nalwe lwitinkano ulutanzi lwimisilwe mumavanda lwope.

¹⁹ She pala pʼuMose avavuzizye avantu vonti zyontʼindajizyo ukulandata munkomelezyo, pʼahasenda amavanda ga ngwada naga vasavwe poka naminzi namasepe amashemamu nuvusankalala vwʼitete, ilelo pʼahasansila pakalata nakuvantu vonti,

²⁰ ahati: Iga ge mavanda ga lwitinkano lwʼuMulungu alajizizye ukuti mwitinkane nawo wuyo.

²¹ Ilelo pe lyope nihema nutujela twonti utwa vuvombezi ahatusansila vovulo namavanda.

²² Havili munkomelezyo kwe kuti iṿintu ṿwonti ṿikuzelupila mumavanda, vwope nuvuswila vutalipo navumo uvusitamavanda aga kwitwa.

Vwe Imputile ya Chilisiti yili payo kuzinji

²³ Shʼiṿwati ṿwa ṿintu ṿwa kumwanya ṿwe pakuti ṿizelufilwaje muli gugo, iṿwene nyenʼiṿintu ṿwa kumwanya ṿwe ṿihondeye imputile indusyʼuvwinza.

²⁴ ShʼuwenʼuChilisiti atinjiye pavufinjile pe pazenzilwe ninyove, ishiholanyo sha pala pe panalyoli, nkandi ahinjila kwe kumwanya, ukuti shinishi ayilolesyaje kuminso ga Mulungu lwʼakutwimila swe vantu,

²⁵ te lya kuti ayifinjile fwe ngati mputile havili havili, inza shʼuwashiputʼumupiti akwinjila shima pamwaha namavanda ge te gakwe.

²⁶ She pe nkandi uwene avuyizizye shima ukuyimba ukufuma kuvwando vwa nsi. Shinishi nyene pʼahaloleha lwoka lwene kuvulunjisu vwa tuvalilizyo twa maha, ukuti azimanjizyaje uvutalamalandu nimputile yakwe wuyo.

²⁷ Havili inza shʼavantu vahomelezilwe ukufwa lwoka lwene inga pʼuvulonzi vwinzaje,

²⁸ vovulo nuChilisiti wʼayifinjiye lwoka lwene ukuti ayivegazye uvutalamalandu vwa vinji, ulwa vuvili pʼaliloleha shisitamalandu kuli vuvo vʼaminso gavo gali kukwakwe ukuti vavanje nuvupokwa.