VaHebuli 8 - Tesitamenti Umupwa 1965

Uvwashiputo vwa Chilisiti vupiti kuvwa shiYuda

¹ Izyene nyene zye tuyanzile Zye zikunjilinkine mwizwi lye likuti: Ṿwe ali uwashiputʼumupiti we tuli nawo, atendime kumuhonʼumulilo wa shitengo sha vumwene sha Vuhatavupiti kumwanya,

² umuvombezi pavufinjile namwihema lya vwanalyoli lyʼayimisile we Mwene, te vantu.

³ Shʼavashiputʼavapiti vonti vavisilwe ukutwala iṿwa kutajila nimputile Zye vakuvola. Mwe mumwo wope nawununo pakuti ave naṿwo iṿwa kutwala.

⁴ Shʼapele alipo munsi pe nkandi te washiputo uwene, she valipo avashiputo ve vakutwalʼiṿwa kutajila ukulandata munkomelezyo,

⁵ ve vakushivombela ishiholanyo nishinzyunguli sha ṿwa kumwanya, inza shʼuMose atejelezizye mushitushizya lwʼutuvalilizyo twa kuyananyʼihema tupalamiye, she shatili: Yenya, uyananye iṿintu ṿwonti ukulandata mushiholanyo she washiwenyi pigamba.

⁶ Nkandi shinishi ayipezilʼukuva muvombezi wa pambombʼindusyi Uvwinza, inza shʼayipezile ukuva mulamulanyi wa lwitinkano ululusyʼuvwinza, lwe lusimfile mulumfingwi ululusyʼuvwinza.

⁷ Shʼingʼulwitinkano ululanzi lula lwali luzelu izya kuluyanjila, pe nkandi vatahanzaga apanji apa lwitinkano lwa vuvili.

⁸ She lwʼakuvasundʼuwene akuti: Yenyi gakwinzʼamanda, lyʼakuyangʼuMwene, pe ndivimishila ulwitinkano ulupwa ava nyumba ya Yisilayili nava nyumba ya Yuda,

⁹ te lya kulandata mulwitinkano lwe nitinkine navayise umusanyʼula wʼumuhono wane ahavalema ukuvafumwa munsi ya mw-Egipiti, shʼavene vatasyelemeteye mulwitinkano lwane, ilelo nane pe nkasitʼukuvasajila, lyʼakuyangʼuMwene.

¹⁰ Shʼulu lwe lwitinkano lwe ndiyitinkana ninyumba ya Yisilayili lwe gashilinkine amanda gugo, lyʼakuyangʼuMwene; Ndivihʼinkomelezyo zyane munsivo zyavo, havili ndizisimba mumoyo gavo, pe ndiyipelʼukuva ne Mulungu kuli vuvo, vope valiyipelʼukuva vantu vane.

¹¹ Pe numo atalimusambilizya umupalamani wakwe, nga wamwavo ilya kuti: UmumanyinsanyʼuMwene. She vonti valimanyʼine ukufuma kumunsi ukufiha nakumupiti.

¹² She ndivatontoloshela kuvusitavugolosu vwavo, gope namalandu gavo ntaligakumbuha nalumo.

¹³ Lwʼakuti: Ulupwa, pʼulutanzi aluyanzile ukuva lukali. Nkandʼahene henga hakulufile, inga hagosifile, pe lwe hapalamiye ukwepa nzila.