VaHebuli 7 - Tesitamenti Umupwa 1965

UYesu washiputʼumupiti inzashʼuMelikisedeki

¹ Shʼuwene uMelikisedeki uno, umwene wa mu-Salemu, uwashiputo wa Mulungu umulusyi, we wuyo wʼahomine nuAbulahamu lwʼafuma kuvapota avamwene, wʼahamulota,

² we wuyo wʼuAbulahamu ahamupa iṿwa pishumi muṿintu ṿwonti. Izina lyakwe ukulisyetulanya kwe kuti umwene wa vugolosu, havili umwene wa mu-Salemu, lye likuti umwene wa vwihalo.

³ Ate nuyise, ate nunyina, ate navanyenya, ate nuvwando vwa manda gakwe nga vusilo vwa vulanzi vwakwe, uwene nyene aholine nuMwana wa Mulungu, washiputʼumupiti shisitakupelela napamo.

⁴ Musukumile lelo uvupiti vwakwe wununo, uno we nuAbulahamu usekulu amupiye iṿwa pishumi muṿigomwa ṿwʼagomile.

⁵ Vope vamo muvana-Leṿi ve valemile uvwashiputo vali nululajizyo lwe lukuti musanguzye iṿwa pishumi muvana-Yisilayili ukulandata munkomelezyo, lye likuti muvamwavo, nashenga vafumile mumusana wa Abulahamu.

⁶ Uwene nyene we paluho atafumile muli vanava ahasanguzya iṿwa pishumi kwa Abulahamu, ahamulota wuyo wʼali nulumfingwi lwa Mulungu.

⁷ Zye zizyo lelo numo atakuhana: Shima umunsi wʼakulotwa numupiti.

⁸ Panapo lelo pʼiṿwa pishumi ṿwe vakuposhela avantu ve vakufwa, nkandi kula wuyo wʼatasilwe muluhomeshezyo ukuti akulandila.

⁹ Ilelo pe zikuhondela ukuyangwa zye zikuti nawe Leṿi wʼakusanguzya iṿwa pishumi wope afumizye iṿwa pishumi mwa Abulahamu mula.

¹⁰ Shʼali mwe mumusana wa yise pala pʼuMelikisedeki ahomine nawo.

¹¹ Apene lelo ingʼuvwenʼuvwashiputo vwa vana-Leṿi vupezilʼuvulunjisu, she vuvapeleye avana-Yisilayili inkomelezyo, pʼavuhaje washi uwashiputʼuwamwavo ukulandata mumwiho wa Melikisedeki shisitakutashilwa mumwiho wa Aloni?

¹² She penga uvwashiputo vukwandulwa, pe zihondeye ukuti Zyope ninkomelezyo zyandulwaje.

¹³ Shʼuwenʼuno we zikumuyanga zinizi ali wa luhʼulunji lwe muli lulwo numo atafumile nalumo uwa kuvomba pashifinjilo.

¹⁴ She zilʼapazelu izya Mwene witu ukuti aduṿizye muluho lwa Yuda, ulu lwʼuMose atayanzile nazimo izya vwashiputo.

¹⁵ Pe havili zilusizye nkani ukuvʼapazelu zinizi, ingʼalolesile uwashiputʼuwamwavo wʼali fwe wʼuMelikisedeki,

¹⁶ uno wʼuvwashiputo vwakwe vute vwa mumiho ga ndajizyo zye zikunzile mumavanda ga luho lwa muntu, nkandi vwali vwa mumaha ge gakufuma muvulanzi uvusitakulotela.

¹⁷ Shʼuluhomeshezyo lulipo lwe lukuti: Iwe we washiputo wa shima ukulandata mumwiho wa Melikisedeki.

¹⁸ She kuluvazu lwoka ululajizyo lwe lwalongoleye luhalotela she lwali luyeyevazu, lutavomṿile nazimo,

¹⁹ —shʼinkomelezyo zitalunjisizye naṿimo—, kuluvazu ulwamwavo nyene Ulusuvilo ululusyi Uvwinza lwinjiye, lwe lukutupalamizya kwa Mulungu.

²⁰ Zinizi zitavomṿilwe shisitakuva nishilapo.

²¹ Shʼavene vala vayipezilʼukuva vashiputo shisitashilapo. Nkandʼuwenʼuno, wʼali nasho ishilapo sha wuyo wʼahamuvuzya ahati: UMwene alafile, ataliyandula, ukuti iwe we washiputo wa shima.

²² Mwe mumwo uYesu ahavoneha ukuva sha kupinjiha kulumfingwi lwe lulusizye uvugomu.

²³ Avene vala valʼavinji muvwashiputo shʼukufwa kwavalesizye ukuva vashiputo shima.

²⁴ Nkandʼuwenʼuno shʼakuva shima, pʼuvwashiputo vwakwe vutakupwanwa nuwunji.

²⁵ Mwe mumwo amanyile ukuvapoha nzila vonti venga vakujendela mumwakwe wuyo ukupalamila kwa Mulungu, shʼuwenʼakulandila shima ukuti avimilaje.

²⁶ She zyahondeye ukuti tuvanje nuwashiputʼumupiti wʼali inza shʼuno, umufinjile, umusitambivi, umusitamazota, wʼafupusile kuvutalamalandu, havili wʼayipezilʼukuva mutunyusu kunsi zyonti izya kumwanya.

²⁷ Pakuti atavanje fwe vashiputo avapiti vanava ve shima amanda gonti isuti vakufinjila imputile zya pavutalamalandu vwavo vuvo, inga pe vakupitilila ukufinjila izya pavwa vantu avamwavo. Shʼuwene zinizi zyʼamazile nzila lwoka lwene pala pʼayifinjiye weka pashifinjilo.

²⁸ Shʼinkomelezyo zye zikuvaviha muvwashiputʼuvupiti avantu ve vayeyevazu. Ilyenʼizwi lya shilapo nyene lye lyalandite mwisinda munkomelezyo likumuvihʼuMwana wʼalunjisile shimashima.