VaHebuli 5 - Tesitamenti Umupwa 1965

¹ Shʼuwashiputʼumupiti wonti wʼakufuma muvantu, akuvimila ve vantʼavamwavo kwa Mulungu, akutwalʼiṿwa kutajila niṿwa kufinjila pazya vutalamalandu;

² uwene amanyilʼahinza ukuvatetesya avasitakumanyinsanya nave vakupuva, she wope uvuyeyevazu vumuzenjeleye mwonti mwonti.

³ Vwe vuvwo vumupeleye ukutwala naṿwe ṿwakwe wope pazya vutalamalandu, inza shʼakutwala iṿwa vantu.

⁴ Havili numo atakuyisendela weka ulwimiho lunulu ndali, nkandʼuno wengʼamwisite we Mulungu, inza she wope nuAloni ayisitwe.

⁵ Ahonzizye vovulo nawe Chilisiti, wope atayimisile weka ukuva washiputʼumupiti ndali, nkandi amwimisile wuyo wʼamuvuzizye atili: We Mwana wane iwe, nkupafile umusanyʼuno.

⁶ Pope napanji akuti: Iwe we washiputo wa shima, ukulandata mumwiho wa Melikisedeki.

⁷ Uwene mumanda gakwe aga kuva mumuvili ahamutwalila wuyo wʼamanyilʼukumupoha nukumwefwa muvufwe imputo nindambilizyo poka ninkutʼimpiti namansozi, pʼahitishilwa shʼali munyilaMulungu.

⁸ Nashenga Mwana ahasambilila mumayimba gʼahayimbaga ukusajila.

⁹ Ilelo lwʼalunjiha, pʼahava wa kuvapelelʼuvupokwa vonti venga vakumusajila wuyo,

¹⁰ shʼuMulungu amutasile ukuva we washiputʼumupiti ukulandata mumwiho wa Melikisedeki.

Lwe ukujendelela kukwanzilwa muzya vuchilisiti

¹¹ We tuli ninyinji izya kumuyangʼuwene, nkandi ngomu ukuzipanga, she mwe vahata ukutejelezya.

¹² Shʼimwe muhondeye ukuva mwe vasambilizi, she mudiliye nazyo nkani, havili pe mukwanza uwa kuvasambilizyʼimwe insambilizyo intanzi izya kuvwando vwa mazwi ga Mulungu. Havili muyipezilʼukuva mwe vakwanzʼiziva, te ṿwa kulyʼiṿigomu.

¹³ Shʼumuntu wonti we suti akungʼwelʼiziva wʼatavelezinye nizwi lya vugolosu, she mucheche vwelele uwene.

¹⁴ Iṿwene nyenʼiṿigomu ṿwe ṿwa vakuzi avanjelʼingomu ve mumbombo zyavo vavelezinye ukusavulanya inyinza nimbivi.