VaHebuli 4 - Tesitamenti Umupwa 1965

UYesu washiputʼumupiti ukulusya nuAloni

¹ Pe lelo tutetemaje iswe, ukuti numʼuwamwitu we tuli nawo atalolehaje ukusyala mwisinda she tuli nulumfingwi lwe tuhaleshelwa ulwa kwinjila muvutuzyo vwakwe.

² Shʼintumʼi-nyinza yitwazile naswe inza she yahonzizye nakuli vuvo. Nkandʼavenʼizwi lye viṿuye litahavavosya nahamo, she vuvo ve vahiṿwaga vatahalisanganya nulwitiho.

³ Shʼiswe swe twitisile tuliyinjila muvutuzyo, inza she liyanzilwe lye likuti: Inza she nkalapa muvuṿitwe vwane, nkati: Vataliyinjila muvutuzyo vwane, nashengʼimbombo zyavomṿilwe ukufuma pala pʼinsi yazilwe.

⁴ Shʼilyenʼisiku lya vusano navuvili lyʼaliyanjiye kumo kwʼahati: IlelʼuMulungu ahatuzya imbombo zyakwe zyonti pisiku lya vusano navuvili.

⁵ Nipa vwelele akuti: Vataliyinjila muvutuzyo vwane.

⁶ Apene lelo she zisyaye zye zikuti vamo valiyinjila mumwo, havili vuvo ve vatalisilʼukwiṿwʼintumʼinyinza vatahinjila she vahasitʼukwitiha,

⁷ pʼakuvuyizyʼuwene ukuvihʼisikʼilyamwavo lyʼakuti: We musanyʼuno, lyʼakuyanjila mwa Davidi lwe padila nkani, inza ṿwe zyayanzilwe hali zye zikuti: We musanyʼuno inga mukwiṿwʼizwi lyakwe pe mutahasyosyʼamoyo ginyu.

⁸ ShʼingʼuYoswa avatwaye kuvutuzyo, pe nkandi atayanzile izyʼisikʼilyamwavo ilya pisinda.

⁹ Pe lelo palipo nashinishi palipo apa vutuzyo avantu va Mulungu,

¹⁰ Shʼuno wengʼayinjiye muvutuzyo vwakwe wʼatuzizyʼimbombo yakwe wope, inza she nuMulungu atuzizyʼiyakwe.

¹¹ Ukwo lelo tuyikungule ukwinjila muvutuzyo vula, ukuti numo atagwanje mushiholanyo shinishi isha vusingani.

¹² Shʼizwi lya Mulungu lilanzi, likuvomba namaha, lihozu ukulusyʼishipanga she shili nuvwembe kuvili, likupulunkanya ukufiha nukusinzanya umwoyo numupepo, utuntu twa mumuvili namumundi wa mumafupa, liziwenyi nzila Zye tukwata nazye tukuzisiva mumoyo gitu.

¹³ Nashimʼishipelelwa isha kuṿwama uwene kuminso gakwe ndali, ṿwonti ṿilʼapazelu, ṿikupulilwe lwe gakwenyʼaminso gakwe wuyo, we tukumwenyelezya mumazwi gitu.

¹⁴ Pe lelo she tuli nawo uwashiputʼumupiti, wʼapulunkinye zyonti izya kumwanya, uYesu uMwana wa Mulungu, pʼukwo lelo tulwumishizyajʼulwitiho lwe tukuluyanga.

¹⁵ Shʼiswe tute nawo uwashiputʼumupiti we kumupositʼukutupepelezya uvuyeyevazu vwitu ndali, nkandi ula wʼalinzilwe muli zyonti, aholine naswe, nkandi atatazile numulandu numo.

¹⁶ Ukwo lelo tutungamilaje ukupalamila kushitengo sha vumwene isha vwila, kwe tuhaposhele ulupepelezyo, tuhavwaje nuvwila vwʼakututula lwenga twapotwa inga lumo.