VaHebuli 2 - Tesitamenti Umupwa 1965

¹ Mwe mumwo twonjezyajʼukwumishizya Zye twiṿuye ukuti tutazipambataje nalumo.

² Shʼapene ingʼizwi lye liyanzilwe navahavizya lyali ligomu, ingʼinchilanyo zyonti nuvusitakusajila vwonti ṿwazile izya kuṿisunda inza she ṿihondeye,

³ pe tungapona vuli lelo iswe, inga tukusufwʼuvuposhi uvupiti inza shʼuvu? ShʼuMwene atalisilʼukuvutaha kuvwando, ilelo pe vahavusimishizya kulʼiswe vala ve viṿuye.

⁴ Wope nawe Mulungu ahahomeshezya poka navo mumamfindango namumayele, namumbombo zya maha inyinji mwe zyavaliye, namukuvagavanyʼavantu uMupepʼuMufinjile ukulandata mulukasamo lwakwe.

⁵ She te ve vahavizya vʼavaṿishiye kuṿinama ṿwavo insi yonti yʼiliyinza, ye tukuyitaha.

⁶ Nkandi wumo ayanzile kumo ahomeshezizye atili: Amwʼumuntu she shonu shʼukumukumbuhʼiwe? Havili umwana wa muntu she shonu shʼukumukumbuhʼiwe?

⁷ Umupezilʼukuva munsi hansi kuvahavizya, uhamuzwihʼishipambwi sha vumwamu nisha mushinzi,

⁸ ṿwonti uṿivisile kuṿinama ṿwakwe. She lwʼahavihaga ṿwonti kuṿinama ṿwakwe pʼatahalesile nahamo ahasitakuvikwa kuṿinama ṿwakwe. Nkandi shinishi tushili ukuṿwenya ṿwonti kuṿinama ṿwakwe.

⁹ Uwene nyenʼuYesu Uno wʼamanda mansi ali munsi nakuvahavizya, we tukwaga shinishi azwisilwʼishipambwi sha vumwamu nisha mushinzi, ukuti muvwila vwa Mulungu avatomolelʼavantu vonti uvufwe.

¹⁰ She zyamuhondeye uwene, we pazyakwe ṿwonti ṿilipo, havili muli wuyo ṿwonti ṿipezilwe, ukumulunjisya mumayimba uMwamfumu wa vupokwa wʼakuvalongozya avanʼavinji ukuvufishilʼuvumwamu.

¹¹ She vonti, nuno wʼakuvazelufwa avamwavo nave vakuzelufilwa, vafumile muli woka mwene. Mwe mumwo insoni zitamulemile nazimo ukuvataha ukuti vamwitu,

¹² lwʼakuti: Nkuvakumusizyʼavamwitu izina lyaho, pahati pashivanza ndikwimbilʼulwimbo.

¹³ Havili akuti: Ine nkumutungamila wuyo. Nohavili akuti: Yenya, nene navana vʼampiyʼuMulungu.

¹⁴ Ilelo shʼavana vali nuvulilani mumavanda namumuvili, wope vovulo ahalilana na zizyo, ukuti muvufwe amutupulaje wʼali namaha ga vufwe, nkumutahʼumukwalanzi,

¹⁵ ukuti avatavuzyaje vala ve mushitetemwi sha vufwe vakonzile kuvuzya muvulanzi vwavo vwonti.

¹⁶ She zya nalyoli ukuti atavasiviliye avahavizya ndali, nkandi ye mbeyu ya Abulahamu yʼayisiviliye.

¹⁷ Zye zizyo zitili aholane navamwavo muli zyonti, ukuti ayipelajʼukuva washiputo umupiti uwa lupepelezyo, havili umutungamu muli zyonti Zye zyenyizye kwa Mulungu, ukuti apelajʼulukundanyo kuvutalamalandu vwa vantu.

¹⁸ Shʼuwene ayimṿilwe lwʼakulingwa, mwe mumwo amanyilʼukuvatula ve vakulingwa.