VaHebuli 12 - Tesitamenti Umupwa 1965

UYesu ishiholanyo ishipiti sha lwitiho

¹ Pe lelo naswe she tuzyungulilwe nivingo lya vahome inza she ili, tutagaje uvumwamu vwonti vwe vukutudindila nuvutalamalandu vwe vutakuhava ukututatʼiṿinama, tushimbile twumishizyaje ukuyikungula kulutumṿanyo lwe luli kwilongolela kulʼiswe.

² TumutontomelʼuYesu wʼakutulongolela mulwitiho, wʼakululunjisya, wʼahakalanyʼulusankano lwe lwatelamisilwe papakwe, ahajimbilila ishihovenkanyo, ahasita nukusajilʼumusamu. Ilelo pʼahavalʼukutendama kumuhonʼumulilo wa shitengo sha Mulungu.

³ Muhamutontomele wuyo wʼahazyihʼumulaha lwe vakumwila vovulo avatalamalandu, ukuti mutahatampaje mumoyo ginyu, havili ukuti mutayeleketwaje.

Zyʼmsambilizyo zya lujendʼulwinza zizilulumiye

⁴ Lwe mukulwa nuvutalamalandu imwe, pe mushili ukufiha nakwo napamavanda.

⁵ Havili muziluṿilwe ninsoshe Zye zikuyanga kulʼimwe fwe ngati kwe kuvana, Zye zikuti: We mwana wane utapupusyaje isunde lya Mwene, havili utahahasamale lwʼakukupilila.

⁶ Shʼuno wengʼuMwene amukunzite, wʼakumusunda, navana vonti vʼakuvaposhela, vʼakuvasyempa.

⁷ She mukujimba izya kusundwa. UMulungu akuti alolehaje kulʼimwe fwe ngati kwe kuvana. Amwe mwana vuli wʼuyise atakumusunda?

⁸ Inga mute nazyo izya kusundwa, pe fwane mwe vana va mwisole, pe te mwe vanavana.

⁹ Havili twali navatata ve vatupafile umuvili, lwe vakutusunda pe tuhavanyila. Amwe pe tusitaje ukupitilizya kukonza kwa Yise wa mpepo zyonti, ukuti tulandilaje?

¹⁰ Shʼavene vala ve vahatusundaga amahʼamafupi, vahatusundila mwe vahasivililaga vuvo. Nkandʼuwene lwʼakutusunda pʼakwanzʼukutuyananya ukuti tuvwagaje uvufinjile vwakwe.

¹¹ Insanzu zyonti zya kumusundʼumuntu lwʼali nazyo pe zili fwe ngati te zya kuseshela ndali, zili fwe ngati zya vuswimililwa. Nkandʼulwa pisinda pe zikuvapelelʼulusanga lwa vugolosu lwe lukwihazyʼamoyo ga vonti ve vavelezinye nazyo.

¹² Mwe mumwo muzigolosyajʼinyove Zye zitozosile niṿizwi ṿwe ṿisohotosile,

¹³ havili muṿigoloshezyaje iṿinama ṿwinyu amadala amagolosu, ukuti henga hakudyogolela hatahapuve ndali, nkandi ukuti hapitilizyaje ukuzuzuvuha.

Izya nsoshe mwe zivaliye

¹⁴ Muyikungule ukuva nuvwihalo navantu vonti, muyikungule namuvufinjile. Shisitavuvwo numo atalimwenyʼuMwene.

¹⁵ Mwenyaje numo atavugunjilaje Uvwila ṿwa Mulungu, nalimʼizi lya vuhali litaduṿwaje ilya kuvahatamfwa, ilya kuvahandamanya ve vinji.

¹⁶ Numo atavanje muvembu, numo atavanje mukwelengusu inza shʼuYesavu, wʼuvwahatote vwakwe ahavukazya nishigavo shoka vwelele isha ṿintu.

¹⁷ She mumanyile namwe ukuti pisinda lwʼakuti apwanʼuvulote pʼahahanwa, shʼatapazile apa lupinduho nashenga ahalwanzaga nkani namansozi.

Ukusitakuholana kwa Ziyoni wa munsʼumu nu wa kumwanya

¹⁸ Shʼimwe mutinzile kwigamba lyʼumuntu angapalamansya, nga kwe kumwoto wʼakwaha, nga kwe kuvwilu, nga kwe kushisi, nga kwe kunkungu,

¹⁹ nga kwe kwizwi lya masaji, nga kwe kumazwi ge gakuyanga namahʼamapiti, ge vahahanaga ve vahiṿwaga ukuti izwʼilyamwavo litatakwaje kuli vuvo.

²⁰ She lyavapeleyʼishitetemwi lyʼalajizizye atili: Inkanu yimo inga yikupalamansyʼigamba ili, pʼitinzwaje namavwe.

²¹ Shope nishitushizya shimwamile te kumwama, nuMose ahati: Ishitetemwi shinazile, nkutetema,

²² Nkandʼimwe mupalamiye kwigamba uZiyoni, kunkaya ya Mulungu umulanzi, kwa Yelusalemu wa kumwanya, nakumpuga zya vahavizya Zye numo atangavazya,

²³ nakuluhomano ulupiti nakushivanza sha vahatote ve vasimṿilwʼamazina kumwanya, nakwa Mulungu umulonzi wa vantu vonti, nakumpepo zya vagolosu ve valunjisile,

²⁴ nakwa Yesu umulamulanyi wa lwitinkano ulupwa, nakumavanda aga kusansilwa ge gakuyangʼinyinza ukulusya aga Hebeli.

²⁵ Mwandaje, mutamuhanaje wuyo wʼakuyanga, shʼapene inga vapositwʼukupona vala ve vahamuhanaga wuyo wʼahayangaga munsʼumu, pe fwane iswe tukulusyʼukupotwa apa vuponelo inga tukumugunjila uno wʼakuyanga naswe ukufuma kumwanya.

²⁶ Wʼizwi lyakwe lulwo lyayugumbinyʼinsi, we shinishi afinzile atili: Lisyaye lyoka lyene ukuyinzanya te nsi yeka ndali, nkandi nakwe kumwanya.

²⁷ Ilyene lye likuti: Lisyaye lyoka lyene, lye likusimishizya ukuti ṿwonti mwe ṿipezilwe ṿiliyugumbana nukugalulwa, ukuti ṿisyalaje ṿiṿwo ṿweka ṿwe ṿitakuyugumbana.

²⁸ Mwe mumwo lelo she tukuposhela uvumwene uvusitakuyugumbana, Ukwo lelo tusalifwaje. Vwe muli vuvwo tumuvombelajʼuMulungu inza shʼakuzishela, tusanganye pupo nukumunyila nukumushindiha.

²⁹ ShʼuMulungu witu mwoto umulyaṿwonti.