VaGalati 3 - Tesitamenti Umupwa 1965

UMulungu akumuposhelelʼumuntu pazya lwitiho, te pazya nkomelezyo

¹ Mwe vaGalati mwe vasitanjelʼimwe, unanu avelesile, imwe mwe twavasimbiye ishati sha Chilisiti ukuti mumwenyaje naminso ginyu umuhomelelwa pashihovenkanyo?

² Zye nkuti nsambilile kumwinyu zyeka zinizi: Lwe mwamuposhelaga uMupepo, amwe pʼafumile mumbombo zya munkomelezyo amwe muli zizyo zye mwiṿuye mulwitiho?

³ She muhonzizye mwe vasitanjele? Mwanzite mwa Mupepo, nkandi shinishi mukwanzʼukumalilizya muzya muvili vwelele?

⁴ Amwe zyonti zye zyavinzilaga zye zya shaha? Shʼinga nalyoli zyavinzilaga shaha.

⁵ Uwenʼuno wʼakuvapʼuMupepo, amamfindango ga maha gʼakupela mumwinyu gafumile mumbombo zya munkomelezyo amwe muli zizyo zye mwiṿuye mulwitiho?

⁶ Ziholine nizya Abulahamu wʼahamwitihʼuMulungu, mwe mumwo ahatashilwʼuvugolosu.

⁷ Mumanye lelo ukuti venga vali nulwitiho ve vana va Abulahamu.

⁸ Shʼuwenʼukalata amumanyile nzilʼuMulungu ukuti avakunzi akuvatahʼuvugolosu inga vitisile, mwe mumwo ahamuvuzya nzila hali uAbulahamu intumʼinyinza, ye yikuti inkolo zyonti zya vakunzi zililotwa mwe mumwahʼiwe.

⁹ Pe lelo vonti venga vali mulwitiho ve valilotwa poka nuAbulahamu umwitisi.

¹⁰ She vonti venga vimiliye mumbombo zya munkomelezyo ve va muntipo. She lisimṿilwe lye likuti: Atifilwʼumuntu wonti wʼatakusyelemetela muzyonti zye zisimṿilwe mwa kalata wa nkomelezyo nukuzivomba.

¹¹ Izyene nyene zye zilʼapazelu ukuti munkomelezyo numʼumuntu atakutashilwʼuvugolosu kuminso ga Mulungu, shʼuno wengʼuvugolosu vwakwe vufumile mulwitiho, wʼalilandila.

¹² Izyene nyenʼinkomelezyo zitasimfile mulwitiho, nkandi uno wengʼakuzivomba we zikumupʼuvulanzi.

¹³ UwenʼuChilisiti atuposile kuntipo zya nkomelezyo, shʼayipezilʼukuva ntipo zya kutupohʼiswe —she lisimṿilwe lye likuti: Atifilwe umuntu wonti wengʼakuhove-shelwa pikwi—

¹⁴ ukuti uvulote vwa Abulahamu vuvinzilaje vope navakunzi mwa Yesu Chilisiti, ukuti tumuposhelaje mulwitiho uMupepo wʼafinzile naswe.

¹⁵ Mwe vamwitu, shinishi nkuyanjila muvuntu. Nkuti ulumfingwi lwa muntu lwʼakulajizizya izya kulajizizya, inga vamwitisile ava kumwitishila pe numo atakuvindula, havili numo atakwonjezya hamo pupo.

¹⁶ Ilelʼizyene zyʼuMulungu afinzile, zyʼafinzile kwa Abulahamu nakuluveyu lwakwe. Atakuyanga mumbeyu zye nyinji, akutaha lwoka vwelele lwʼakuti namuluveyu lwaho, akumutahʼuChilisiti.

¹⁷ Nkutahʼine lelo nkuti: Inkomelezyo zye zilandite mwisinda amaha 430 zye zitakunanganyʼulumfingwi lwʼuMulungu atalisilʼukulusimfwa hali, havili zitakuzimanjizya zyonti zyʼafinzile.

¹⁸ Shʼinga zyatupwanizya zye nkomelezyo pavupwano, pe nkandʼizyene zila zye zyafinzilwe zitakutupwanizya. UwenʼuMulungu nyene lwʼamukunjiyʼuAbulahamu uvupwano, pʼamukunjiye muli zye zila zyʼafinzile.

Ishintu shʼinkomelezyo zishilulumiye

¹⁹ Izyenʼinkomelezyo lelo zya shonu? Zye zihavikwa shʼinchilanyo zilipo. Zyali zya kuva pupo lwe lushilʼuluveyu uluhatalumfingwi. Izyenʼinkomelezyo zihimikwa mwe muvu-vomṿi vwa vahavizya, vazyimishiye mumuhono wa muhomenkanyi.

²⁰ Uwenʼumuhomenkanyi atakuva wa woka mwene, nkandʼuwenʼuMulungu wʼali woka mwene.

²¹ Vuli lelo amwʼinkomelezyo zikulasana lumfingwi zya Mulungu? Zye ndali ukushela zinizi. Shʼinga zyalipo nkomelezyo zimo zye zikupelʼuvulanzi, pe nkandʼuvugolosu vukufuma mwe munkomelezyo.

²² Ilelʼuwenʼukalata aṿwigaliye ṿwonti mwe muvutalamalandu, ṿwe ṿifinzilwe pe pakuti ṿifumaje mwe mulwitiho lwa kumwitihʼuYesu Chilisiti, ṿwinzaje kuli vonti venga vakumwitiha.

²³ Lwʼulwitiho lushili ukwinza pe twigalilwe munkomelezyo zye zyatutilinzile, tuhasunjilila ukuti tuhafishe kulwitiho lwe lukwinzʼukuloleha.

²⁴ Pʼinkomelezyo ziyipezilʼukuva nsundavana zya kutusundila kwa Chilisiti, swenti tutashilwajʼuvugolosu vwe vukufuma mulwitiho.

Zye zikufuma mulwitiho

²⁵ Shinishi lelo shʼulwitiho lwinzile, pe tute muṿinama ṿwa nsundavana havili.

²⁶ She mwenti mwe vana va Mulungu mulwitihʼulu lwe mulwitisile mwa Chilisiti Yesu.

²⁷ She mwenti mwe mwozilwe mwa Chilisiti, mumuzwayʼuChilisiti.

²⁸ Kutalipo panapa umu Yuda numo nga muGiliki, kutalipo numuzya numo nga musatushe, kutalipo umuntʼumwanaṿuli numo nga mwantanda, shʼimwe mwenti muyipezilʼukuva woka mwene mwa Chilisiti Yesu.

²⁹ Apene lelo inga mwe va we Chilisiti, pe mwe mbeyu ya Abulahamu, pe mwe va kupwanʼuvupwano vwʼafinzile.