VaEfeso 2 - Tesitamenti Umupwa 1965

Uvupokwa vuli muvwila vwa Mulungu

¹ Namwe mwali mwe vafwe munchilanyo namuvutalamalandu vwinyu,

² mwe muhalandata mulujendo lwinyu amiho ga nsi yinino naga songo wavo umuhatamaha ga mumwanya, we mpepo yʼikuvombʼimbombo yakwe muvana va lusufanyo,

³ naswe lulwo tuhajendaga mumwo lwe tukuzyitihʼimpapilo zya muvili wa mbivi, tuhavomba yiyo yʼahatutumagʼumuvili witu wa mbivi, nizya nsivo zyitu naswe twali swe vana va mulaha inza she navanji.

⁴ UwenʼuMulungu nyene, she muhatalupepelezyo ulwinji nkani, atukunzite nishikunzi shakwe she shipiti nkani.

⁵ Nashenga twali swe vafwe munchilanyo zyitu, ahatupelela poka nuChilisiti uvulanzi. Mwe muvwila mwe muhapokwa.

⁶ Ahatuzyusya poka nawo, ahatutendamiha poka nawo kumwanya mwa Chilisiti Yesu,

⁷ ukuti namumaha ge gakwinza alolesye uvwinji vwa vwila vwakwe uvulusyi mwe vuvaliye, vwʼatutontolosheye mwa Chilisiti Yesu.

⁸ Mwe muvwila nyene mwe muhapokwa muzya lwitiho. Nkandi zinizi zitafumile kulʼimwe ndali, avakunjiye we Mulungu.

⁹ Havili zitafumile mumbombo zyinyu, ukuti numʼumuntu atahayitime weka,

¹⁰ She swe ṿipelelwa ṿwakwe wuyo, tupezilwe mwa Chilisiti Yesu ukuti tuvombajʼimbombʼinyinza, zyʼuMulungu atuyananizizye nzila lulwo ukuti tujendele mumwo iswe.

Uwakunzi numuYuda vakuvungana mushivanza

¹¹ Mwe mumwo lelo mukumbuhaje ukuti lwe mwali mwe vakunzi pashibazuho, pʼavene ava vuvolwa vwa mumuvili vwe vakuvola ninyove, ve vahavatahagʼimwe ukuva mwe vasitavuvolwa.

¹² She pe mutali nawʼuChilisiti. Mwali mwe vantu vwelele kuluho lwa vana-Yisilayili. Mwali kunzi kumfingwi zyʼafingine navo uMulungu zyʼatili ziliyinza. Mutali nazyo nazimo izya kusuvila, wope nawe Mulungu mutali nawo munsʼumu.

¹³ Nkandi shinishi mwa Chilisiti Yesu, imwe mwe lulwo mwali va kukutali, shinishi pʼamavanda ga Chilisiti gavapalamizizye.

¹⁴ Uwene nyene we vwihalo vwitu, shʼatupatinkinye twe twali tuvili, ukuva hoka hene, shʼamongolinyʼuvwizigo vwe vwatutapulinye, nkutaha ishilugu.

¹⁵ Zyʼahavomba shʼahazyomolanya inkomelezyo mumuvili wakwe, zye zili nindajizyo munkomelezyo, ukuti ve vavili vayipelajʼukuva muntu woka mwene mwe mumwakwe wuyo, muli zinizi ahapelʼuvwihalo;

¹⁶ ukuti avakundanyaje ve vavili nuMulungu mumuvili woka mwene pe pashihovenkanyo, muli shisho ashigozilʼishilugu.

¹⁷ Pʼahinza, ahavavuzizya muntumʼinyinza Uvwihalo, mwenti mwe mwalʼukutali namupipi.

¹⁸ She muli wuyo twigulilwe ishilyango shoka shene swenti swe vavili muMupepo woka mwene isha kumupalamila uTata.

¹⁹ Pe lelo shinishi imwe te mwe vajeni avashintizi havili, nkandi mwe vasamizi avamwavo navafinjile, mwe vana va munyumba ya Mulungu.

²⁰ She muzenzilwe palwalo lwa vapositili navakuvwi, lwʼuYesu ayipezilʼukuva lye livwe lya kushipembe wuyo.

²¹ Wʼuvuzenje vwonti vukukula inga tulemine mwe mumwakwe wuyo utuntu twakwe twonti ukuyipelʼukuva tempelʼimfinjile mwa Mwene.

²² Muli wuyo mwe namwe mukuzengwa poka ukuti muvanje mwe vuyo vwa Mulungu mwa Mupepo.