uYuuda 1 - Tesitamenti Umupwa 1965

Umulamu

¹ Ne Yuda, ne munyamata wa Yesu Chilisiti, uwamwavo wa Yakobu, nkuvasimbila mwe vitwa, mwʼavakunzitʼuMulungu uSo, mwʼuYesu Chilisiti avuvatiye.

² Ulupepelezyo nuvwihalo nishikunzi ṿivanje kumwinyu.

Insoshe kuvasambilizi vʼilenga nizya lunanjiho lwa lujendo

³ Mwe vankundwa, lwe nkuyikungula ukuvasimbilʼizya vupokwa vwe tuli navwo vwoka vwene swenti, pe nkaga zimo zikumṿijilizya ukuti imbasimbile izya kuvayinzanya imwe ukuti mulwilajʼulwitiho lwe vapelilwe lyoka lyene avafinjile.

⁴ She valipo avantu vamo ve viṿile vwelele ukwinjila, ve vasimbililwe ukufuma he hali uvulanzi vunuvu, avasitakumunyilʼuMulungu, vʼuvwila vwa Mulungu witu vavugaluye ukuva vwa kuvapʼuvulugusu vwonti, havili vakumuhana uMuhataṿwonti nuMwene witu uYesu Chilisiti.

⁵ Ine nkwanzʼukuvakumbusyʼimwe Zizyo zye mwazimanyile nzila lulwo, izya kuti uMwene avafumizye avantu vakwe munsi ya mw-Egipiti, ulwa pisinda pʼahavasyusyutanya avasitakwitiha.

⁶ Vope navahavizya ve vatasunjiliye uvuvombezi vwavo uvutanzi, ve vahaleha nazye nyumba zyavo, vʼavavisile kunzi kushisʼishilu, avakungwa mumanyololo amasitakusila nalumo ukuti vahinze valongwe pisiku ipiti lila;

⁷ inza shʼinkaya ya mu-Sodomu niya mu-Gomola ninkaya zye zya palamiye mumwo, zye zyaholine navantu vanava, lwe zikupapamilʼuluvembu nukulandata amavili aganji, zye zivisilwe ukuva shimanyilo, she zikuyimba isunde lya mwoto wa shimashima.

⁸ She vahonzizye lelo avalotanjozi vanava, vope vakuhandamanyʼamavili gavo, vakusyoshelʼuvuhatavumwene, havili vakuvutona uvupiti vwonti amatona.

⁹ UwenʼuMikayeli usongo wa vahavizya, lwʼahalwanga nuMukwakwa lwe vakudalinkana pazyʼiṿimba lya Mose, pʼahanyilʼuwene ukumuyanjila vuvi izya kumulonga, nkandʼahayanga lye lyakuti: UMwene akusundaje.

¹⁰ Avene vanava nyene vakuzitonʼamatona zyonti nazye vatazimanyile. Nkandʼizyene zye vazimanyinsinye muvupezi, inza shʼinkanu zye zitali ninjele zikuhonzya, zye vakuyinanga muli Zizyo.

¹¹ Ve tukuti: Ye mayi we. She vajenzite idala lya Kayini, vayitezizye muṿipuva ṿwa Bilyamu, she vakuluvʼamalipilo. Vasyusyutilwe mumaluli ga Kola.

¹² Avene mazota vwelele aga vupamizu lwe mukuhomana navo ukulya iṿwa vumanyani, pʼavene insoni nazimo, vakuyilela veka, mavingo amasitamṿula ge gakuyugumbana mwonti mwonti kunkungu, makwi ge gapululusilʼamatundu amasitakuhomʼinsanga, mafwe ge gafuye nulwa vuvili, gakumpusile namazi.

¹³ Ge mavilingwa ga mwa sumbi ge gahalambine, ge gakulafuha insoni inkuzyamatwe, avene zye nzota impuṿwavantu, ve vuvo shima vasengulilwʼishisi she shili fi.

¹⁴ NuHenoki, uwa vusano navuvili ukufuma kwa Adamu, akuvwilwe nzila he hali lwʼatili: Yenya, uMwene akwinza nimpuga zyakwe izya vafinjile zye nyinji,

¹⁵ ukuvalonga vonti nukuvamenelezya avilaMulungu vonti pambombo zyonti izya vwilanyi vwavo vwe vahamwilanya napamazwi amahali gonti ge vamuhalapiye avatalamalandu avilaMulungu.

¹⁶ Avene ve vahatalukwinkwino nuludwegano, vakujenda mumpapilo zyavo, amalomu gavo gakuyanga amazwi amadudusu, vakuvasukumilʼavantu ukuti valonkaje ṿimo.

¹⁷ Imwe nyene mwe vankundwa mukumbuhajʼamazwi gʼavapositili va Mwene witu uYesu Chilisiti vagayanzile nzila,

¹⁸ lwe vayanzile kulʼimwe vatili: Mumaha ga kumpelela pe valilolehʼavatonamatona ve vakulandata mumpapilo zyavo izya kumwilʼuMulungu.

¹⁹ Ve vuvo vakupelʼulutapunkano, vakulandata mwe vapezilwe, uMupepo vate nawo.

²⁰ Imwe nyene, mwe vankundwa, muyizenjele palwitiho lwinyu ululusyʼuvufinjile, muputaje mwe mwa MupepʼuMufinjile,

²¹ muyisunjilile mushikunzi sha Mulungu, aminso ginyu gatontomelaje kulupepelezyo lwa Mwene witu uYesu Chilisiti ukuti muvanje nuvulanzi vwa shimashima.

²² Vamo ve vakuganagana ve muvapepelezyaje,

²³ vamo muvapohaje lwe mukuvasompola mumwoto, vamo muvafwilajʼuvwila mulunyilo, namwe mwogopajʼumwenda wʼavifilʼuvupamizu vwa muvili wa mbivi.

²⁴ Uwene nyene uno wʼali namaha ga kuvuvatila ukuti mutatelemuhaje naga kuvaviha kuminso ga vumwamu vwakwe mwe vasitamazota muvusangalusu,

²⁵ nkuti uMulungu wʼali woka mwene, wʼatuposile mwa Yesu Chilisiti uMwene witu, uvumwamu vuli na wuyo, nuvupiti ninguyu namaha, ukufuma shimashima nashinishi nakuvusitakusila nalumo lumo. Amen.