uTiiti 3 - Tesitamenti Umupwa 1965

Ulujendo lwa shichilisiti namwe lusimfile

¹ Uvakumbusyaje vakonzaje nakuvahatansi nakuvamwene, vavasajile, vengupaje mumbombʼinyinza zyonti.

² Vatamuligaje numʼumuntu, vavanje vasitʼivo, avatehamu. Muli zyonti vavanje vatelefu kuvantu vonti.

³ She naswe lulwo twali swe vasitanjele, tuhaluliha, twali swe vategwa. Twali swe vazya va ṿipapilo nava ṿinonu ṿwonti mwe ṿivaliye, tuhizya muvuvivi namulugulumwo, twali swe mantu, tuhapatanaga swe vuvo vatupu.

⁴ Ilelo nyene ishikuku Ishikunzi sha Muposhi witu uMulungu shʼakuvakundʼavantu shihaloleha,

⁵ te mwe mumbombo zya vugolosu zye tuvomṿilʼiswe ndali, nkandi mulupepelezyo lwakwe ahatupoha nage minzi aga kwandulwa mumwo nalwe lwanduho lwʼakutwandulʼuMupepʼuMufunjile,

⁶ wʼatwitiliye we mwinji mwa Yesu Chilisiti uMuposhi witu.

⁷ Naswe mwe tugolosheye uvugolosu muvwila vwakwe wuyo, ukuti naswe tuvanje swe va kupwanʼuvupwano vwa vulanzi vwa shimashima inza she mwe luvaliyʼulusuvilo.

⁸ Litungamu izwi linili. Zye zizyo nkasimʼukuti uvavuzye uhomeshezyaje, vuvo ve vamwitisilʼuMulungu ukuti vumishizyaje imbombʼinyinza. Izi zye nyinza havili zya vutuli kuvantu.

⁹ Ilelo imbuzilizyo zya vuwelewele nazye vakudalinkanʼamazina ga luho mwe gapwanilinkine namadali nivo zyʼuzigunjile, she zitakumuvosya nahamʼumuntu, havili zya shaha.

¹⁰ Umuntu wengʼakuvasonjelezya ukutapunkana, wʼumusoshe ulwa kwanda nulwa vuvili, inga pʼuyileme kuli wuyo.

¹¹ Umanye ukuti uno wengʼahonzizye vovulo wʼaguye, mwe mumwo atazilʼamalandu ge gamulonzile nzila.

Intumi ya kulagana

¹² Lwenga namutuma uAlitema nga wʼuTikika pʼuhapimpile ukwinza kukwane mu-Nikopoli umu, she mwe nkwanzʼukulila ulupepo.

¹³ UZena umumanyankomelezyo nuApolo uvatule luvilo luvilo ukuvasogozya mwidala, ukuti ṿitahavasove naṿimo.

¹⁴ Avamwitu vonti vasambilile ukuyikungula kumbombʼinyinza ukuti vavanje naṿwo yimo lwe ṿikwanzilwa, vatavanje vagumba kunsangʼinyinza.

¹⁵ Vakukulamuha vonti ve ndi navo. Utulamushile vuvo ve vatukunzite mulwitiho. Uvwila vuve namwe mwenti.